ལོ་རིམ་དགུ་པའི་སློབ་གཉེར་བ། རྡོ་རྗེ་རྣམ་རྒྱལ།
སྒེའུ་ཁུང་ཤེལ་གྱིས་བརྒྱན་པའི་ཁང་མིག་གྲུ་བཞི་དེའི་ནང་རྩོམ་དེབ་ཅིག་ཀློག་མུས་སུ་ཡོད་པ་ནི་གྲོགས་པོ་ཚེ་རྡོ་རེད། ཁོང་ནི་གྲོགས་པོ་ཚོས་འཁང་སེམས་འཆང་སའི་གཞི། སྙད་བརྐོ་བྱེད་སའི་ཡུལ། ཁ་མདའ་འཕེན་སའི་འབེན་ལྟ་བུར་གྱུར།
མ་གཞིར་ཚེ་རྡོ་ནི་མི་གཉོམ་ཆུང་ཞིག་རེད་ལ་གཤིས་རྒྱུད་མདའ་ལྟར་དྲང་ཞིང་བཟང་། སློབ་སྦྱོང་ལ་དོ་སྣང་ཆེ་བས་ཉིན་མཚན་དབྱེ་བ་མེད་པར་དེའི་ངང་ལ་ཁེར་རྐྱང་གིས་དུས་འདའ་བར་བྱེད། ཁོང་གི་གྲོགས་པོ་རྣམས་ནི་རྒྱུན་དུ་ཚོགས་པ་ཚོགས་ཆུང་རེ་འཚོགས་ནས་དུས་ཚོད་དོན་མེད་དུ་སྐྱེལ་གྱིན་ཡོད། རེས་གཟའ་པ་སངས་དགོང་མོར་ཚེ་རྡོའི་གྲོགས་པོ་རྣམས་ཀྱིས་ཚོགས་ཆུང་འཚོགས་པའི་གྲོས་ཆོད་ལ་རེས་གཟའ་ཉི་མའི་ཞོགས་པར་ཁ་ལག་ཁུར་ནས་ཐུགས་སྤྲོར་འགྲོ་རྒྱུའི་ཐག་གཅོད་བྱུང་སྟེ་ཚེ་རྡོའང་མཉམ་དུ་འཁྲིད་པའི་ཁ་འཆམ་ནས་ཁོང་ལ་བཤད་མོད། འོན་ཀྱང་ཚེ་རྡོས་གྲོགས་པོ་རྣམས་ལ་”ཁྱེད་རང་ཚོ་ཁོང་ཁྲོ་མ་ལངས་རོགས། ང་ལ་ལས་ཀ་གལ་ཆེན་ཡོད་པས་འགྲོ་ཁོམ་མི་འདུག་”ཅེས་ལབ་སྟེ་འགྲོ་རྒྱུའི་ཁས་གཏན་ནས་མ་བླངས།
དོན་དུ་ཚེ་རྡོའི་ལས་ཀ་ནི་རྩོམ་དེབ་བཀླག་རྒྱུ་དང་ལས་བྱ་སོགས་བྲི་བ་ལས་ཅི་ཞིག་ཡོད། ཐ་ན་བཀྲེས་གདུང་སེལ་བའི་ལྟོ་ཡང་མི་དྲན་པའི་མིས་ཐུགས་སྤྲོ་ལ་འགྲོ་བར་ཁས་ལེན་སྲིད་དམ།
གྲོགས་པོ་རྣམས་ཀྱིས་ཅུང་མ་རངས་པའི་ཚུལ་གྱིས་”གུང་སེང་སྐབས་ལས་ཀ་ཡོད་ཟེར་མཁན་ཁྱོད་གཅིག་པུ་ལས་མཐོང་མ་སོང་”ཟེར་ཡང་། དོན་ངོ་མ་ཁོང་ཚོ་འགྲོ་རྒྱུའི་ཐུགས་སྤྲོ་ཡང་གུང་སེང་སྐབས་ཀྱི་ལས་ཀ་ཅི་སྟེ་མིན། ད་དུང་གྲོགས་པོ་རྣམས་ཀྱིས་ཨུ་ཚུགས་ཀྱིས་འཁྲིད་ཐབས་བྱས་ཏེ་”ཁྱེད་ལ་ལས་ཀ་ག་རེ་ཡོད་ང་ཚོར་ཤོད་དང་”ཞེས་སྨྲས་ཀྱང་དེ་ནི་ཚེ་རྡོའི་ཁ་ནས་ཐོན་ག་ལ་སྲིད། དེར་བརྟེན་གྲོགས་པོ་རྣམས་ཡིད་མ་ཆེས་པ་ལའང་ཁག་ཅི་ཡོད།
