ཀུན་གྲུབ་ཚེ་རིང་། དཔལ་ཡུལ་ནང་བསྟན་མཐོ་རིམ་སློབ་གྲྭ།
ཆར་གྱི་མེ་ཏོག་མཁའ་ནས་འཐོར་ཏེ་ལྗོན་པའི་འཁྲི་ཤིང་རབ་ཏུ་མཛེས།།
འདབ་མའི་ངོས་ཀྱི་ཟིལ་ཆུ་ཐིགས་པ་སྔོ་ལྗང་ལོ་མའི་ལུས་ལ་ཐིམ།།
ལང་ཚོ་གསར་པའི་རྩྭ་དང་རྩི་ཤིང་ལ་ལུང་ཀུན་ནས་གསར་དུ་བཞད།།
དཔྱིད་འཁྲུངས་མེ་ཏོག་མགོ་ལྕོག་ལྡེམ་པའི་བྱང་ཆུབ་དབེན་པའི་རི་ངོས་རྨད།།
སྨུག་པས་དཀྲིས་པའི་ས་འཛིན་བར་ནས་དྲི་ལྡན་བསིལ་རླུང་དལ་གྱིས་རྒྱུ།།
ལོ་མ་གཡོ་བའི་ལྗོན་པ་དེ་དག་ཆར་ཆུ་གཙང་མས་རབ་ཏུ་བརླན།།
དྲོ་འཇམ་ཉི་འོད་ནང་དུ་འཚོ་བའི་ཁམ་བུ་ཤིང་གི་སྡོང་པོ་ཡང་།།
སྟོན་འབྲས་ཀུ་ཤུ་ལུས་ལ་སྦྲུམ་སྟེ་འཁྲི་ཤིང་ཡལ་ག་གཡོ་བཞིན་གནས།།
པད་རྫོང་རི་བོས་སྨུག་སྤྲིན་གོས་གྱོན་དབུ་རྩེའི་ཤེལ་གྱི་བྲག་རི་ཡང་།།
སྟོང་ཁམས་སྤྲིན་པའི་འཇིག་རྟེན་བརྒལ་ཏེ་ཉི་ཟླའི་འོད་སྣང་རྣ་ཆ་བྱས།།
ཞི་བདེ་རྒྱ་མཚོ་རླངས་གཟུགས་གྱུར་ཏེ་རི་ཚོགས་དེ་ཡི་མགུལ་དུ་བསྐྱོད།།
ཨེ་མ་རྫ་སྤང་ནགས་ཀྱིས་བརྒྱན་པའི་སྲིད་པའི་ཀ་བ་བརྗིད་རེ་ཆེ།།
ལྷིང་འཇགས་ལྡན་པའི་སྦས་ཡུལ་ལུང་དེའི་ཉིན་ངོས་ལྗོན་པའི་ཚལ་གྱི་བར།།
གདན་རབས་མུ་ཏིག་ཕྲེང་བས་མཛེས་པའི་ཁམས་ཀྱི་ཆོས་སྡེ་བྱང་ཆུབ་གླིང་།།
བཤད་སྒྲུབ་ཉི་ཟླའི་འོད་སྣང་འཕྲོ་བཞིན་གྲགས་སྙན་ལྷ་ཡི་རྔ་བོ་ཆེ།།
ཧི་མཱ་ལ་ཡའི་རྒྱལ་ཁམས་བརྒལ་ནས་འཛམ་གླིང་ཡངས་པའི་ཁྱོན་དུ་ཁྱབ།།
མིས་བཟོས་ཀྱག་ཀྱོག་སྐས་ཐེམ་རྒྱུད་བཞིན་རི་བོ་དེ་ཡི་མགུལ་གྱི་མཚམས།།
སྔ་འགྱུར་རྙིང་མའི་གདན་ས་ཆེན་པོ་རྣམ་རྒྱལ་བྱང་ཆུབ་ཆོས་གླིང་གི།
ཕྱི་ནང་བཀོད་པའི་བཤད་སྒྲུབ་སྡེ་རྣམས་སྐབས་གསུམ་ཡུལ་ལ་འགྲན་བཞིན་དུ།།
དད་པའི་མེ་ཏོག་བཞད་པའི་ཡུལ་དེར་བསོད་ནམས་སྤྲིན་ཕུང་འདི་ཉིད་བྱུང་།།
