དཔལ་སྤྲུལ་འཇིགས་མེད་ཆོས་ཀྱི་དབང་པོ།
་་་་་་འདོན་ཐེངས་སྔ་མའི་འཕྲོ།
དེར་འདབ་ཡངས་ཀྱང་སྙིང་ལ་སྡུག་བསྔལ་གྱི་ཚེར་མ་དབལ་ཚ་བ་གློ་བུར་དུ་སླེབས་ཤིང་མྱ་ངན་གྱིས་གདུངས་ནས་གཏམ་ལན་གཞལ་མ་ནུས་པས་ཨ་ཁ་ཁ་ཟེར་ཞིང་འདུག་པ་ན། རླུང་དམར་གྱི་གསེབ་ནས་སེར་བ་ཐ་ར་ར་འབེབས་ཤིང་། སྟེང་གི་ནམ་མཁའ་ནས་འབྲུག་སྒྲ་དྲག་པོ་འུ་རུ་རུ་གྲགས་ཏེ། གློག་དམར་གྱི་ཞགས་པ་བར་སྣང་ལ་འཚུབ་འཚུབ་འཁྱུགས་ཤིང་བྱུང་བས། འདབ་ཡངས་ཀྱང་ཅི་བྱ་གཏོལ་མེད་པར་གྱུར་ནས་གད་ཁུང་ཞིག་ཏུ་འཛུལ་ནས་ཀྱི་ཧུད་ཀྱི་ཧུད་ཅེས་སྨྲ་ཞིང་འདུག་གོ །དེ་ནས་སེར་བ་དྲག་ཏུ་བབས་ཏེ་ཤྭ་འོད་དང་རྦབ་རྒོད་ཀྱིས་རི་ལུང་ཁེངས་ཤིང་། གནམ་ལྕགས་ཀྱི་ཚག་སྒྲས་གནམ་ས་འགེངས་པ་ལྟར་བྱེད། ཆུ་ཀླུང་ཐམས་ཅད་རྦ་རླབས་འཕྱོ་ཞིང་གནམ་དུ་འཕྱུར་བ་སྙམ་བྱེད། རི་ཐམས་ཅད་ནི་གྲོག་པོར་བཏང་། ཐང་ཐམས་ཅད་ནི་གྲམ་པར་བརྡལ། མཚོ་ཐམས་ཅད་ནི་ཁྲག་ཏུ་ཁོལ། རྩ་ལྡུམ་དང་མེ་ཏོག་ཐམས་ཅད་ཀྱང་ཆེ་བ་རྣམས་བསྙིལ། ཆུང་བ་རྣམས་བརྡལ། རིང་བ་རྣམས་བཅག ཐུང་བ་རྣམས་མནན། ཕྲ་མོ་རྣམས་རྗེས་ཤུལ་ཙམ་ཡང་མེད་པར་བྱས་ནས་འདུག་གོ།
དེའི་རྗེས་སུ་སྤྲིན་ནག་རྣམས་དྭངས་ནས་ཉི་མ་གསལ་པོ་ཞིག་ཤར་བྱུང་བས་འདབ་ཡངས་ལངས་ཏེ་པདྨའི་ཚལ་དུ་ཕྱིན་པས། སྤང་དང་འདམ་ལ་སྐྱེས་པའི་མེ་ཏོག་ཐམས་ཅད་ནི་ཆེ་བ་རྣམས་ཐང་མར་བརྡལ་ནས་བསྙིལ་འདུག ཆུང་བ་རྣམས་ནི་ཤུལ་རྗེས་ཙམ་ཡང་མི་མངོན་པར་སོང་འདུག ཆུ་ན་གནས་པའི་པདྨ་ཐམས་ཅད་ནི་སེར་བ་འབབ་པའི་ཚེ་ཆུ་གཏིང་དུ་བྱིངས་ནས། སླར་སེར་བ་དྭངས་ཚེ་ཆུ་ཁར་གཡེངས་ཤིང་འདབ་མ་ཡང་ཁ་བྱེ་སྟེ་འདུག་པ་ལ་བུང་བ་འགའ་ཞིག་འཕུར་ལྡིང་གིས་རྩེ་ཞིང་ཉམས་དགའ་དགའ་ལྟར་འདུག