ཀུན་མཁྱེན་ཀློང་ཆེན་རབ་འབྱམས།
་་་་་འདོན་ཐེངས་སྔ་མའི་འཕྲོ།
དེ་ནས་གྲོང་དང་གྲོང་རྡལ་གྱི་གཞིར་སོང་བ་ན། ཁྱིམ་བདག་ཀྱང་ཆོས་ལ་མི་གནས་ཤིང་སྡིག་སྤྱོད་དག་གིས་འཚོ་ལ། ཕ་མ་རྒན་རབས་དང་དཀོན་མཆོག་གསུམ་མི་མཆོད་ཅིང་ངན་གཡོ་ལྷུར་བྱེད་པས་གནས་པ་མཐོང་སྟེ། ཚུལ་བཞིན་སྤྱོད་པའི་སྐྱེ་བོ་ཁ་ཅིག་སྨྲེ་སྔགས་འབྱིན་པ།
ཀྱེ་མ་དིང་སང་ཕྱོགས་འདི་ན།།
གནའ་དུས་བཟང་པོའི་ཉི་མ་ནུབ།།
ད་དུས་ངན་པའི་ཟླ་ཤར་བས།།
ཕ་མ་རྒན་རབས་མི་མཆོད་ཅིང་།།
གཡོན་ཅན་བུད་མེད་ངག་ལ་ཉན།།
ངོ་ཚ་ཁྲེལ་ཡོད་མི་ལྡན་ཅིང་།།
ཁྲེལ་མེད་གནས་ལ་ངོ་སོར་བྱེད།།
འཕྲལ་ཕུགས་མི་དཔྱོད་རྩུབ་མོའི་ཚུལ།།
སེམས་དང་སྤྱོད་པ་སོ་སོར་སྟོན།།
རང་ཉིད་རྒུད་པའི་སྡུག་བསྔལ་བས།།
གཞན་དག་འབྱོར་ལ་ཡིད་མི་དགའ།།
རང་ལ་མི་བཟོད་ཀོ་ལོང་དམ།།
གཞན་ལ་རྩོལ་ཕོད་ལྷག་པར་ཆེ།།
དྲང་པོར་མི་གནས་ཕྱོགས་ལྷུང་ཅན།།
བཟང་པོའི་དྲིན་ལན་ཉེས་ཀྱིས་འཇལ།།
ཕྱི་ཐག་མི་ལྡན་གསར་འགྲོགས་ཆེ།།
མཆོད་འོས་དམོད་ཀྱང་དམོད་འོས་མཆོད།།
བཟང་སེམས་མི་ལྡན་རང་འདོད་ཅན།།
གཅིག་ཏུ་མི་གནས་འགྱུར་ལྡོག་མང་།།
སྦྲུལ་བཞིན་ཁ་ཅིག་ལྕེ་གཉིས་རྐྱོང་།།
དཔའ་མཛངས་མི་ལྡན་ངན་གཡོའི་ཚུལ།།
རང་བཞིན་དགེ་ལ་སྐྱོན་དུ་བརྩི།།
ལོག་པའི་ལམ་ལ་ཡོན་ཏན་བརྗོད།།
གནོད་པ་བྱེད་ལ་ལྷ་བཞིན་འདུད།།
ཕན་པ་སྟོན་རྣམས་དུག་བཞིན་འདོར།།
ལེགས་ལ་ཆད་པ་སྦྱིན་པ་དང་།།
མཉམ་དུ་ཉེས་ལ་བྱ་དགའ་སྦྱིན།།
ཀྱེ་མ་དིང་སང་སྐྱེ་བོ་དག།
བསྟེན་པར་དཀའ་ཞིང་སྡིག་སྤྱོད་འཕེལ།།
ཡོན་ཏན་ཆུང་ཞིང་སྐྱོན་གྱི་གནས།།
སྡིག་སྤྱོད་དམ་པར་འཛིན་འདིས་སྐྱོ།།
ཞེས་གླེང་བས་ཡིད་འབྱུང་ཞིང་རང་གི་རྫིང་བུར་སོང་སྟེ་གནས་པ་ན། སྤྲིན་གྱི་ཤུགས་ལྟར་འགྱིང་བའི་བྱ་ཞིག་ཤར་ཕྱོགས་སུ་འགྲོ་བ་མཐོང་སྟེ་ངང་པའི་རྒྱལ་པོས་དེ་ལ་དྲིས་པ།