རེས་གཟའ་སྤེན་པའི་སྔ་དྲོར་བརྟན་པ་དང་བསྟན་རྡོས་སྒོར་ལྔ་བརྒྱ་རེ་བསྡུ་བའི་འགོ་ཚུགས། སྐབས་དེར་སངས་གྲགས་དང་ཨོ་རྡོ་སོགས་གྲོགས་པོ་ཁ་ཤས་ལ་ནི་ཞོགས་ཇ་བཏུང་བའི་སྒོར་བཅུ་ཡང་གདོན་རྒྱུ་མེད་ན་སྒོར་ལྔ་བརྒྱ་ནི་སྨོས་མ་དགོས་པས་རང་དབང་མེད་པར་སེམས་ཁྲལ་གྱི་ཁུར་བོ་ལྗིད་ཏིག་ཏིག་གིས་མནན་ནས་འདུག་བཟོད་མེད་པར་བཟོས། ཡིན་ནའང་མེད་མཁན་ཚོར་བརྟན་པས་སྦྱིན་བདག་བཏང་བས་གཞི་ནས་སངས་གྲགས་སོགས་སེམས་ཁྲལ་གྱི་གདུང་བ་སངས་ཏེ་བཞིན་རས་ལས་དགའ་བའི་འཛུམ་མདངས་ཤིག་མངོན་འོང་།
འོད་སྟོང་འབར་བའི་ཉི་མ་གཞོན་ནུ་ཡང་ན་ཚོད་རྒས་ནས་དམར་སི་ལིར་གྱུར་པའི་ཕྱི་དྲོར་བརྟན་པ་དང་བསྟན་རྡོས་འབྲས་དང་སྔོ་ཚལ་རིགས་རྣམས་ཉོས་ནས་སླེབས། དེའི་དགོང་མོར་ཐུགས་སྤྲོའི་གྲ་སྒྲིག་གི་ལས་ཀ་ནི་ཡོངས་རྫོགས་ཁོང་རྣམས་ལས་ན་ཚོད་རྒན་པ་ཇོ་ཇོ་ཨོ་རྡོའི་ཕྲག་པར་བབས་པ་རེད།
སྣང་བ་ཐམས་ཅད་ཡིབ་ནས་ཅི་ཞིག་ལ་གང་ཞིག་བྱེད་དུ་བྲོས་ཚར་མ་ཐག་མུན་ནག་གི་ཚོགས་རྣམས་སྒེག་ཉམས་དོད་པོས་བྲེལ་འཚུབ་ངང་འོངས་ཏེ་ས་གཞི་ཐམས་ཅད་ལ་གཡོགས་ཟིན། དེར་བརྟེན་འདྲེན་བྱེད་ལ་ནམ་མཁའི་སྐར་ཚོགས་ཁྲ་ཆིལ་ཆིལ་ལས་ཐམས་ཅད་མཐོང་ལམ་ལས་ཡོངས་སུ་འདས། གྲང་ཞིང་བསིལ་བའི་དྲི་བཞོན་ཡང་དལ་བུའི་ངང་རྒྱུ་བཞིན་ཡོད་སྟབས་ལུས་པོ་ལ་རེག་དུས་བདེ་བ་རེ་སྟེར་འོང་། མི་སྐད་དང་ཁྱི་སྐད་ཡོད་ཚད་འཇམ་ཐིང་ངེར་གྱུར་པ་ལ་བལྟས་ན་ཐམས་ཅད་གཉིད་ཀྱི་ཞིང་ཁམས་ལ་ཉུལ་ཟིན་པའི་ནམ་གུང་ཡིན་པ་ཤེས་ཐུབ། ཟླ་བའི་དཀྱིལ་འཁོར་དང་མཚུངས་པའི་གདོང་མདོག་དེ་ཡང་འགྱུར་ཏེ་དམར་ཐིང་ཐིང་ཆགས་པའི་ངོས་ནས་རྔུལ་ཆུའི་ཐིགས་པ་བཞུར་ནའང་ད་དུང་རྔོ་ཟས་རིགས་རྣམས་བརྔོས་དང་རྔོ་མུས་སུ་ཡོད་པ་ནི་ཇོ་ཇོ་ཨོ་རྡོ་རེད། ཁོང་ནི་དེ་ལྟ་བུའི་ཐུགས་སྤྲོ་སོགས་ལ་ཆས་པར་དགའ་མཁན་ཞིག་མིན་ཀྱང་སེམས་ཆུང་དྲགས་པས་གྲོགས་པོ་ཚོ་དང་མ་བསྟུན་ན་ཁོང་ཁྲོ་ལང་བར་དོགས་ནས་འགྲོ་རྒྱུ་བྱས། སྐབས་རེར་ཁོང་གི་ཁ་མཆུའི་གཡོ་འགུལ་ལས་”ལས་ཀ་མེད་ས་ལ་དོན་མེད་ཀྱི་ལས་ཀ་བཙལ་ནས་དཀའ་ལས་འདུག་”ཅེས་ཁེར་ལབ་བྱེད། འདི་ནི་ཇི་འདྲའི་འུ་ཐུག་པའི་སྐད་ཆ་ཞིག་རེད་ཨང་།
གྲོགས་པོ་རྣམས་ནི་སྔུར་སྒྲ་དང་སྦྲགས་ཏེ་གཉིད་དུ་ཡུར་ཟིན་ལ། དེའི་ནང་ནས་ཀྱང་གྲོགས་པོ་བསམ་གཏན་སོགས་ཁ་ཤས་ནི་ལས་ཀ་ལ་སྤྲོ་བ་ཁྱོན་ནས་མེད་མཁན་ཞིག་ཡིན་པས་ཐམས་ཅད་ཀྱི་སྔུན་དུ་རྨི་ལམ་གྱི་དགའ་སྟོན་ལ་ཕྱིན་ཚར་བ་རེད། ཇོ་ཇོ་ཁོང་ཡང་ཉལ་སྙིང་འདོད་ཀྱང་ལས་ཀ་ད་དུང་ཚར་མེད་པས་མ་འདུག་རང་འདུག་ཆགས། ནམ་རྒྱུན་ཇོ་ཨོ་རྡོ་ཆུ་ཚོད་དགུ་དང་ཕྱེད་ཀའི་ཐོག་ལ་ཉལ་གྱི་ཡོད་ནའང་དེ་རིང་ཆུ་ཚོད་བཅུ་གཅིག་ཟིན་ལ་ཉེ་ཡང་ཉལ་རྒྱུའི་གོ་སྐབས་རག་མེད། ཇོ་ཇོ་མདང་དགོང་ཐམས་ཅད་ལས་འཕྱི་བོ་ཉལ་ནའང་སང་ནངས་པར་སུ་བས་སྔོན་ལ་ལངས་ཏེ་འགན་འཁུར་མཁན་ཡང་ཇོ་ཇོ་གཅིག་པུ་ལས་སུ་ཞིག་ཡོད། ཇོ་ཇོ་ཆུ་ཚོད་ལྔ་པ་ཡོལ་བ་དང་ཡར་ལངས་ནས་མདང་ནུབ་ལས་མ་ཚར་བའི་ལས་ཀ་རྣམས་མཇུག་མཐུད་དེ་བྱེད། གྲོགས་པོ་གཞན་རྣམས་ནི་ད་དུང་གཉིད་ཀྱི་ཞིང་ཁམས་སུ་བདེ་སྐྱིད་ཀྱི་དཔལ་ལ་རོལ་བཞིན་ཡོད་པས་ཁུ་སིམ་མེར་རེད་ལ། ས་གཞིའི་སྟེང་གི་ཡོད་དོ་ཅོག་ཀྱང་གཉིད་དུ་ཡུར་བ་ལས་མ་འདས་པས་དེ་བས་འཇམ་ཐིང་ཐིང་དང་ཁ་ཁུ་སིམ་སིམ་རེད།