ངག་སྙན་གནས་པའི་མེ་ཏོག་ཀྱང་སེར་བས་མ་བཅོམ་པར་འདུག་རུང་མེ་ཏོག་ཆུ་གཏིང་དུ་བྱིངས་པས་ངག་སྙན་སྦུབས་སུ་འཐུམས་ནས་ཤི་སྟེ་རོ་ཡང་གུམ་གུམ་པོར་བྱས་ནས་གེ་སར་ལ་འབྱར་འདུག དེར་འདབ་ཡངས་ཤིན་ཏུ་མྱ་ངན་གྱིས་མནན་ནས་སྙིང་ཁར་འཚངས་ཤིང་མིག་མཆི་མས་གང་ནས་འདུག་སྟེ། ཉི་འོད་གསལ་བ་དང་པད་འདབ་བྱེ་བ། བུང་བ་གཞན་གྱི་རྩེ་དགའི་རྣམ་འགྱུར་སོགས་སྔར་སེམས་ལ་དགའ་བ་བསྐྱེད་པ་ཐམས་ཅད་ཀྱང་སྡུག་བསྔལ་གྱི་སྣོན་པར་གྱུར་ནས་ཤིན་ཏུ་ཉམ་ཐག་པའི་སྐད་ཀྱིས་སྨྲེ་སྔགས་འདོན་པ།
ཀྱི་ཧུད་ཀྱི་ཧུད་ཀྱི་ཧུད།།
རེ་སྡུག་རེ་སྡུག་རེ་སྡུག།
སྡུག་བསྔལ་འཁོར་བའི་གནས་ཚུལ།།
སྡུག་བསྔལ་འདི་ལ་ལྟོས་དང་།།
མི་རྟག་སྒྱུ་མའི་གྲོང་ཁྱེར།།
ཞིག་ཤུལ་འདི་ལ་ལྟོས་དང་།།
མི་རྟག་འཁྲུལ་བའི་གནས་ཁང་།།
འགྱེལ་ཚུལ་འདི་ལ་ལྟོས་དང་།།
མི་བདེན་བསླུ་བའི་འདོད་ཡོན།།
འགྱུར་ཚུལ་འདི་ལ་ལྟོས་དང་།།
སྔར་ཞིག་བཀོད་པའི་མེ་ཏོག།
ད་ལྟ་འདབ་བརྒྱ་ཉམས་འདུག།
སྔར་ཞིག་སྐྱེས་པའི་ལོ་མ།།
ད་ལྟ་གཅལ་དུ་བཀྲམ་འདུག།
ད་ནངས་བདེ་སྐྱིད་ཡུལ་ལྗོངས།།
ད་ལྟ་སྡུག་བསྔལ་འཛོམས་འདུག།
སྔོན་ཆད་འགྲོགས་པའི་གྲོགས་བཟང་།།
ད་ལྟ་ལུས་སེམས་བྲལ་འདུག།
སྔོན་ཆད་བག་ཕེབས་འདབ་ཡངས།།
ད་རེས་རེ་ཐག་ཆད་འདུག།
སྔོན་ཆད་ཉམས་དགའི་འདོད་ཡོན།།
ད་ལྟ་སྡུག་བསྔལ་གྱུར་འདུག།
ད་ནངས་མཛེས་པའི་རྐང་དྲུག།
ད་ལྟ་རོ་རུ་གྱུར་འདུག།
སྣང་ཚུལ་འདི་ལ་བསམས་པས།།
སྐྱོ་སྐྱོ་སེམས་པ་སྐྱོའོ།།
རྨོངས་རྨོངས་བློ་སེམས་རྨོངས་སོ།།
འཁྲུག་འཁྲུག་སེམས་པ་འཁྲུག་གོ།
འདར་འདར་ལུས་སེམས་འདར་རོ།།
གློ་བུར་འཆི་བདག་བདུད་པོ།།
སྔོན་མ་ཁོང་ལ་སླེབས་སོང་།།
ངེད་ལ་ནམ་ཙམ་སླེབ་འོང་།།
མཁྱེན་ནོ་བླ་མ་མཁྱེན་ནོ།།
སྡུག་གོ་འདབ་ཡངས་སྡུག་གོ།
བློ་སྣ་ཆོས་ལ་འགྱུར་བར།།
བླ་མས་བྱིན་གྱིས་རློབས་ཤིག།