རྒྱ་ཕིབས་འོད་སྣང་འཕྲོ་བའི་འོག་ནས་ཕྱོགས་མེད་འདུས་པའི་བསྟན་འཛིན་སྡེ།།
དྲི་ལྡན་མེ་ཏོག་རྒྱང་རིང་གནས་ཀྱང་བུང་བ་སྤྲིན་ལྟར་འདུས་པ་བཞིན།།
མ་བསྡུས་ངང་གིས་གནས་འདིར་འདུས་ཏེ་ལེགས་བཤད་ལྔ་ཟུང་སྐྱེད་ཚལ་ལ།།
ཉིན་མཚན་དབྱེར་མེད་བརྩོན་པས་རོལ་ཏེ་བཤད་སྒྲུབ་གསེར་གྱི་རྒྱལ་མཚན་སྒྲེང་།།
བསམ་གཏན་དབེན་པའི་རི་ཟུར་དེ་རུ་འདུས་སྡེའི་ཁྱུ་ཚོགས་འཛོམས་པའི་ནང་།།
སྙན་གྲགས་འདོད་པའི་མཁན་པོ་མེད་ལ་ཐོབ་འབྱོར་བརྩོན་པའི་བླ་མ་མེད།།
ཞི་བའི་གནས་ནས་མདོ་རྒྱུད་ཀློག་བཞིན་བས་མཐའི་ནགས་སུ་སྒོམ་པ་ཡི།།
བཤད་སྒྲུབ་བསྟན་པའི་སྙིང་པོ་སྐྱོང་བའི་རིག་པའི་དཔའ་བོ་ཁྱུ་གཅིག་ཡོད།།
ངུར་སྨྲིག་གོས་ཀྱི་མཚོ་མོ་འཁྱིལ་ཞིང་ཐོས་བརྩོན་དགའ་བའི་རྦ་རླབས་འཕྱོ།།
ཚུལ་ཁྲིམས་དྲི་བསུང་ཕྱོགས་ཀུན་ཁྱབ་སྟེ་འཆད་རྩོད་རྩོམ་གྱི་མེ་ཏོག་བཞད།།
ལུང་རིགས་འཛོམས་པའི་དགའ་ཚལ་དེ་ན་མང་ཐོས་སྦྲང་མའི་ཁྱུ་ཚོགས་འདུ།།
ཨེ་མ་སྦས་ཡུལ་བྱང་ཆུབ་གླིང་གི་ལྔ་རིག་སྐྱེད་ཚལ་ཡིད་རེ་སྤྲོ།།
དེ་ལྟར་དབེན་པའི་ནགས་ཀྱི་ཚལ་ནས་གཞུང་ལུགས་ཀློག་པའི་བསམ་གཏན་པས།།
མདོ་རྒྱུད་མན་ངག་གཞུང་གི་དོན་ལ་ཐོས་བསམ་སྒོམ་པའི་ཤེས་རབ་ཀྱིས།།
ལེགས་པར་དཔྱད་པའི་ངེས་ཤེས་ཟབ་མོས་སྔ་འགྱུར་ཐེག་པའི་ལྟ་གྲུབ་ཀུན།།
མ་ནོར་ལམ་བཟང་འགྲོ་ལ་སྟོན་བཞིན་མཚོ་སྐྱེས་རྒྱལ་བའི་བསྟན་པ་སྐྱོང་།།
རི་ཡི་རྩེ་དང་ལུང་པའི་འགྲམ་དུ་བསིལ་ཁང་མིས་བཟོས་སྐས་ལམ་གྱི།།
ཀྱག་ཀྱོག་དབྱིབས་དང་མཛེས་སྡུག་བཀོད་པས་ཚངས་པའི་གྲོང་ལ་འགྲན་བཞིན་དུ།།
ཁམས་ཕྱོགས་འབྲི་ཀློང་བཞུར་བའི་འགྲམ་གྱི་འོག་མིན་གཉིས་པའི་ཆོས་སྡེ་ཆེ།།
སྐལ་བཟང་འགྲོ་བའི་མིག་གི་དཔལ་དུ་ལྷ་ཚོགས་སྟོང་གིས་བསྐྲུན་མིན་ནམ།།