རིན་གྱིས་ཉོ་ཐབས་མེད་པའི་དུས་ཚོད་ནི་སྐར་ཆ་རེ་རེ་བཞིན་ཕར་ཕར་འདས་ནས་ཞོགས་པའི་གྲང་རླུང་ཡང་ཇེ་ཆེ་ལ་གྱུར་པ་མ་ཟད་སྨུག་པས་ས་གཞི་ཐམས་ཅད་ལ་གཡོགས་ཟིན། རིམ་བཞིན་མཁའ་དབྱིངས་སྔོ་སིང་ངེ་བ་ཡང་མཐོང་ལམ་གྱི་ཡུལ་དུ་གྱུར། “ཇོ་ཞོགས་པ་སྔ་པོ་ནས་ལངས་པ་ཡིན་ནམ་”ཞེས་ཆ་རྒྱུས་ཡོད་པའི་མི་སྐད་གསལ་བ་ཞིག་ཇོ་ཇོའི་ཐོས་འཛིན་དབང་པོའི་བུ་གར་རྒྱུ་བ་ནི་ཚེ་ནོར་གྱི་ངག་ལམ་ནས་བྱུང་བའི་སྒྲ་རེད། “མིན་མིན། ད་ལྟ་རང་ལངས་མ་ཐག་ཡིན་”ཟེར་ནའང་ཁོང་གིས་ལས་བཞག་པའི་བྱས་རྗེས་མང་པོ་ཞིག་མིག་ལ་མངོན་སུམ་དུ་གསལ་གསལ་རིག་རིག་ལ་ཡོད་པས་སུས་ཡིད་ཆེས་བྱེད། ཇོ་ཇོ་དང་ཚེ་ནོར་གྱིས་རུབས་བརྒྱབ་སྟེ་གྲ་སྒྲིག་ཚར་བ་དང་གྲོགས་པོ་རྣམས་གཅིག་རྗེས་གཉིས་མཐུད་ཀྱིས་ལངས་བྱུང་བས་མཉམ་དུ་ཞོགས་ལྟོར་རོལ།
ཤར་རིའི་རྩེ་མོ་ནས་འོད་སྟོང་རབ་ཏུ་འབར་བའི་ཞོགས་པའི་ཉི་གཞོན་དེ་སེར་ལམ་ལམ་འཆར་ཡོང་བ་དེས། ཁོང་རྣམས་འགྲོ་རན་པའི་སྔོན་བརྡ་བཏང་བ་དང་ཀུན་ནས་མཚུངས། ཅང་མ་འགོར་བར་ཁོང་རྣམས་ཀྱི་རྒྱབ་ལ་ལྟོ་དང་ཚོད་མ། རྩེད་ཆས་བླུག་སའི་ཁུག་མ་རེ་རེ་ཁུར་ནས་སྒོ་ཁྱམས་ལ་ཐོན་པར་བལྟས་ན་འགྲོ་བའི་དངོས་གཞི་འགོ་ཚུགས་པ་འདྲ། བརྟན་པས་ཁ་སང་ནས་གླས་ཡོད་པའི་རླངས་འཁོར་ནང་དུ་ཞུགས་ནས་ཡུད་ཙམ་ལ་ཁ་ལོ་བས་མཛེས་ཤིང་སྔོ་ལྗང་ལྡེམ་པའི་ལྗོན་ཤིང་སྣ་ཚོགས་ཀྱིས་བསྐོར་བའི་རྩྭ་ཐང་ཆུང་ཆུང་དེར་བསྐྱལ། དེ་ནི་སྐྱེ་བོ་ཀུན་ཀྱིས་དགའ་མོས་བྱེད་ས་རེད། སློབ་གྲྭ་ནས་ལེ་དབར་གསུམ་ཙམ་གྱི་ས་ན