དྭངས་པའི་མཁའ་ལ་ལྡིང་བའི་ཡིད་འོང་བྱ།།
གངས་རིའི་རྒྱལ་པོ་གཤོག་པས་མཛེས་པ་བཞིན།།
སྟོང་གསལ་ནམ་མཁའི་ངོས་ནས་འགྱིང་བ་འདྲ།།
ཅི་ཞིག་གཟིགས་ནས་གཤེགས་པ་ལགས་སམ་ཀྱེ།།
བྱ་དེས་སྨྲས་པ།
ཡིད་འོང་ལྷ་ཡི་ཡུལ་འདྲའི་སྐྱེད་མོས་ཚལ།།
མེ་ཏོག་འབྲས་མང་མཚོ་བསིལ་རྫིང་བུས་གང་།།
འཚེ་བ་ཀུན་བྲལ་དབེན་ཞིང་རིག་པ་འཛིན།།
དཔལ་གྱི་འབྱུང་གནས་ནགས་ཚལ་དམ་པར་འགྲོ།།
ངང་པའི་རྒྱལ་པོས་སྨྲས་པ། ཀྱེ་བཞིན་བཟང་དེར་འགྲོ་བའི་མཚན་མ་ནི་གང་། བྱ་དེས་སྨྲས་པ།
གངས་རིའི་ཡུལ་གྱི་ཤར་ཕྱོགས་ན།།
སྐྱེ་བོ་མང་པོས་གང་བའི་གནས།།
གྲོང་ཁྱེར་སྐྱིད་པའི་འབྱུང་གནས་ཡོད།།
དེ་དང་ཉེ་བའི་ལྷོ་ཕྱོགས་ན།།
ནགས་ཚལ་དཔལ་གྱི་འབྱུང་གནས་ནི།།
དབེན་ཞིང་ཉམས་དགའ་རིག་པ་འཛིན།།
ལྷ་དང་དྲང་སྲོང་མང་པོས་གང་།།
མེ་ཏོག་འབྲས་བུས་གང་བ་སྟེ།།
འཇམ་དཔལ་དང་ནི་སྤྱན་རས་གཟིགས།།
ཆོས་ཀྱི་དྲི་བ་མཛད་པའི་གནས།།
ལག་ན་རྡོ་རྗེའི་ཕོ་བྲང་ཡོད།།
དིང་སང་དུས་ཀྱང་ཡུལ་དེ་ན།།
གནོད་པའི་འབྱུང་པོ་མི་རྒྱུ་ཞིང་།།
སྐྱེ་བོ་རྣམས་ཀྱང་ཞི་ཞིང་དགེ།
ཁྱེད་ཅག་ཐར་པ་དོན་གཉེར་ན།།
སྐྱེད་མོས་ཚལ་དེར་སྒོམ་དུ་གཤེགས།།
ཞེས་སྨྲས་ཏེ་སོང་། དེ་ནས་གནས་ཀྱི་ཡོན་ཏན་དང་། ཡུལ་གྱི་ཉེས་པ་སྣ་ཚོགས་ལ་སོ་སོར་བརྟགས་ཏེ་འགྲོ་འདོད་པར་གྱུར་ནས། ངང་པའི་རྒྱལ་པོ་དེས་ངུར་པ་དག་ལ་སྨྲས་པ།
རྫིང་བུའི་གནས་འདི་ཡིད་ཉམས་རབ་དགའ་ཞིང་།།
མཛེས་པའི་བྱ་ཚོགས་མང་པོས་གང་ན་ཡང་།།
སྣ་ཚོགས་ཡུལ་གྱི་ཉེས་པས་རབ་སྐྱོ་ཞིང་།།
ནགས་ཀྱི་ཡོན་ཏན་མཐོང་ནས་སྒོམ་དུ་འགྲོ།།
ཞེས་བརྗོད་པ་དང་། ངུར་པ་དེ་དག་གིས་སྨྲས་པ།
གངས་རིའི་ར་བ་སྨན་ཤིང་ལྗོན་པས་འཁྲིགས།།