ཅེས་སོགས་སྨྲེ་སྔགས་དུ་མ་འདོན་ཅིང་ཡིད་ལྷག་པར་སྐྱོ་ནས་དེར་སྡོད་མ་ཚུགས་པས་རྩེ་མཐོ་པདྨའི་རི་བོའི་ངོས་སུ་ཕྱིན་ཏེ། བྲམ་ཟེའི་ཁྱེའུ་པདྨ་དགྱེས་པའི་གནས་དང་ཉེ་བ་གཡུ་ཤུག་ཟིལ་པ་མཐའ་ཡས་པའི་ལོ་མའི་དྲུང་ནས་འཕུར་ལྡིང་བྱེད་ཅིང་སྐྱོ་ཤས་ཀྱི་གླུ་བླངས་པ།
ཀྱེ་མ་ཉམས་དགའ་མེ་ཏོག་གི་སྐྱེད་ཚལ།།
ཉམས་ལ་མི་དགའ་སྡུག་བསྔལ་གྱི་གྲོང་ཁྱེར།།
ཡིད་འོང་འདོད་ཡོན་ཡུལ་ལྔ་ཡི་ལོངས་སྤྱོད།།
ཡིད་དུ་མི་འོང་འདུ་བྱེད་ཀྱི་སྡུག་བསྔལ།།
སྙིང་སྡུག་ཡིད་འཕྲོག་ཚེ་གང་གི་གཏན་གྲོགས།།
སྙིང་ལ་མི་སྡུག་རོ་རུལ་དུ་གྱུར་འདུག།
མཁྱེན་ནོ་མཁྱེན་ནོ་དཀོན་མཆོག་གསུམ་མཁྱེན་ནོ།།
དྲན་ནོ་དྲན་ནོ་ལྷ་ཆོས་རང་དྲན་ནོ།།
ལ་འུར་ལ་འུར་ཆོས་ལམ་ལ་ཞུགས་འགྲོ།།
བརྩེགས་ཚད་འགྱེལ་ན་གནས་ཁང་གིས་ཅི་བྱེད།།
བསགས་ཚད་འཛད་ན་ནོར་རྫས་ཀྱིས་ཅི་བྱེད།།
འདུས་ཚད་འབྲལ་ན་གཉེན་འདུན་གྱིས་ཅི་བྱེད།།
མཐོ་ཚད་ལྷུང་ན་ཐོབ་ཐང་གིས་ཅི་བྱེད།།
སྐྱེས་ཚད་འཆི་ན་འདི་སྣང་གིས་ཅི་བྱེད།།
ལས་ཀྱིས་འབྲེལ་བའི་བརྩེ་གདུང་གི་ཟླ་གྲོགས།།
བར་དོའི་ཡུལ་ལ་ད་ལྟ་ཙམ་སླེབས་ཡོད།།
ཤི་ན་རེ་ས་ལྷ་ཆོས་ལས་མི་འདུག།
ཕན་པའི་ལྷ་ཆོས་རང་བྱས་ཤིག་མེད་ན།།
འབྱོར་ཡང་ནོར་གྱིས་ཉོ་རྒྱུ་ནི་མི་འདུག།
མང་ཡང་དཔུང་གིས་འཕྲོག་རྒྱུ་ནི་མི་འདུག།
མཐུན་ཀྱང་གྲོགས་ལ་བསླུ་རྒྱུ་ནི་མི་འདུག།
ལས་དཀར་རྫོངས་ལ་བསྐུར་རྒྱུ་ནི་མི་འདུག།
གཤིན་རྗེའི་ཁྲིམས་ལ་ཕྱི་བཞག་ནི་མི་འོང་།།
མ་བསྒྲུབས་བཞག་པའི་ཐོས་པ་དེས་མི་ཕན།།
མ་རྨོས་བཞག་པའི་ས་ཞིང་དེས་མི་ཕན།།
མ་བཞོན་བཞག་པའི་རྟ་ཕོ་དེས་མི་ཕན།།
ད་ནི་ཅིས་ཀྱང་དགོས་མེད་ཅིག་དྲན་ནས།།
མི་ཚེའི་ལྷག་མ་ལྷ་ཆོས་ལ་དྲིལ་གཏོང་།།
དགྲ་ཡང་མི་བསམ་འདུལ་ཐབས་ནི་མི་བྱེད།།
གཉེན་ཡང་མི་བསམ་སྐྱོང་བྲན་ནི་མི་འགྲུབ།།
ནོར་ཡང་མི་བསམ་གསོག་འཇོག་ནི་མི་ཁོམ།།
དཔོན་ཡང་མི་བསམ་ངོ་སྲུང་ནི་མི་འཛེམ།།
གྲོགས་ཀྱང་མི་བསམ་བརྩེ་གདུང་ནི་མི་མོས།།
གོས་ཀྱང་མི་བསམ་དྲོ་འཇམ་ནི་མི་འབྱོར།།
ཟས་ཀྱང་མི་བསམ་ཞིམ་མངར་ནི་མི་རྙེད།།
གནས་ཀྱང་མི་བསམ་མཁར་ཁང་ནི་མི་འཛིན།།
ཚེ་འདི་མི་བསམ་འདི་སྣང་འདི་བདུད་རེད།།
ཅིར་ཡང་མི་བསམ་འཁྲུལ་སྣང་འདི་དགྲ་རེད།།
རྟོག་མེད་ངང་ལ་བག་ཡངས་སུ་གནས་ཤིང་།།
བསམ་མེད་ངང་དུ་མཉམ་གཞག་རང་ལྷོད་དེ།།
སྒོམ་མེད་ངང་ནས་ཆོས་སྐུ་དང་མཇལ་བའི།།
རི་སུལ་ཉལ་བའི་རྟོགས་ལྡན་དེ་སྐྱིད་དོ།།
འཁྲུལ་སྣང་ཞིག་པས་རྣམ་རྟོག་ནི་མི་མང་།།
སྤང་བླང་ཞིག་པས་བཅོས་མ་ནི་མི་བྱེད།།
རེ་དོགས་ཞིག་པས་ཞེ་འདོད་དང་བྲལ་བའི།།
འཁྲུལ་བ་ཞིག་པའི་ཞིག་པོ་དེ་སྐྱིད་དོ།།
སེམས་ཉིད་མ་བཅོས་ཐ་མལ་གྱི་ཤེས་པ།།
རལ་པ་མ་བཅོས་ལྕང་ལོ་ཡི་གཟར་བུ།།
སྤྱོད་ལམ་མ་བཅོས་གཏད་མེད་དུ་བྱུང་རྒྱལ།།
བཅོས་མ་སྤངས་པའི་རྣལ་འབྱོར་དེ་སྐྱིད་དོ།།
གཏུམ་མོ་སྦར་བས་གཅེར་བུ་རུ་བག་ཡངས།།
ཏིང་འཛིན་འབྱོངས་པས་ཟས་མེད་དུ་ཉམས་དགའ།།
རང་རིག་རྟོགས་པས་གཅེར་བུ་རུ་ལྷོད་ཆགས།།
ལམ་རྟགས་འབྱོངས་པའི་གྲུབ་ཐོབ་དེ་སྐྱིད་དོ།།
སྙིང་རུས་ཆེ་བས་དཀའ་ཐུབ་ལ་སེམས་སྤྲོ།།
དམ་བཅའ་ཐུབ་པས་གཅིག་པུ་རུ་སྡོད་ཚུགས།།
ཆུ་དང་རྡེའུའི་བཟའ་བཏུང་གིས་འཚོ་བའི།།
བརྟུལ་ཞུགས་གྲུབ་པའི་དྲང་སྲོང་དེ་སྐྱིད་དོ།།
གང་ཡང་སྐྱིད་དོ་ཆོས་བཞིན་དུ་སྤྱོད་ཚད།།
སུ་ཡང་སྡུག་གོ་ཚེ་འདི་ལ་ཞེན་ཚད།།
ནམ་ཡང་སྐྱིད་དོ་དབེན་པ་ཡི་རི་ངོགས།།
ཅིས་ཀྱང་སྡུག་གོ་འཁོར་བ་ཡི་གྲོང་ཁྱེར།།
གཏན་དུ་འཚེང་ངོ་དཀོན་མཆོག་ལ་བསྟེན་ཚད།།
ནམ་ཡང་ཕུང་ངོ་ཁེ་གྲགས་ལ་རེ་ཚད།།
གོང་གི་དཔོན་ལ་འཇལ་འཇལ་ནི་འཇལ་ཡོད།།