་ཡོད། ཇོ་ཨོ་རྡོ་ལས་གཞན་ཚང་མ་རྩེད་མོའི་རིགས་ལ་སྤྲོ་བ་ཡོད་མཁན་ཡིན་གཤིས་རླངས་འཁོར་ནས་བབས་མ་ཐག་རྩྭ་ཐང་ཡིད་འཕྲོག་ལྷ་མོའི་སྟེང་དུ་རྐང་རྩེད་སྤོ་ལོ་རྩེ་བར་གོམ་ཁ་བསྒྱུར། ཇོ་ཇོས་ལྟོ་ཁུག་རྣམས་ཕྱོགས་གཅིག་ཏུ་ལེགས་པར་སྤུངས་ཏེ་ཤིང་སྡོང་འོག་གི་གྲིབ་བསིལ་ནས་གྲོགས་པོ་རྣམས་ཀྱི་རྩེད་མོ་ལ་ལྟ་བཞིན་འདུག
ཨ་ཙི་དུས་ཚོད་ཀྱི་གོམ་འགྲོས་ནི་ཇི་འདྲའི་མགྱོགས་པ་ལ་ཨང་། ཡུད་ཙམ་ལ་ཉིན་གུང་ཆུ་ཚོད་བཅུ་གཉིས་ཡོལ་ཚར་འདུག རྩེད་མོ་བརྩེ་རྒྱུ་རག་ན་ཁ་ལག་མི་དྲན་པའི་གྲོགས་པོ་ཚོ་ལ་བལྟས་ནས་ཇོ་ཨོ་རྡོས་འདང་ཞིག་བརྒྱབ་སྟེ་”ད་ཁ་ལག་བཟའ་རྒྱུ་ཡིན་རྩེད་མོ་མཚམས་འཇོག་བྱེད་རོགས་”ཞེས་བརྗོད་པ་ལ་བསམས་ན་ཇོ་ལགས་གྲོད་ཁོག་ལྟོགས་ཡོད་པ་འདྲ། གྲོགས་པོ་རྣམས་ཀྱང་གཞི་ནས་ལྟོ་དྲན་པ་འདྲ། རྩེ་མཚམས་ལམ་སེང་བཞག་ནས་ལག་པ་སོགས་བཀྲུས་པ་དང་ལྗོན་ཤིང་འོག་གི་བསིལ་གྲིབ་ལ་འཚངས་ནས་འདྲུད་ལྷམ་ཨོང་སྟེགས་སུ་བྱས་ཏེ་བསྡད། ཇོ་ཇོ་ཨོ་རྡོ་དང་ཚེ་ནོར་གྱིས་ཁུག་མ་ལས་ལྟོ་དང་ཚོད་མ་སོགས་ཕྲེང་རྡོག་བགྲང་བ་ལྟར་གཅིག་རྗེས་གཉིས་མཐུད་ཀྱིས་བཏོན་ཅིང་གྲོགས་པོ་རྣམས་ཀྱིས་བསྐོར་བའི་དཀྱིལ་གྱི་ས་སྟོང་དེར་བྲེལ་འཚུབ་ངང་བཞག ཁོང་རྣམས་ཀྱིས་སོ་སོའི་ཟ་འདོད་དང་བསྟུན་ཤོག་བུ་ལས་བཟོས་པའི་ཕོར་པའི་ནང་ལྟོ་དང་ཚོད་མའི་རི་ཆུང་རེ་བལྟས་བལྟས་རིག་རིག་ལ་སྤུངས་སོང་། སངས་གྲགས་ལངས་ཏེ་པར་རྒྱག་དུས་གྲོགས་པོ་ཚང་མས་སངས་གྲགས་ཀྱི་ལག་ཟུང་མདུན་དུ་བསྲིངས་ཏེ་བཟུང་བའི་ཁ་པར་ལས་ཅི་ཞིག་འོང་དོགས་ཀྱིས་ཅེར་བཞིན་པའི་མོད་ལ་ཚག་སྒྲ་དང་སྦྲགས་གློག་འོད་ཁ་ཤས་འཁྱུགས་མ་ཐག་སངས་གྲགས་