ལོ་རིམ་ལྔ་པའི་སློབ་གཉེར་བ། བསོད་ནམས་ཆོས་འཕེལ།
ཀ་དག་འཁོར་འདས་མཐའ་ལས་གྲོལ་བའི་གཞི་མེད་སྤྲོས་བྲལ་ཆོས་ཀྱི་དབྱིངས།།
ཁ་ཆོས་མཁས་པའི་རྟོག་གེ་བ་དང་ཉམས་ལེན་ཕོངས་པའི་བྱིས་པ་ཚོས།།
ག་ཚོད་འབད་དེ་ལོ་བརྒྱར་བསྒྲིམས་ཀྱང་ནམ་དུའང་རྟོགས་པར་མི་ནུས་པས།།
ང་ཡིར་འཛིན་པའི་སྒྲིབ་བྲལ་ངེས་ཤེས་རང་རྒྱུད་བསྐྱེད་ལ་རྟག་ཏུ་འབད།།
ཅ་ནོར་ལ་སོགས་འཁོར་བའི་ཆོས་ལ་ཞེན་པའི་དྲི་མས་མ་གོས་ཤིང་།།
ཆ་ཤས་ཙམ་མིན་གང་སྣང་ཐམས་ཅད་སྤྲོས་ཀུན་བྲལ་བར་རྟོགས་ནས་སུ།།
ཇ་ཡུན་ཙམ་ལའང་ངེས་ཤེས་མཆོག་དང་འབྲལ་མེད་གནས་པའི་འཕགས་མཆོག་རྣམས།།
ཉ་གང་ཟླ་ལྟར་སྒྲིབ་པའི་སྨག་མུན་མ་ལུས་བཅོམ་འདི་ཨེ་མ་མཚར།།
ཏ་ཐཱ་ག་ཏས་ཆོས་ཀྱི་ཕུང་པོ་ཇི་སྙེད་གསུངས་པ་དེ་དག་ཀྱང་།།
ཐ་མལ་ངོ་ལ་སྒྲོ་སྐུར་བྲལ་བའི་ངེས་ཤེས་བཟང་པོ་བསྐྱེད་ཕྱིར་གསུངས།།
ད་ཀོ་འགྲོ་ཀུན་ཡང་དག་ངེས་ཤེས་མྱུར་བར་རྒྱུད་ལ་སྐྱེས་གྱུར་ན།།
ན་རྒ་འཆི་བའི་སྡུག་བསྔལ་གྲོལ་ཏེ་ཐེག་མཆོག་ལམ་བཟང་ཅིས་མི་རྙེད།།
པ་རི་པུ་རི་དེ་གའི་ངང་ནས་མི་ཚེ་དོན་མེད་རྫོགས་པ་ལས།།
ཕ་རོལ་ཕྱིན་དྲུག་ཉིད་ལ་བརྩོན་ཏེ་ཆོས་ཀྱི་སྙིང་པོ་ངེས་ཤེས་ཉིད།།
བ་ལང་རྫི་ལྟར་བླུན་པོ་རྣམས་ལ་སྐྱེ་བར་དཀའ་བ་ཡིན་ན་ཡང་།།
མ་རིག་གཉིད་ལས་སད་པ་དག་གི་རྒྱུད་ལ་སྐྱེས་འདི་ཨེ་མ་མཚར།།
ཙ་རི་ཙ་གོང་གནས་མཆོག་དེ་རྣམས་ཇི་ཙམ་ལན་མང་མཇལ་ན་ཡང་།།
ཚ་དམྱལ་བརྒྱད་སོགས་ངན་འགྲོར་ལྷུང་ན་དམ་པའི་ཆོས་ཀྱི་གཟུགས་བརྙན་ལས།།
ཛ་ཡ་ལ་སོགས་རིག་འཛིན་བརྒྱུད་པས་གནས་ལུགས་ཇི་ལྟར་གཟིགས་པ་བཞིན།།
ཝ་ཆུ་ཙམ་ལའང་འཛིན་པ་བྲལ་བའི་ངེས་ཤེས་རྒྱུད་ལ་སྐྱེད་པར་མཛོད།།
ཞ་རའི་ཚོགས་རྣམས་རྒྱ་མཚོ་བརྒལ་ཚེ་མིག་ལྡན་སྐྱེས་བུར་བརྟེན་པ་བཞིན།།
ཟ་ཟིའི་གནས་མལ་རྒྱབ་ཏུ་བསྐྱུར་བའི་ངེས་འབྱུང་ཅན་གྱི་གང་ཟག་ཚོས།།
འ་འུར་ཆོས་བརྒྱད་གཏན་ནས་སྤོང་ཕྱིར་སོམ་ཉི་བྲལ་བའི་བློ་མཆོག་སྟེ།།
ཡ་མཚན་ཅན་གྱི་ངེས་ཤེས་ཉིད་དེ་རྟག་ཏུ་བསྟེན་པར་མཛོད་ཅིག་གུ།
ར་ལུག་ལྟ་བུའི་འགྲོ་བ་རྣམས་ཀྱིས་མི་དགེའི་ལས་ངན་སྤྱོད་འགྱུར་བས།།
ལ་ལ་ཙམ་མིན་འགྲོ་ཀུན་མ་ལུས་སྲིད་པའི་རྒྱ་མཚོར་བྱིང་བ་ན།།
ཤ་ཁྲག་ཕུང་པོའི་ལུས་ཅན་དག་ལ་རྒྱལ་བས་སྙིང་རྗེའི་ངང་ཉིད་ལས།།
ས་ལམ་ལ་སོགས་ཟབ་རྒྱས་དོན་ལ་ངེས་ཤེས་གདམས་པའི་མན་ངག་སྩོལ།།
ཧ་ཅང་ཟབ་མོའི་ངེས་དོན་རྣམས་ལ་ཡིད་ཆེས་དད་པས་ཞུགས་གྱུར་ནས།།
ཨ་ཏིའི་ལུགས་དང་མཐུན་པར་མཐོང་སྟེ་སྲིད་ཞི་མཉམ་ཉིད་སྣང་བའི་ཚེ།།
ཧ་ཅང་འབད་པས་དཔྱད་པ་མིན་ཡང་ངེས་ཤེས་ངང་གིས་སྐྱེ་འགྱུར་བས།།
ཨ་ཧོ་གནས་ལུགས་ཟབ་མོའི་དོན་ཉིད་མ་མཐོང་མཐོང་བའི་ཚུལ་གྱིས་གཟིགས།།