འཇལ་ཚོད་མི་འདུག་གང་དགའ་རུ་སྐྱུར་ཐོངས།།
འོག་གི་གཡོག་ལ་བྱིན་བྱིན་ནི་བྱིན་ཡོད།།
སྦྱིན་ཚོད་མི་འདུག་གང་དགའ་རུ་སྐྱུར་ཐོངས།།
བར་གྱི་གཉེན་ལ་བསྐྱང་བསྐྱང་ནི་བསྐྱངས་ཡོད།།
སྐྱོང་ཚོད་མི་འདུག་གང་དགའ་རུ་སྐྱུར་ཐོངས།།
སྡང་བའི་དགྲ་ལ་འཐབ་འཐབ་ནི་འཐབས་ཡོད།།
འཐབ་ཚོད་མི་འདུག་གང་དགའ་རུ་སྐྱུར་ཐོངས།།
རྨོས་པའི་ཞིང་ལ་བཏབ་བཏབ་ནི་བཏབ་ཡོད།།
འདེབས་ཚོད་མི་འདུག་ཐ་རྒོད་དུ་སྐྱུར་ཐོངས།།
བརྩེགས་པའི་མཁར་དུ་བསྡད་བསྡད་ནི་བསྡད་ཡོད།།
འདུག་ཚོད་མི་འདུག་དབེན་རི་ལ་ཆས་འགྲོ།།
བཟའ་བའི་ཟས་ལ་ཟོས་ཟོས་ནི་ཟོས་ཡོད།།
ཟ་ཚོད་མི་འདུག་དཀའ་ཐུབ་ལ་བསྟེན་འགྲོ།།
བགོ་བའི་གོས་ལྭ་གྱོན་གྱོན་ནི་གྱོན་ཡོད།།
གྱོན་ཚོད་མི་འདུག་གཅེར་བུ་རུ་འཕྱོངས་འགྲོ།།
ད་བྱེད་ད་བྱེད་ལྷ་ཆོས་རང་བྱེད་དོ།།
ད་སྒྲུབ་ད་སྒྲུབ་འཆི་ཆོས་ཤིག་སྒྲུབ་བོ།།
དམ་བཅའ་ཡིན་ནོ་ལྷ་རྣམས་ཀྱིས་དགོངས་མཛོད།།
ཁས་ལེན་ཡིན་ནོ་རང་སེམས་འདི་དཔང་ངོ་།།
ཞེས་ཟེར་བར་པདྨ་དགྱེས་པའི་བསམ་པ་ལ། གསེར་སྦྲང་འདབ་ཡངས་འདི་སྔོན་ནས་ཆོས་ལ་དཀར་ཞིང་བྱ་བ་གང་ཡང་ཚུགས་ཐུབ་ཅིང་གཞུང་བཟང་བ་ཞིག་ཡིན་མོད་ཀྱིས། ད་རེས་རྐྱེན་གྱིས་བསྒྱུར་པའི་ངེས་འབྱུང་གློ་བུར་བ་ལ་ནམ་ཕུགས་རང་མེད་ལས་ཆེ་ཡང་བརྟག་དཔྱད་ཅིག་བྱེད་དགོས་སྙམ་ནས་འདི་སྐད་དུ།
ཀྱེ་ལགས་གསེར་སྦྲང་འདབ་ཡངས་སྙིང་གི་གྲོགས།།
གཅིག་པུར་སྐྱོ་གླུ་ལེན་པ་ཇི་ལྟར་ལགས།།
ད་རེས་ལས་ཀྱིས་བསྐོས་པའི་གཏན་གྲོགས་ལ།།
གློ་བུར་འཆི་བདག་ཞགས་པས་བཏབ་ན་ཡང་།།
ཐུགས་ངལ་མ་མཛད་སྙིང་ལ་རུས་པ་སྐྱེད།།
ལྷ་ཆོས་གཞི་མ་མི་ཆོས་ཕུན་སུམ་ཚོགས།།
མི་ཆོས་ཟེར་བ་འཁོར་བའི་བདེ་སྐྱིད་ཡིན།།
བདེ་སྐྱིད་མི་འདོད་ཆོས་ཀྱིས་ཅི་ཞིག་བྱ།།
ཆོས་ལྷུར་ལེན་ལ་བདེ་སྐྱིད་འདོད་པ་ཡིན།།
