ལོ་རིམ་ལྔ་པའི་སློབ་གཉེར་བ། སངས་རྒྱས་རྡོ་རྗེ་བྷག་གི་བ།
དགའ་ན་གདོང་གི་མེ་ཏོག་འཛུམ་གྱིས་བཞད།།
སྐྱོ་ན་མིག་གི་ལམ་ནས་མཆི་མ་བཞུར།།
ངོ་གདོང་གཅིག་ལ་རྣམ་འགྱུར་སྣ་ཚོགས་ཤིག།
སྟོན་ལ་མཁས་པའི་ཡ་ཆུང་སེམས་པ་ཁྱོད།།
མཚམས་རེར་འཇིག་རྟེན་ལམ་དུ་ཆས་ན་དྲན།།
སྐབས་རེར་ཆོས་པ་རྣམ་དག་བྱེད་ན་སྙམ།།
རྟོག་འགྱུ་སྣ་ཚོགས་རྦ་རླབས་འཕྱུར་བྱེད་པ།།
གཞན་དབང་རླུང་གིས་དེད་པའི་སེམས་པ་ཁྱོད།།
བདེ་ན་འཇིག་རྟེན་ལྷ་ཡི་ཡུལ་ལྟར་སྣང་།།
སྡུག་ན་འཁོར་བ་སྦྲུལ་གྱི་ཚང་བཞིན་མཐོང་།།
གནས་ཡུལ་གཅིག་ལ་ཐ་དད་གཉིས་སུ་འཛིན།།
གཏད་སོ་མེད་པའི་དམར་ཆུང་སེམས་པ་ཁྱོད།།
གཞན་གྱི་ཤེས་བྱ་ཁྲོན་པའི་ཆུ་ལྟར་འཛིན།།
རང་གི་ཡོན་ཏན་རྒྱ་མཚོ་བཞིན་དུ་རློམ།།
རང་མཐོང་རང་ཉིད་ཤེས་འཇོན་ཆེར་སྙམ་པ།།
ང་རྒྱལ་རི་བོར་འགྲན་པའི་སེམས་པ་ཁྱོད།།
དེ་རིང་དགའ་བའི་གཉེན་ལ་འཛུམ་མུལ་མུལ།།
སང་ཉིན་སྡང་བའི་དགྲ་ལ་ཁྲོ་གཉེར་གཉེར།།
ཉིན་གང་གཅིག་ལ་དགའ་སྐྱོ་ལན་མང་བརྗེ།།
རང་ཚུགས་རླུང་གིས་དེད་པའི་སེམས་པ་ཁྱོད།།
གོང་ཆེན་ཀུ་ཤུ་རྟགས་ཅན་ཁ་པར་དང་།།
གོང་འབྲིང་སྐར་གསུམ་ཞེས་པའི་ལག་འཕྲིན་སོགས།།
ས་རུ་ལྷུང་ན་སྙིང་ཤ་གས་བྱེད་པ།།
བདག་འཛིན་མདུད་པས་བཅིངས་པའི་སེམས་པ་ཁྱོད།།
ཆགས་པའི་གཏམ་གྱིས་ཞི་བའི་ཏིང་འཛིན་དཀྲུགས།།
སྡང་བའི་སེམས་ཀྱིས་བྱམས་བརྩེའི་ཁང་ཁྱིམ་གཏོར།།
མ་རིག་ཡོལ་བས་ཡེ་ཤེས་མེ་ལོང་བསྒྲིབས།།
དུག་གསུམ་དར་གྱིས་བཀླུབས་པའི་སེམས་པ་ཁྱོད།།
སྐབས་འགར་ངན་སོང་གསུམ་གྱི་ཁམས་སུ་འཕེན།།
སྐབས་རེར་བདེ་འགྲོའི་གནས་ལ་ཤུགས་ཀྱིས་འཐེན།།
མི་འདོད་འཁོར་བའི་གྲོང་ལ་ཡང་ཡང་འཁྲིད།།
ལུས་ཅན་གྲངས་མེད་བསླུ་བའི་སེམས་པ་ཁྱོད།།
ལུས་ཀྱི་མགྲོན་པོ་རྣམ་ཤེས་འཁྱམ་པོ་དེས།།
ལུས་ཅན་ཚེ་ཡི་ཕྲེང་ཐག་མ་ཆད་བར།།
ལུས་པོ་ཉིན་མཚན་གཡོག་ཏུ་བཀོལ་བ་དང་།།
ལུས་ཀུན་བྲན་དུ་བསྐུལ་བའི་སེམས་པ་ཁྱོད།།
