དབང་འདུས། འཛིན་རིམ་བརྒྱད་པ།
འཆི་མེད་ལྷ་ཡི་ཡུལ་ནས་མ་འཕོས་ཀྱང་།།
དེར་གནས་ལྷ་མོའི་འཇོ་སྒེག་དཔལ་ཡོན་ཀུན།།
འཕྲོག་པར་ནུས་པའི་ཁོ་བོའི་གཞོན་ནུ་མ།།
དེ་རིང་དྲན་པའི་གཏམ་ཞིག་འབྲི་བར་འདོད།།
མཚོ་བྱུང་ལྷ་མོའི་ཐུགས་ནས་མ་བྱུང་ཞིང་།།
མཛེས་སྡུག་པདྨའི་སྦུབས་ནས་མ་བལྟམས་ཀྱང་།།
འཇིག་རྟེན་སྐྱེ་བོ་ཀུན་ཀྱི་རྒྱན་གྱུར་པའི།།
ཡིད་འོང་ལྷ་མོ་ཁོ་བོའི་སེམས་ལ་དྲན།།
འཇམ་མཉེན་བཞིན་རས་ལི་ཁྲིའི་ཐིག་ལེ་ངོས།།
རབ་མཛེས་ལྟ་ན་སྡུག་པའི་དཀྱུས་རིང་གིས།།
སྐྱེ་བོ་ཀུན་ཀྱི་ཡིད་ལ་བདེ་སྟེར་བའི།།
ཡིད་འོང་ལྷ་མོ་ཁོ་བོའི་སེམས་ལ་དྲན།།
རྨད་བྱུང་མཚར་སྡུག་ལང་ཚོ་རྫོགས་པ་དང་།།
སྙན་འཇེབས་དབྱངས་ཀྱིས་ཀུན་ཡིད་འགུཌ་ནུས་པའི།།
ཆ་ཤས་ཡོན་ཏན་ལྷ་ཡི་རྗེས་ཆགས་པ།།
ཡིད་འོང་ལྷ་མོ་ཁོ་བོའི་སེམས་ལ་དྲན།།
མཛེས་པས་ཙམ་མིན་དབྱངས་སྙན་ཁོ་ནས་མིན།།
བློ་ལྡན་ཤེས་རབ་མངའ་བས་ཀྱང་མིན་པར།།
ཡོན་ཏན་ཀུན་ཀྱིས་དབྱངས་ཅན་རྗེས་བསྙེགས་པའི།།
ཡིད་འོང་ལྷ་མོ་ཁོ་བོའི་སེམས་ལ་དྲན།།
སུམ་རྩེན་རྒྱལ་པོར་མིག་གི་བདུད་རྩི་དང་།།
ས་སྐྱོང་བདག་པོར་ཐུགས་ཀྱི་གཅེས་པའི་ནོར།།
རྣལ་འབྱོར་དམ་པར་ལམ་གྱི་གྲོགས་གྱུར་པའི།།
ཡིད་འོང་ལྷ་མོ་ཁོ་བོའི་སེམས་ལ་དྲན།།
རབ་དྭངས་རྣམ་པར་བཀྲ་བའི་ཆུ་གཏེར་དང་།།
མཛེས་སྡུག་རྩེ་རུ་སོན་པའི་ཆུ་སྐྱེས་དག།
སྐྱེངས་ཏེ་མི་མངོན་རྒྱབ་ཏུ་ཡིབ་འཇུག་པའི།།
ཡིད་འོང་ལྷ་མོ་ཁོ་བོའི་སེམས་ལ་དྲན།།
ན་གཞོན་ལང་ཚོའི་ཆར་ཟིམ་བབས་པ་ན།།
སེམས་མཐུན་འདྲིས་པའི་མེ་ཏོག་ལེགས་རྒྱས་ཏེ།།
བརྩེ་གདུང་མཚོ་ཡི་སྦུབས་ན་ལྷན་རོལ་བའི།།
ཡིད་འོང་ལྷ་མོ་ཁོ་བོའི་སེམས་ལ་དྲན།།
མདོར་ན་ཡིད་འོང་གཞོན་ནུ་དབང་པོའི་གཞུ།།
ཁོ་བོའི་ཡིད་ཀྱི་མཁའ་ལ་ཤར་བ་ན།།
དྲན་གདུང་སྙིང་ནས་བབས་པའི་ཆར་ཐིགས་འགའ།།
ཤོག་དཀར་འཛིན་མའི་ཐང་ལ་ཅུང་ཟད་བཀྲམ།།