གྲོགས་གཅིག་ཤི་ཡང་གྲོགས་ཀྱིས་ག་ལ་ཕོངས།།
ཤི་བས་ཐབས་ཆག་འཁོར་བའི་དཔེ་ལ་མེད།།
སྐྱིད་སྡུག་རེ་མོས་འཁོར་བའི་གནས་ཚུལ་ཡིན།།
སྐྱིད་དམ་སྙམ་པ་ད་དུང་བརྒྱ་རེ་འོང་།།
གློ་བུར་ངེས་འབྱུང་རཱ་ཛའི་ཆོ་འཕྲུལ་ཡིན།།
དེ་ལ་སྙིང་པོ་མེད་པ་མ་དགོངས་སམ།།
འཕྲལ་སྣང་དད་པ་བློ་ཡི་འགྱུར་བག་ཡིན།།
དེ་ལ་ནམ་ཕུགས་མེད་པ་མ་དགོངས་སམ།།
ཐོ་ཅོའི་གཏོང་ཕོད་ཨ་ལ་ཧ་སུད་ཡིན།།
དེ་ལ་འབྲས་བུ་མེད་པ་མ་དགོངས་སམ།།
རྐྱེན་ངན་གློ་རྡེག་འཕྲལ་སྣང་སྐད་ཅིག་ཡིན།།
དེ་ལ་ཕུང་འཚེངས་མེད་པ་མ་དགོངས་སམ།།
ལུགས་གཉིས་ཟུང་འབྲེལ་མཁས་པའི་བསྒྲུབ་བྱ་ཡིན།།
དེ་ལ་ཐར་ལམ་ཡོད་པ་མ་དགོངས་སམ།།
འདོད་ཡོན་ལམ་ཁྱེར་གསང་སྔགས་ཐབས་མཁས་ཡིན།།
དེ་ལ་ཉེ་ལམ་ཡོད་པ་མ་དགོངས་སམ།།
རྒྱལ་པོའི་ས་འཛིན་རྒྱལ་པོའི་སྤྱོད་པ་ཡིན།།
དེ་ལ་འགྲོ་དོན་ཡོད་པ་མ་དགོངས་སམ།།
ནོར་རྫས་བསགས་པ་ཅན་ལ་སྦྱིན་གཏོང་ཡོད།།
དེ་ལ་ཕྱིན་དྲུག་ཚང་བ་མ་དགོངས་སམ།།
ཞེ་བཅད་མེད་པའི་དམ་བཅའ་མང་བ་དེ།།
མཐར་ཐུག་འགལ་བ་མང་བའི་རྒྱུར་ཤེས་དགོས།།
སྙིང་རུས་མེད་པའི་དཀའ་ཐུབ་བྱེད་པ་དེ།།
མཐར་ཐུག་ལོག་ལྟ་སྐྱེ་བའི་རྒྱུ་ཡིན་གཟབ།།
ནམ་ཕུགས་མེད་པའི་ཞེན་ལོག་ངེས་འབྱུང་དེ།།
མཐར་ཐུག་རང་ཆུས་ཤོར་བའི་རྒྱུ་ཡིན་གཟབ།།
ཏིང་འཛིན་མ་སྐྱེས་དབེན་རི་འཛིན་པ་དེ།།
མཐར་ཐུག་སུན་པ་སྐྱེ་བའི་རྒྱུ་ཡིན་གཟབ།།
ལྟ་བ་མ་རྟོགས་གཉན་ས་འགྲིམ་པ་དེ།།
མཐར་ཐུག་ལྷ་འདྲེས་རློམ་པའི་རྒྱུ་ཡིན་གཟབ།།
གྲུབ་པ་མ་ཐོབ་བརྟུལ་ཞུགས་སྤྱོད་པ་དེ།།
མཐར་ཐུག་དམྱལ་བར་སྐྱེ་བའི་རྒྱུ་ཡིན་གཟབ།།
རང་རྒྱུད་མ་འགྱུར་ཆ་ལུགས་བསྒྱུར་པ་དེ།།
མཐར་ཐུག་གཞན་གྱིས་ཁྲེལ་བའི་རྒྱུ་ཡིན་གཟབ།།
བརྟག་དཔྱད་མ་བཏང་ཙབ་ཙོབ་བློ་མང་དེ།།
མཐར་ཐུག་འགྱོད་པ་སྐྱེ་བའི་རྒྱུ་ཡིན་གཟབ།།