མེ་ཏོག་འབྲས་མང་རང་བྱུང་རྒྱལ་བའི་གནས།།
དཔལ་གྱི་བསམ་ཡས་ཡིད་འོང་འདི་དོར་ནས།།
འདབ་བཟང་ངང་པའི་རྒྱལ་པོ་གང་དུ་འགྲོ།།
ངང་པས་སྨྲས་པ།
ཡིད་འོང་རྫིང་བུའི་ནང་ན་མཛེས་པའི་བྱ།།
ཡུན་རིང་མཐུན་པར་འགྲོགས་པའི་གྲོགས་དག་ཉོན།།
ཡུལ་འདི་མཛེས་ཤིང་ཤིན་ཏུ་ཉམས་དགའ་ཡང་།།
གནའ་དུས་བཟང་པོའི་ཉི་མ་ནུབ་གྱུར་ཅིང་།།
དིང་སང་སྐྱེ་བོ་ངན་པའི་ཟླ་ཤར་བས།།
དམ་པ་རྣམས་ཀྱི་པདྨ་ཟུམ་གྱུར་ཅིང་།།
སྡིག་སྤྱོད་ཀུ་མུ་ད་རྣམས་རྣམ་པར་རྒྱས།།
རབ་ཏུ་བྱུང་ཡང་འདོད་ཡོན་རྫིང་བུར་འབབ།།
ལྷག་བསམ་གངས་རིའི་དཔལ་དང་མི་ལྡན་ཅིང་།།
བསླབ་གསུམ་ནོར་གྱིས་དབེན་པའི་ཚོགས་ཀྱིས་གང་།།
ཁྱིམ་པ་རྣམས་ཀྱང་ངོ་ཚའི་གོས་བྲལ་ཞིང་།།
གང་ན་གཡོ་ཅན་ཁྲེལ་མེད་ངོ་སོར་བྱེད།།
དམ་པ་བས་ཀྱང་བླུན་པོ་བྲིན་པའི་གནས།།
ནོར་མེད་མཁས་ཀྱང་བརྙས་ཤིང་རིང་དུ་འདོར།།
བླུན་པོ་ལོངས་སྤྱོད་ལྡན་རྣམས་ལྷ་བཞིན་བཀུར།།
ཆོས་དང་ཆོས་མིན་རྣམ་གཞག་ཕྱིན་ཅི་ལོག།
དེ་འདྲའི་ཕྱོགས་འདིར་དཔལ་ལྡན་བསམ་ཡས་པ།།
འཚོ་བ་འཚོལ་དཀའ་ཀུན་ཀྱིས་རྟག་ཏུ་བརྙས།།
ཆོས་དང་ལྡན་པ་དམོད་ཅིང་ཡོན་ཏན་སྒྲིབ།།
ཡུལ་འདིར་གནས་པའི་སྐྱེ་བོའི་ཚོགས་དེ་དག།
ནམ་ཡང་མི་མགུ་སུས་ཀྱང་མི་ཐུལ་ཞིང་།།
ཉེ་འམ་རིང་ཡང་གནོད་པའི་ཚོགས་རབ་འཕེལ།།
དམ་པ་དམོད་ཅིང་སྡིག་སྤྱོད་བསྔགས་པ་སྨྲ།།
དོན་འདི་མཐོང་ནས་བདག་གི་སེམས་འདི་སྐྱོ།།
གཞན་ཡང་ནགས་ཀྱི་ཡོན་ཏན་འདི་ཐོས་ནས།།
བདག་བློ་ཞི་བའི་ཚལ་དུ་སྤྲོ་བས་ཉོན།།
གངས་རིའི་ཤར་ཕྱོགས་མཛེས་པའི་སྐྱེད་མོས་ཚལ།།
དབེན་ཞིང་ཉམས་དགའ་འཚེ་བ་ཀུན་དང་བྲལ།།
སྨན་ཤིང་མེ་ཏོག་ལྗོན་པའི་ཕྲེང་བས་འཁྲིགས།།
བསིལ་བའི་ཆུ་རྒྱུན་ལྷུང་སྒྲ་སྙན་སྒྲོག་ཅིང་།།
མཛེས་པའི་བྱ་དང་རི་དྭགས་བདེ་བར་རྒྱུ།།
