རྫ་སྐྱེས་ཕུར་པ། (བལ་ཡུལ།)
མཁར་ཁང་མཐོ་བརྩེགས་ཟླ་བའི་དབྱིངས་སུ་ཤར།།
ལམ་ཐོག་གཞིས་ཁུལ་སྟོན་ཁའི་མཛེས་སྡུག་བརྒྱན།།
ངེད་ཅག་མདུན་གྱི་རི་ཚོགས་དེར་བལྟས་ནས།།
མཐོང་སྣང་མང་པོ་རྙེད་པའི་རེ་བ་བྱས།།
ཆུ་སྤྲིན་ལངས་ཤིང་སྨུག་པ་ཕྱོགས་གཅིག་འདུས།།
རི་ལྗོངས་རྣམས་སུ་དར་དཀར་གཡོག་པ་བཞིན།།
ཅུང་ཙམ་མཁའ་མཐར་འོད་དམར་དཀྲིས་པ་ན།།
རི་ལྗོངས་དེ་ནི་སྔར་ལས་མཛེས་པར་གྱུར།།
ཐང་ཤིང་རྣམས་ཀྱིས་རི་བོའི་ཕྱོགས་ཀུན་བཟུང་།།
ཇ་ཡུན་གཅིག་རིང་བྱེའུ་སྐད་སྣ་ཚོགས་བརྗེ།།
པར་ཆས་འཐེན་ཤེལ་དེ་ཕྱོགས་གཏད་མ་ཐག།
སྨུག་སྤྲིན་ཐང་ལ་ལྷུང་བའི་ཉམས་ཤིག་མངོན།།
སེང་ལྡེང་ནགས་ཀྱི་ཕ་མཐའ་ཟིན་པར་དཀའ།།
གྲོང་ཞིང་རྣམས་ནི་ཉི་འོད་ན་བཟས་བཀླུབས།།
དེ་མིན་རི་བྱེའུ་རྣམས་ཀྱི་སྐད་འགྱུར་ཡང་།།
ནགས་ཁྲོད་དབེན་པའི་ཕྱོགས་ལ་འབབ་པར་བྲེལ།།
ཨེ་མ་ལན་གཅིག་འདི་རུ་བསྐྱོད་པ་ནི།།
ལྷ་ཡི་རྨི་ལམ་མངོན་གྱུར་བྱས་དང་མཚུངས།།
གཡང་ཊི་དཀར་པོའི་བུམ་པ་བདག་ལ་གཏད།།
མདང་གི་རྨི་ལམ་གྲོགས་པོ་བརྗེད་དུ་མེད།།
ངེས་པར་འདི་ནས་འཆར་སྒོའི་མེ་ལོང་ནང་།།
སྣང་བའི་འགྱུར་བ་མང་དུ་ཤོང་བར་འདུག།
“དབྱངས་ཀྱིས་མགྲིན་པ་མཛེས་པའི་སྙན་ངག་མཁན།།
ཟམ་མི་ཆད་དུ་བྱུང་”བའི་གཏམ་ཞིག་གྲགས།།
༢༠༢༠/༡༡/༡༨