ས་ལ་བྲེལ་གྱིས་བསྡད་དེ་ཟ་འགོ་ཚུགས། ཟ་འཐུང་གི་ཞོར་ལ་གྲོགས་པོ་ཚེ་རྡོ་ལ་ཁ་གཏོང་བའི་འགོ་ཡང་བརྩམས་ཚར། ཁོང་ཚོས་གྲོད་ཁོག་རྒྱགས་ཚད་རེ་བཟས་ནས་ཁ་ཤས་ཁ་པར་ལ་མགོ་བོ་འཁོར་ནས་བསྡད། ཁ་ཤས་སྐད་ཆ་ཤོད་ཀྱིན་འདུག འགའ་ཞིག་ནི་གསེར་སྐྱེམས་ངར་མ་ཉོ་རུ་ཕྱིན། གསེར་སྐྱེམས་ལ་དགའ་མཁན་ཚོས་རྫིག་མདོག་ཁ་པོས་”ཐུགས་སྤྲོའི་སྐབས་གསེར་སྐྱེམས་བཏུང་རྒྱུ་མེད་ན་ཐུགས་སྤྲོ་མ་རེད་ཟེར་” དུས་ཡུན་ཅུང་ཙམ་གྱི་རྗེས་ལ་ཁ་ཤས་ནི་ཉིན་མོ་དང་མཚན་མོ་དབྱེ་འབྱེད་མི་ཤེས་པ་གྱུར་ཚར།
ད་ནི་ཁོང་ཚོས་ཞབས་བྲོ་འཁྲབ་འགོ་བཙུགས། ཇོ་ཨོ་རྡོ་ནི་དེ་འདྲའི་རིགས་ལ་སྤྲོ་བ་མེད་པས་ད་དུང་ཉོབ་སྣང་སྐྱེས་བསྡད་ཡོད། དེ་ལྟར་ཉིན་གང་ཧ་ཧ་ཧི་ཧི་དང་དགའ་དགའ་སྤྲོ་སྤྲོ་བྱས་ནས་བཟའ་བཏུང་དང་རྩེད་མོར་རོལ་ཏེ་གསེར་སྲང་བརྒྱས་ཁུག་པར་མི་ནུས་པའི་དུས་ཚོད་ཆུད་ཟོས་སུ་བཏང་བ་མ་ཚོར་ནའང་། དགོང་མོ་ནང་ལ་སླེབས་དུས་ལས་བྱ་བྲི་རྒྱུ་དང་བློ་འཛིན་བྱ་རྒྱུ་མང་པོ་ཞིག་ལྷག་ཡོད་པ་ཚོར་དུས་དགེ་རྒན་གྱི་བཀའ་བཀྱོན་དང་ཞལ་རས་ཁྲོ་གཉེར་ཅན་མ་ཡིད་ལ་གསལ་ཏ་ལེར་དྲན་པས་འཇིགས་སྣང་དང་དངངས་སྐྲག་གིས་ལུས་པོའི་ནང་གི་ཁོང་སྙིང་འཕར་ལྡིང་མི་བྱེད་མཁན་ནི་སུ་ཞིག་ཡོད།
ཇོ་ཨོ་རྡོས་འདང་ཞིག་རྒྱག་པའི་མོད་ལ་གྲོགས་པོ་རྣམས་དང་འགྲོགས་ཡུན་རིང་ན་སློབ་སྦྱོང་ལ་རྗེས་ལུས་དང་གྱོང་རྒུད་ལས་ཅི་ཡང་མེད་པར་ཤེས་པ་དང་སེམས་ཀྱི་མེ་ལོང་དྭངས་མའི་ངོས་སུ་སྙིང་མཐུན་གྱི་གྲོགས་པོ་ནི་སློབ་སྦྱོང་གི་དུས་སུ་འགལ་རྐྱེན་ཆེ་ཤོས་ཤིག་ཡིན་པ་ཝ་ལེར་ཤར་བས་གྲོགས་པོ་ཚེ་རྡོ་ལ་རང་དབང་མེད་པར་ཡིད་སྨོན་རེ་འཆོར་འོང་།
