ལོ་རིམ་ལྔ་པའི་སློབ་གཉེར་བ། བསོད་ནམས་ཆོས་འཕེལ།
ཉོན་མོངས་དབང་གིས་སྲིད་པའི་དྲྭ་བ་ཡིས་བཅིངས་པའི།།
རིགས་དྲུག་གནས་སུ་འཁྱམས་པའི་འཁོར་བ་ཡི་སེམས་ཅན།།
ཡང་དག་ལམ་བཟང་འདྲེན་རྣམས་ཞིང་གཞན་དུ་གཤེགས་པས།།
མགོན་མེད་མུན་པར་འཁྱམས་པས་སྐྱོ་སྣང་རེ་ཤར་སོང་།།
གཏན་གྱི་འདུན་མ་སྒྲུབ་པར་སྐྱབས་མགོན་ཞིག་བསྟེན་ཀྱང་།།
རྟག་བརྟན་འཕོ་འགྱུར་མེད་པའི་ནང་སེམས་ཀྱི་དད་པ།།
སྐྱེ་བར་དཀའ་བའི་སྙིགས་མ་ལྔ་དུས་ཀྱི་མཐའ་རུ།།
ཁྱེད་རྣམས་ཞི་བར་གཤེགས་པས་སྐྱོ་སྣང་རེ་ཤར་སོང་།།
ལུང་རྟོགས་དམ་པའི་ཆོས་ཀྱི་འོད་སྣང་འདི་འགྲིབ་སྟེ།།
འགྲོ་རྣམས་སྐྱབས་མེད་སྡུག་བསྔལ་རྒྱ་མཚོ་རུ་འཐིམ་དུས།།
བརྩེ་བའི་ཐུགས་རྗེས་གཟིགས་པའི་སྐྱབས་མགོན་དེ་ཕེབས་པས།།
ཀྱེ་མ་ཐབས་མེད་འཁྲུལ་ཚེ་སྐྱོ་སྣང་རེ་ཤར་སོང་།།
ནང་ལ་ཡོད་མེད་ཕྱི་ནས་རྟོགས་ཐབས་དང་བྲལ་ཡང་།།
དེང་དུས་ཕྱི་ཙམ་མཁས་པས་འཇིག་རྟེན་འདི་ཁེངས་དུས།།
ནམ་ལངས་སྐར་མ་ལས་དཀོན་དོན་དངོས་ཀྱི་མཁས་པ།།
དེ་ཡང་གཤེགས་ཚེ་ཡིད་ལ་སྐྱོ་སྣང་རེ་ཤར་སོང་།།
བདག་འཛིན་འཁོར་བའི་བཙོན་རར་ཡུན་རིང་གི་བར་དུ།།
དམ་པས་རྗེས་སུ་བཟུང་བའི་སྐལ་བཟང་དེར་བསྒུགས་ཀྱང་།།
དེ་རིང་ཁྱེད་དང་མཇལ་བའི་ལས་སྨོན་དེ་སྟོངས་པས།།
སྐྱིད་སྡུག་རེ་ས་མེད་པས་སྐྱོ་སྣང་རེ་ཤར་སོང་།།
སྔ་དར་དུས་སུ་མཁན་སློབ་ཆོས་གསུམ་གྱི་དྲིན་གྱིས།།
མུན་གླིང་གངས་ཅན་ལྗོངས་སུ་རྒྱལ་བསྟན་འདི་སྤེལ་ཀྱང་།།
དེ་ཡི་ཐུགས་སྤྲུལ་ཁྱེད་རྣམས་ཞིང་གཞན་དུ་གཤེགས་པས།།
རྒྱལ་བསྟན་ཉམས་རྒུད་ཐེབས་པ་སྐྱོ་སྣང་རེ་ཤར་སོང་།།
གདུལ་བྱའི་ཁམས་ལ་མ་ངེས་སྣ་ཚོགས་ཤིག་མཆིས་ཀྱང་།།
འགྲོ་བློའི་ཁམས་དང་མཐུན་པའི་དམ་ཆོས་ཀྱི་གྲུ་ཆར།།
བབས་ཀྱང་སྐལ་བཟང་དུས་འདི་རྫོགས་མཐའ་རུ་ཉེ་ཚེ།།
ཀྱེ་མ་བདག་སོགས་འཁྲུལ་བས་སྐྱོ་སྣང་རེ་ཤར་སོང་།།
དུས་གསུམ་དུག་གིས་གཟིར་བའི་ཉམ་ཐག་གི་ཚོགས་ལ།།