དད་པའི་ཕྱག་ཟུང་སྙིང་ལ་སྦྱར་བའི་མདོ་དབུས་ཡུལ་གྱི་གནས་མཇལ་དང་།།
གནའ་ཤུལ་རི་ཆུ་པར་དུ་ལེན་པའི་ཡུལ་སྐོར་མི་རིགས་སྣ་ཚོགས་ཀྱིས།།
དུས་བཞིའི་འགྱུར་ལྡོག་བརྒྱུད་རིམ་ཁྲོད་ནས་གྲགས་སྙན་འབར་བའི་ཆོས་སྡེ་དེར།།
ཞིབ་འཇུག་མཆོད་མཇལ་བཅར་འདྲི་བྱེད་བཞིན་རྐང་སེན་མེ་ཏོག་འཐོར་བཞིན་འདུག།
རྫ་བྲག་རི་བོའི་མགུལ་ནས་བཞུར་བའི་ནགས་ཚལ་གསེང་གི་ཆུ་ཕྲན་གྱིས།།
ཨ་མྱེ་རྒས་པོའི་སེམས་ཀྱིས་བསྐྲུན་པའི་ཆུ་འཁོར་མ་ཎི་སྐོར་བཞིན་དུ།།
དྭངས་བསིལ་ཟིལ་ཆུའི་མེ་ཏོག་མཆོད་བཞིན་བསམ་གཏན་དབེན་པའི་དགོན་ཟུར་ནས།།
རྒྱང་རིང་རྩྭ་ཐང་རི་ལུང་མང་པོར་ཉལ་བའི་འགྲོས་ཀྱིས་རྒལ་བཞིན་འདུག།
མཐའ་མེད་སྟོང་ཁམས་དབྱིངས་ནས་ཆས་པའི་གཟུགས་མེད་རླུང་གི་རྟ་མཆོག་དེས།།
དད་པས་བཟོས་པའི་དར་ལྕོག་དེ་ཡི་ཁ་ལྕེ་ཁྲི་སྟོང་རྡེབ་བཞིན་དུ།།
ཡི་གེ་དྲུག་མའི་ཆོས་ཀྱི་སྒྲ་དབྱངས་སྲིད་པའི་སྒང་ནས་འཁྱེར་བཞིན་དུ།།
མེ་ཏོག་ལྡན་པའི་རི་སུལ་དེ་ནས་སྤྲིན་པའི་འཇིག་རྟེན་བཏུལ་ཏེ་ཆས།།
ཞོགས་རླུང་ཁྲོད་ནས་ལྷ་ཁང་འོག་གི་དྲིལ་བུའི་སིལ་སྒྲ་སྙན་པ་དང་།།
ཏིང་ཏིང་དབྱངས་ཀྱིས་རྨི་ལམ་འཇིག་རྟེན་སྟོང་པའི་དབྱིངས་སུ་བསྐྱལ་ནས་སུ།།
འོད་སྣང་ལྡན་པའི་མདུན་ལམ་འཚོལ་བའི་རིགས་མཐུན་འདུས་པའི་ཆོས་གྲོགས་རྣམས།།
གནས་ལྔ་རིག་པའི་ཐང་ཆེན་སྐྱོད་བཞིན་སྣང་སྲིད་ཆོས་སྐུའི་རྒྱལ་སར་ཆས།།
དེ་ལྟར་སྔ་འགྱུར་གྲུབ་པའི་གདན་ས་ཁམས་ཀྱི་བྱང་ཆུབ་ཆོས་གླིང་གི།
ཕྱི་ནང་བཀོད་པའི་སྣང་བརྙན་རི་མོ་དབྱངས་གསལ་ཟུང་གི་གཟུགས་ཕབ་སྟེ།།
ཚོར་བའི་མུ་ཏིག་ཕྲེང་བ་དེ་ཉིད་དྲང་པོའི་བསྟར་ལ་རྒྱུད་བཞིན་དུ།།
ཡལ་འདབ་ལྔ་པའི་འདབ་ལོ་གཡོ་བཞིན་དྭངས་གསལ་ཤེལ་གྱི་ལམ་ནས་བྲིས།།
