ཀ་རྩོམ་ཆུང་དུས་དྲན་གསོ།

ལོ་རིམ་བདུན་པའི་སློབ་གཉེར་བ། སྐལ་བཟང་དབང་འདུས།

ཀ་ཁ་ཙམ་ཡང་ཡིག་ངོ་མི་ཤེས་མོད།།
ཁ་ནས་ཧ་ཨ་བར་དུ་ཤར་རེར་བསྐྱོར།།
ག་དུས་ཡིན་ཡང་རྩེད་མོར་མགོ་འཐོམ་པའི།།
ང་ཚོ་ཆུང་དུས་མི་ཚེ་སྐྱིད་ཤོས་རེད།།

ཅ་ལག་ཡག་སྡུག་ཅི་འདྲ་རག་ན་ཡང་།།
ཆ་ཚང་རྩེད་ཆས་མ་གཏོགས་གཞན་མི་མཐོང་།།
ཇ་ཞིང་བརྒལ་ནས་ཕ་རོལ་རྒྱུག་ཆུ་དེར།།
ཉ་དང་ཆུ་རྐྱལ་འགྲན་པ་ཉུང་ཉུང་མིན།།

ཏ་ལའི་ཤིང་སྡོང་འོག་གི་རྩེད་ཐང་དེར།།
ཐ་ན་རྐང་པར་གྱོན་རྒྱུའི་ལྷམ་མེད་རུང་།།
ད་དུང་དགའ་སྤྲོས་ཉི་འོད་ཆར་ཆུའི་ཁྲོད།།
ན་གཞོན་ཕན་ཚུན་སྤོ་ལོ་སྡུར་གྲངས་མང་།།

པ་སངས་མ་གཏོགས་སྔོན་གྱི་རེས་གཟའ་ལྔར།།
ཕ་རོལ་ཚུ་རོལ་གྲལ་གྱི་འཛིན་གྲོགས་ཀུན།།
བ་ཉལ་མཛོ་གྲོད་གཉིད་ལྕོག་ཡོམ་ཡོམ་ངང་།།
མ་ཉན་ཀ་མེད་སློབ་ཚན་སྦྱོང་ཁུལ་བྱས།། 

ཙ་གེ་ཙིག་གེའི་བཙོག་པ་གཡུག་ས་ན།།
ཚ་བས་ནག་པོ་བཟོས་ཀྱང་མ་འཛེམས་པར།།
ཛ་ར་ཛོ་རེའི་རྩེད་ཆས་བསྡུས་དྲགས་ནས།།
ཝ་མོ་ཁྱི་སྤྱང་ཞེས་པའི་མིང་ཡང་ཐོགས།།

ཞྭ་མོ་ཡིན་ཟེར་ཤིང་ལོ་མགོ་ལ་གྱོན།།
ཟ་བཏུང་སྣ་ཚོགས་ཁུར་ཏེ་ལྕང་སྡོང་གསེང།།
འ་རེ་འུ་རེའི་གཏམ་དང་གླུ་དབྱངས་ཀྱིས།།
ཡ་མེད་སྐྱིད་པོ་བཏང་བ་ད་ལྟ་དྲན།།

ར་བས་མ་བསྐོར་སློབ་གྲྭའི་གླིང་ཁ་རུ།།
ལ་ལ་ཡིབས་ཤིང་ལ་ལས་འཚོལ་བྱེད་པའི།།
ཤ་ཁྱིས་རི་དྭགས་འདེད་འདྲའི་རྩེད་འཇོའི་རིགས།།
ས་ཆ་དེ་ཉིད་མཐོང་དུས་སྙིང་ནས་དྲན།།

ཧ་ཧ་དགོད་སྒྲས་ཁེངས་ཀྱང་སྐབས་རེ་ནི།།
ཨ་མ་དྲན་ནས་ངུ་སྒྲས་ལུང་པ་བཀང་།།
ཧ་རི་ཙནྡན་ནགས་རིའི་རྒྱབ་ལོགས་ན།།
ཨ་ཕ་བཞུགས་པའི་ཕ་ཡུལ་ཡོད་ངེས་བསམས།།

Share on facebook
Facebook
Share on twitter
Twitter
Share on linkedin
LinkedIn
Share on whatsapp
WhatsApp
Share on telegram
Telegram

དཔྱད་མཆན་སྤེལ།