དུག་གསུམ་ཞི་བའི་ཆོས་ཀྱི་སྨན་མཆོོག་འདི་སྩོལ་བའི།།
སྐྱབས་མཆོག་ཁྱེད་རྣམས་མཇལ་བའི་མིག་ལམ་ནས་ཡལ་དུས།།
མགོན་མེད་གཅིག་པུར་ལུས་པར་སྐྱོ་སྣང་རེ་ཤར་སོང་།།
བསྟན་པའི་མཛེས་རྒྱན་ཁྱེད་རྣམས་གཤེགས་ཤུལ་གྱི་དུས་ནས།།
བཤད་སྒྲུབ་བསྟན་པའི་ཟླ་འོད་རིམ་བཞིན་དུ་འགྲིབ་སྟེ།།
ནད་མཚོན་མུ་གེའི་འཇིགས་པ་འཇིག་རྟེན་འདིར་དར་ཚེ།།
མཆི་མ་རྒྱ་མཚོར་འཁྱིལ་བའི་ཚོར་སྣང་རེ་ཤར་སོང་།།
འགྲོ་ལ་ཉེ་རིང་བྲལ་བའི་བྱམས་བརྩེ་ཡི་ཐུགས་ཀྱིས།།
མ་ལུས་ཞིང་མཆོག་འདྲེན་པའི་ཁུར་ཆེན་འདི་བཞེས་ཀྱང་།།
གློ་བུར་ཞིང་གཞན་གཤེགས་པའི་གཏམ་ངན་འདི་ཐོས་ཚེ།།
བ་སྤུ་དབང་མེད་ལྡང་བའི་སྐྱོ་སྣང་རེ་ཤར་སོང་།།
བཤད་སྒྲུབ་ཉམས་བརྒྱད་འབར་བའི་སྐྱེད་མོས་ཀྱི་ཚལ་ན།།
དྲིན་ཆེན་སྐྱོབ་པའི་བླ་མ་པད་དཀར་དེ་མེད་ཚེ།།
བདག་ཅག་སློབ་བུ་རྐང་དྲུག་བུང་བ་ཡི་ཚོགས་རྣམས།།
ཟེའུ་འབྲུ་དམ་ཆོས་མ་ཐོབ་སྐྱོ་སྣང་རེ་ཤར་སོང་།།
འཁོར་བའི་མཚོ་ཆེན་བརྒལ་ལ་ཉིན་མཚན་དུ་བསམས་ཀྱང་།།
འགྲོ་བའི་དེད་དཔོན་ཁྱེད་རྣམས་མྱ་ངན་ལས་འདས་ཚེ།།
སྐྱབས་དང་རེ་ས་བྲལ་བའི་སྐལ་དམན་གྱི་གདུལ་བྱའི།།
ཚོགས་རྣམས་ཡང་ཡང་གདུང་བས་སྐྱོ་སྣང་རེ་ཤར་སོང་།།
མི་དགེའི་ལས་ལ་སྤྱོད་པ་ཁ་དར་གྱི་དུས་ན།།
རེ་ལྟོས་ཁྱེད་རྣམས་ལས་གཞན་གང་དུ་ཡང་མ་མཆིས།།
དེ་བས་བསྟན་འགྲོའི་དོན་ཆེན་འདི་ཉིད་ལ་དགོངས་ཏེ།།
ཡང་སྤྲུལ་རྟ་བདུན་དབང་པོ་མྱུར་བ་རུ་ཕེབས་རོགས།།
འགྲོ་བའི་སྐྱབས་གནས་གཅིག་གྱུར་དྲིན་ཆེན་གྱི་བླ་མར།།
འགྱུར་མེད་དད་དམ་གཙང་མས་གསོལ་བ་ཞིག་བཏབ་ན།།
བརྩེ་བས་བུ་བཞིན་སྐྱོང་བའི་ངང་ཚུལ་དེ་བཅངས་ཏེ།།
ཡང་སྲིད་མྱུར་དུ་འབྱོན་པར་ཐུགས་རྗེ་ཡིས་ཟུངས་དང་།།
མཚོ་སྐྱེས་རྒྱལ་བའི་རྒྱལ་ཚབ་ས་སྟེང་འདིར་ཁྱབ་སྟེ།།
ཐུབ་བསྟན་ཉི་གཞོན་གསར་པ་མཁའ་ཁྱབ་ཏུ་ཤར་ནས།།
འགྲོ་རྣམས་བདེ་བའི་དཔལ་ལ་ལོངས་སྤྱོད་ཀྱི་དགའ་སྟོན།།
འཆར་བའི་སྐལ་བཟང་ཉིན་མོ་འབྱུང་བར་ནི་སྨོན་ནོ།།