ཤིང་སྡོང་སྨན་ལྗོངས་བྲག་རིའི་ཕུག་མང་ཞིང་།།
དུས་རླུང་སེར་བུའི་བསིལ་ཡབ་དལ་བུས་གཡོབ།།
རྩྭ་དང་མེ་ཏོག་འབྲས་བུའི་ངད་མང་ཞིང་།།
བསམ་གཏན་པ་དག་ཉེ་བར་འཚོ་བར་གནས།།
དཔལ་གྱི་འབྱུང་གནས་ནགས་ཚལ་དམ་པར་འགྲོ།།
ཞེས་བརྗོད་པ་དང་། དེའི་ཚེ་ངུར་པའི་ཚོགས་དེ་དག་གིས་སྨྲས་པ།
ཟླ་བ་འོད་དང་ལྷན་ཅིག་ནུབ་པ་ལྟར།།
སྙན་ངག་མདོ་སྡེ་སྟོང་ལྡན་ཚུལ་འདི་ཡང་།།
ངང་པའི་རྒྱལ་པོ་ཉིན་བྱེད་ཁྱོད་ཉིད་དང་།།
ལྷན་ཅིག་ཕྱོགས་འདིར་ནུབ་པར་མི་འགྱུར་རམ།།
ངང་པས་སྨྲས་པ།
སྔོན་གྱི་སེམས་དཔའ་བཞུགས་པའི་གནས།།
གངས་རི་དཔལ་གྱི་བསམ་ཡས་འདིར།།
འཆད་དང་རྩོད་པའི་གཟུགས་བརྙན་ཡང་།།
འགའ་ཡི་དྲིན་གྱིས་ཅུང་ཟད་གནས།།
སྐྱེ་བོ་མཁས་རྣམས་དགའ་བསྐྱེད་ཅིང་།།
བློ་གསལ་ངུར་པའི་ཡིད་འཕྲོག་པའི།།
སྙན་ངག་ཆུ་བོ་རྒྱ་མཚོའི་ལུང་།།
རིང་པོར་མི་ཐོགས་ནུབ་པར་འགྱུར།།
དམ་པ་སྔ་མ་རྣམས་འདས་ཤིང་།།
བློ་གསལ་བུང་བ་སྤྲིན་བཞིན་འཐོར།།
བདག་ཀྱང་མེད་པར་གྱུར་པ་ན།།
ཡུལ་འདིར་སྙན་ངག་རྒྱ་མཚོ་ནུབ།།
ཉི་མའི་འོད་དང་བྲལ་གྱུར་ཅིང་།།
ཟླ་བ་ཡར་ནི་ནུབ་པར་འགྱུར།།
སྐར་མའི་ཚོགས་ཀྱང་མེད་པ་ན།།
འཇིག་རྟེན་མུན་པ་ཉིད་དུ་འགྱུར།།
འོན་ཀྱང་དམ་པ་འགའ་དང་འགའ།།
བདག་བློའི་གཞུང་ལ་བརྟེན་ནས་ནི།།
སྙན་ངག་འོད་ཀྱི་དྲ་བའི་འཕྲིན།།
རླུང་འགྲོགས་ཀློག་བཞིན་ཐེངས་འགའ་བྱུང་།།
ཞེས་བརྗོད་པ་དང་། ངུར་པས་སྨྲས་པ། ཀྱེ་འདབ་བཟང་ཡུལ་འདིར་དམ་པ་ཉུང་ལ་སྡིག་སྤྱོད་མང་ཞིང་རྣམ་པར་འཚེ་བའི་རྒྱུ་ནི་གང་ཞིག་ཡིན།
ངང་པས་སྨྲས་པ།
སྔོན་ཡང་སྡིག་སྤྱོད་སྐྱེ་བོ་ཡིས།།
དམ་པ་རྣམས་ནི་བསྐྲད་དང་སྤྱུགས།།
དེ་འདྲའི་མཐུ་ཡིས་དིང་སང་འདིར།།
དམ་པ་ཉུང་ཞིང་སྡིག་སྤྱོད་མང་།།
ཞེས་སོ།།
མུ་འགོད།
