ལོ་རིམ་ལྔ་པའི་སློབ་གཉེར་བ། འཇིགས་མེད་རྣམ་རྒྱལ།
དཀར་གསལ་འོད་ཀྱིས་དབེན་པའི་བྲག་ཕུག་ཏུ།།
གོས་དཀར་ལྕང་ལོ་ཅན་གྱི་སྔགས་པའི་ཁྱུ།།
ཆེ་ཆུང་གོང་འོག་རིམ་གྱིས་གྲལ་བསྟར་ནས།།
མི་གཡོའི་བསམ་གཏན་ངང་དུ་བཞུགས་པ་གང་།།
རྩེ་མོ་གནམ་ལ་ཟུག་པའི་བྲག་རིའི་སྟེང་།།
རིང་ཐུང་མཉམ་པའི་ནགས་ཚལ་སྟུག་པོ་དག།
དུས་བཟང་ཉིན་མོར་བཤམས་ནས་གཏུབས་གྱུར་ཀྱང་།།
ཡུན་རིང་མི་ཐོགས་སྔར་བཞིན་འཕེལ་མཁན་ཅི།།
དུས་བཞིར་འགྱུར་ལྡོག་དབེན་པའི་ས་ཕྱོགས་ཀྱི།།
སྔོ་ལྗང་ཅན་གྱི་རྩྭ་ཐང་དཀྱིལ་དེ་ན།།
གྲོགས་མེད་ཁེར་རྐྱང་ལུས་པའི་གཡག་རྒོད་གཅིག།
མགོ་བོ་གུག་གུག་བྱེད་པའི་རྩྭ་ཟན་གང་།།
བྱིས་པ་སྤུན་གསུམ་གླིང་ཕྲན་བཅུ་གཉིས་སུ།།
ཉིན་མཚན་སྐོར་བ་བྱེད་ཚུལ་དེར་བལྟས་ན།།
ཐ་ཆུང་དེ་ཡིས་འབྲིང་པོའི་སྣེ་འཁྲིད་བཞིན།།
བར་མས་ཆེ་ཤོས་འཁྲིད་ནས་རྒྱུ་བ་ཅི།།
རིག་རྒྱུ་མེད་པའི་གཟུགས་མེད་མཚོན་ཆ་དེ།།
རྣོ་ངར་མེད་ཀྱང་ཕ་རོལ་དགྲ་བོ་ཡི།།
སྟེང་དུ་འཕེན་ཐེངས་རེ་ལ་སྙིང་ཆུང་གི།
ཞེ་རྩ་འགག་ལ་ཁད་དུ་གཏོང་མཁན་གང་།།
འདྲེན་བྱེད་དབང་པོས་གཟུང་བྱ་མ་ཡིན་གྱི།།
ལུས་ལ་རེག་ཚུལ་ཁོ་ནས་བརྟགས་གྱུར་ན།།
གོ་ལ་ཧྲིལ་པོར་ཁྱོད་ལས་མཐུ་སྟོབས་ཅན།།
གཞན་དུ་མེད་པའི་ཁོ་ཐག་ཆོད་ཐུབ་ཅི།།
རྩྭ་ཡིས་ཁྱབ་པའི་སྤང་གཤོངས་ངོས་གཉིས་སུ།།
རྫི་བོས་ལུ་གུ་སྤུན་ཟུང་བདས་ནས་འཁྱེར།།
ལས་ཀྱི་དབང་གིས་སོ་སོར་བྲལ་བ་ལས།།
ཡུད་ཙམ་འཕྲད་པའི་སྐལ་བ་མེད་དོན་གང་།།
ཡུན་རིང་དུས་ནས་རང་གི་དམིགས་ཡུལ་དེར།།
ཇི་ཙམ་བུད་ཀྱང་འབྱོར་རྒྱུའི་སྐལ་བ་དབེན།།
མཐའ་མར་སྐྱོད་སྐྱོད་ངང་དུ་རང་ཉིད་ཀྱི།།
ལུས་ཟུངས་ཟད་དེ་རླུང་དང་འདྲེས་པ་ཅི།།
གོང་གི་གབ་ཚིག་རྣམས་རེ་རེ་ནས་ངོས་འཛིན་གནང་ཐུབ་མཁན་རྣམས་ཀྱི་མཚན་ ༢༠༢༢ ལོའི་པདྨའི་རང་མདངས་འདོན་ཐེངས་སྔ་མའི་ནང་དགོད་རྒྱུ་དང་། མི་གྲངས་གསུམ་ལ་དུས་དེབ་པདྨའི་རང་མདངས་འདོན་ཐེངས་སྔ་མ་རེ་བྱ་དགའ་རུ་དབུལ་རྒྱུ་ལགས་ན། གབ་ལན་རྣམས་ ༢༠༢༢ བོད་ཟླ་ ༠༤ ཚེས་ ༡༥ ལས་མ་འགྱངས་བར་སྔ་འགྱུར་རིག་མཛོད་རྩོམ་སྒྲིག་ལྷན་ཁང་དུ་བསྐུར་གནང་ཡོད་པར་ཞུ།
