ལོ་རིམ་གསུམ་པའི་སློབ་གཉེར་བ། ཚེ་རིང་བཀྲ་ཤིས།
དྷཱི་ཡིག་སྙིང་ལ་འཕོས་པའི་མི་ཕམ་བླ་མས།།
སྲིད་གསུམ་ཤེས་བྱའི་རྣམ་གྲངས་ཇི་སྙེད་ཀུན་ཀྱང་།།
མ་ལུས་གཅིག་ཏུ་བསྡོམས་པའི་མཁས་འཇུག་གཞུང་འདི།།
བདག་ལ་མཇལ་རྒྱུའི་དུས་འདི་ཨེ་མ་མཚར་བྱུང་།།
སེམས་པ་གངས་ལ་བཅོལ་བའི་དགེ་རྒན་དག་གིས།།
དཀའ་སྡུག་རི་བོ་ལྗིད་ཀྱང་དཔའ་ངར་བསྐྱེད་ནས།།
ང་དང་ང་འདྲའི་སློབ་མ་ཀླད་སྟོང་རྣམས་ལ།།
སྙིང་ནས་ཡོན་ཏན་སྩོལ་ལ་གུས་པས་འདུད་དོ།།
སྲིད་གསུམ་ཤེས་བྱའི་རྣམ་གྲངས་ཇི་སྙེད་མཆིས་ཀྱང་།།
མི་ཕམ་བླ་མའི་ཕྱག་གི་སེ་གོལ་གཅིག་གིས།།
མ་ལུས་གཅིག་ཏུ་བསྡོམས་པའི་རྣམ་ཐར་གོ་དུས།།
མཁས་འཇུག་གཞུང་ལ་ཐོག་མར་སྤྲོ་བ་བརྟས་སོང་།།
བདུད་རྩིའི་ཆུ་བོ་དབེན་པའི་མྱ་ངམ་ཐང་ན།།
སྐོམ་པའི་གདུང་བས་མནར་བའི་བུ་ཆུང་ང་ཡང་།།
ཆུ་མོ་ཤག་ཤག་འབབ་པའི་མཁས་འཇུག་གཞུང་ལ།།
མ་བསྟེན་མཐུ་མེད་བྱུང་བའི་གཏམ་རྒྱུད་ཡོད་ལགས།།
བྱ་སྒྲོ་རླུང་གིས་བཏེག་པའི་རྗེས་ཤུལ་དེ་ན།།
རྨི་ལམ་ཡུལ་ལ་ཆགས་པའི་དོལ་ཕྲུག་ངས་ཀྱང་།།
མཁས་འཇུག་གཞུང་འདི་མཇལ་བའི་བསོད་ནམས་དེ་ཡིས།།
སྙིང་ལ་སྤོབས་པའི་གཟི་འོད་ཡང་ཡང་སྤར་བྱུང་།།
དེ་ཕྱིར་རི་དང་སྤྲིན་དཀར་ནགས་ཀླུང་དག་གི།
སྙན་པའི་ངག་དང་འགྲོགས་ཏེ་མཁས་འཇུག་གཞུང་དང་།།
བློ་སེམས་དཀར་བའི་དགེ་རྒན་ཉི་ཟླ་གཉིས་ལ།།
བསྟོད་ཚིག་སེམས་ཀྱི་ཚོར་རླབས་འདི་ཉིད་ཕུལ་ལོ།།
༡༣/༠༥/༢༠༢༣