གཅིག་ཏུ་མ་ངེས་བྱ་སྤྱོད་གྲངས་མང་དེ།།
མཐར་ཐུག་ཐམས་ཅད་སུན་པའི་རྒྱུ་ཡིན་གཟབ།།
མཐོང་ལམ་མ་ཐོབ་མངོན་ཤེས་འཆད་པ་དེ།།
མཐར་ཐུག་རང་གཞན་ཕུང་བའི་རྒྱུ་ཡིན་གཟབ།།
སྙིང་རྗེ་མ་འབྱོངས་འགྲོ་དོན་བྱེད་པ་དེ།།
མཐར་ཐུག་ཞེན་པ་སྐྱེ་བའི་རྒྱུ་ཡིན་གཟབ།།
སྟབས་གཟབ་རྟོག་དཔྱོད་ཞིབ་ཏུ་མ་བཏང་བར།།
སེམས་ལ་དྲན་ཚད་ཁ་རུ་འདོན་མི་རུང་།།
ཁ་ཡིས་སྨྲས་ཚད་ལག་ཏུ་ལེན་མི་རུང་།།
འཇུས་ནས་མ་ཤོར་བ་ཞིག་གནད་དུ་ཆེ།།
བཟུང་ནས་མ་བཏང་བ་ཞིག་གནད་དུ་ཆེ།།
བཤད་ནས་མ་བརྫུན་པ་ཞིག་གནད་དུ་ཆེ།།
གསེར་སྦྲང་ཐིག་ལེའི་ཐུགས་ལ་དེ་ལྟར་ཞོག།
བག་ཡངས་པདྨ་དགྱེས་པའི་སྙིང་གཏམ་ཡིན།།
རང་བློའི་ཉམས་མྱོང་ཡིན་གྱི་ཐུགས་མ་ཁྲེལ།།
བརྩེ་བའི་གསང་གཏམ་ཡིན་གྱི་བཀའ་མ་བཀྱོན།།
ཐུགས་བཞག་བརྟག་དཔྱད་མཛོད་དང་བདེན་གཏམ་ཡིན།།
ཟེར་བས་གསེར་སྦྲང་གི་ཡིད་ལ་ཅུང་ཟད་མ་འཐད་ནས་འདི་སྐད་དུ།
ཨེ་མ་དབེན་པའི་ནགས་ཚལ་ན།།
བྲམ་ཟེའི་ཁྱེའུ་ལྷོད་རེ་ཆགས།།
པདྨ་དགྱེས་པ་ཉམས་རེ་དགའ།།
གཅིག་པུར་ལུས་པའི་སྦྲང་ཆུང་ལ།།
སྐྱོ་གྲོགས་བྱེད་པ་འདྲིས་གཞུང་བཟང་།།
སྐྱོ་གླུ་ལེན་པའི་འདབ་ཡངས་ལ།།
གསང་གཏམ་འཆད་པ་ཕྱི་ཐག་རིང་།།
མྱ་ངན་གདུངས་པའི་གསེར་སྦྲང་ལ།།
སེམས་གསོ་བྱས་པ་སྐུ་དྲིན་ཆེ།།
ལུགས་གཉིས་མཐུན་པའི་གསུང་སྒྲོས་ལ།།
དོན་བཟང་ཡོད་པ་ངོ་མཚར་ཆེ།།
སྡུག་བསྔལ་འཁོར་བའི་གནས་ཚུལ་ལ།།
སྐྱོ་བ་སྐྱེས་པའི་སྦྲང་ཆུང་ང་།།
སྔོན་ནས་དམ་པའི་དྲུང་དུ་བསྡད།།
བློ་རྩེ་དམ་པའི་ཆོས་ལ་གཏད།།
སྒྲུབ་པའི་དམ་བཅའ་སྙིང་ལ་བྲིས།།
གློ་བུར་རྣམ་འགྱུར་ཡིན་རེ་ཤི།
དབེན་པའི་ནགས་ཚལ་སྙིང་ལ་བཅངས།།
གོང་མའི་རྣམ་ཐར་ཡིད་ལ་བཞག།
བྱིས་པའི་བསམ་སྤྱོད་བྱེད་རེ་ཤི།
བློ་རྩེ་དཀོན་མཆོག་གསུམ་ལ་གཏད།།
དྲིན་ཆེན་བླ་མ་གཙུག་ཏུ་ཁུར།།
གཏོད་ས་ནོར་བ་ཡོད་རེ་ཤི།
སྡང་བའི་དགྲ་ལ་ཁོག་ཡངས་བྱས།།
བྱམས་པའི་གཉེན་ལ་ཕྱི་གཞུང་བཟུང་།།
སྡུག་འཐབ་ཁོང་ཁྲོ་བྱེད་རེ་ཤི།
མཆོད་པ་དཀོན་མཆོག་གསུམ་ལ་འབུལ།།
སྦྱིན་པ་མ་ནུས་པ་ལ་གཏོང་།།
འབྲས་མེད་སྦྱིན་གཏོང་བྱེད་རེ་ཤི།
རང་གི་ཡོན་ཏན་སྦུབས་སུ་བསྐྱིལ།།
གཞན་གྱི་ཡོན་ཏན་དར་བཞིན་འཕྱར།།
ཐོ་ཅོ་ང་རྒྱལ་བྱེད་རེ་ཤི།
ཚེ་གང་བསྐོས་པའི་གཏན་གྲོགས་ལ།།
འཆི་བདག་ཞགས་པས་གློ་བུར་ཐེབས།།
ད་རེས་མི་རྟག་མངོན་སུམ་མཐོང་།།
སྐྱོ་ཤས་ངེས་འབྱུང་གཏིང་ནས་སྐྱེས།།
གཏམ་ལ་ཟོལ་ཟོག་ཡོད་རེ་ཤི།
དམ་བཅའ་སྙིང་གི་དབུས་སུ་བྲིས།།
ལག་ལེན་བརྩོན་འགྲུས་ལྕག་གིས་འདེབས།།
ཚིག་ལ་བརྫུན་པ་ཡོད་རེ་ཤི།
ཡིད་མཐུན་པདྨ་དགྱེས་པ་ཁྱོད།།
བླ་མ་སངས་རྒྱས་དངོས་དང་མཇལ།།
ཟབ་དགུའི་གདམས་ངག་མངའ་ལགས་སམ།།
ཐོས་བསམ་ཕྱོགས་མེད་གཞུང་ལ་བྱས།།
ཚིག་གི་སྒྲོ་འདོགས་ཆོད་ལགས་སམ།།
ཉམས་ལེན་དབེན་པའི་གནས་སུ་བསྐྱངས།།
བཅོས་མིན་རྟོགས་པ་སྐྱེས་ལགས་སམ།།
སྐྱིད་གླུ་བྲག་རིའི་དྲུང་ནས་བླངས།།
ཉམས་སྣང་རྩལ་ཁ་འབར་ལགས་སམ།།
སྤྱོད་པ་བག་ཡངས་བྱུང་རྒྱལ་བྱས།།
རོ་སྙོམས་ལམ་དུ་ལོངས་ལགས་སམ།།
ལྟད་མོ་འཁོར་བའི་གྲོང་ལ་བལྟས།།
སྐྱོ་ཤས་གཏིང་ནས་སྐྱེས་ལགས་སམ།།
ཆོས་དང་མཐུན་པའི་གཏམ་སྨྲོས་ཤིག།
ལམ་དང་མཐུན་པའི་གླུ་ཞིག་ལོངས།།
མི་རྟག་སྟོན་པའི་དཔེ་ཞིག་ཤོད།།
འཁོར་བའི་གྲོང་ཁྱེར་སྨ་ཕབ་མཛོད།།
ཐར་པའི་ལམ་གྱི་ཡོན་ཏན་ཤོད།།
དབེན་པའི་རི་ལ་བསྔགས་བརྗོད་གྱིས།།
གསེར་གྱི་སྦྲང་ཆུང་འདབ་ཡངས་ང་།།
སྡོད་ས་དབེན་པའི་གནས་སུ་བྱེད།།
བརྩེ་གདུང་ལྷ་ཆོས་གྲོགས་ལ་བྱེད།།
ལྟད་མོ་རང་གི་སེམས་ལ་ལྟ།།
ཡིད་མཐུན་བགྲོ་གླེང་ཁྱེད་ལ་བྱེད།།
ཚིག་ལ་སྦ་གསང་མེད་པར་ཞུ།།
མུ་འགོད།
