ཚེ་དབང་ནོར་བུ། འཛིན་རིམ་བདུན་པ།
དེ་ཡང་རང་ཅག་དགོན་པའི་སྤྱི་ཚོགས་སུ་གནས་པའི་གྲྭ་བཙུན་དག་སུ་ཞིག་ཡིན་རུང་སྐྱབས་བསྔོ་རྟེན་གཉིས་ལ་བརྟེན་ནས་འཚོ་བ་སྐྱེལ་བ་ལས་རང་དགར་འཚོ་བ་སྐྱེལ་མཁན་ཞིག་མེད་པ་དངོས་བདེན་ཡིན། དེས་ན་དེང་སང་གི་དགོན་པའི་སྤྱི་ཚོགས་སུ་གནས་ཡོད་པའི་གྲྭ་བཙུན་རྣམས་དཀོར་ལ་བག་མེད་ལོངས་སྤྱོད་ཅིང་དཀོར་སྦྱོང་བྱ་རྒྱུ་ཕར་ཞོག རང་འགན་དུ་འོས་པའི་ཆོས་དང་སློབ་སྦྱོང་བྱ་རྒྱུ་དག་ཀྱང་མི་བྱེད་པར། གཞན་ཁྲེལ་དང་རང་གནོང་གང་ཡང་མེད་པའི་ཐོག་ནས། དྲན་མེད་ཚོར་མེད་ལྷོད་དལ་ངང་དུས་ཚོད་ཅི་འཁྱོལ་འདི་འཁྱོལ་གྱིས་སྡོད་པར་བྱེད་པ་འདིས། བླུན་རྨོངས་དུད་འགྲོའི་རིགས་ཅན་དག་དང་མཚུངས་པར་གྱུར་པ་ཅིས་མ་ཡིན། དཔལ་སྤྲུལ་རིན་པོ་ཆེས། བླ་མ་སེར་མོ་བ་ཟེར་བ་དེ། གསོན་པོ་རྣམས་ཀྱི་སྐྱབས་འཇུག་ཞུ་ས། གཤིན་པོ་རྣམས་ཀྱི་བསྔོ་རྟེན་ཞུ་ས། ཡོད་ན་མཆོད་ས། མེད་ན་ཞུ་ས། ཞེས་གསུངས་ཡོད་རེད། དེ་ཚོར་མནོ་བསམ་གཏོང་དགོས་པ་འདུག
སྤྱིར་བཏང་གྲྭ་བཙུན་ཚོས་དཀོར་ཟ་མི་ཆོག་པ་མ་ཡིན། ཅིའི་ཕྱིར་ཞེ་ན་སྟོན་པ་ཤཱཀྱ་ཐུབ་པ་ཉིད་ཀྱིས་དགེ་འདུན་ཕ་མ་ཅི་འདྲ་ཡིན་རུང་བསོད་སྙོམས་ལ་བརྟེན་དགོས་གསུངས་ཡོད། བསོད་སྙོམས་ཟེར་བ་དེ་དཀོར་དང་ངོ་བོ་གཅིག་མཚུངས་ཡིན། བསོད་སྙོམས་ཟེར་བ་དེ་རྒྱ་གཞུང་གི་ཚིག་བོད་སྐད་དུ་བསྒྱུར་པ་ཞིག་རེད་ལ། དཀོར་ཟེར་བ་དེ་བོད་བརྒྱུད་ནང་བསྟན་གྱི་ཐ་སྙད་ཅིག་ཡིན་པ་རེད། སྒྲ་ཡངས་པའི་དབང་དུ་བཏང་ན་རྒྱུ་ནོར་རམ་ནོར་རྫས་དང་དོན་གཅིག་ཡིན་པ་དང་། སྒྲ་དོག་པའི་དབང་དུ་བཏང་ན་དད་རྫས་ཞེས་ཟེར་ལ། དེ་ལས་དོག་ཙམ་བྱས་ན་བུན་རྫས་ཞེས་ལབ་ནའང་འགྲིག དེ་ལ་དད་རྫས་ནི་འབྱོར་ལྡན་ཁྱིམ་པ་ཕོ་མོ་རྣམས་ཀྱིས་སྐྱབས་རྟེན་དང་བསྔོ་རྟེན་ཞལ་འདེབས་སོགས་སུ་དམིགས་ནས་དད་པས་ཕུལ་བའི་རྫས་ཤིག་ཡིན། བུན་རྫས་ནི་དད་རྫས་དེ་ཉིད་བེད་སྤྱོད་ཡང་དག་པའི་ཕྱོགས་སུ་ལོངས་མ་སྤྱད་ན། བུ་ལོན་ཅན་དུ་འགྱུར་བས་སྡིག་པ་ཚབས་ཆེན་བསགས་འགྲོ་བ་ཞིག་ཡིན། བུ་ལོན་ཅན་དུ་འགྱུར་ཚུལ་ཡང་འདི་ལྟར་ཏེ། དཔེར་ན་སྐྱབས་བསྔོའི་འདོན་ཆ་དག་ལེགས་པར་མི་ཤེས། ཤེས་ནའང་མི་ཤེས་ནའང་ཆོ་ག་ལ་སྣང་ཆུང་བྱེད་ཅིང་ཆོ་ག་ཆ་ཚང་བ་མི་འདོན། ཆ་ཚང་བ་འདོན་ནའང་དམིགས་རྣམ་ཡག་པོ་མི་སྐྱོང་། གཤིན་པོ་དང་སྦྱིན་བདག་དག་ལ་ཕན་སེམས་ཀྱི་བསམ་བློ་གཏན་ནས་མེད་པར། བཟའ་རྒྱུ་གང་དྲག་དང་འཁུར་རྒྱུ་གང་ལེགས་ཀྱི་ཀུན་སློང་རྐྱང་རྐྱང་ཁུར། དགོན་པའི་སྤྱི་རྫས་དག་ལ་ཅི་འདོད་འདོད་དུ་ལོངས་སྤྱོད། ཆོས་སློབ་སྦྱོང་ཡང་མེད། དགོན་པ་ལ་ཞབས་ཏོག་ཀྱང་མི་ཞུ། ནམ་ཡིན་རུང་དཀོར་ཟས་ཀྱི་ཕྱིར་འབྲངས་བསྡད་ན། དཀོར་བུ་ལོན་ཅན་དུ་འགྱུར་ཟེར་བ་དེ་འདྲ་ཡིན། གང་ལྟར་ཡང་དཀོར་ཟེར་བ་དེ་བག་མེད་དུ་ལོངས་སྤྱད་བྱ་མ་ཡིན་པ་ཕལ་ཆེ་བས་མཁྱེན་ཚོད་རེད། དཀོར་ནག་པོ་སྲོག་གི་སྤུ་གྲི་ཡིན། །ཟོས་དྲགས་ན་ཐར་པའི་སྲོག་རྩ་གཅོད། །ཅེས་ཟེར་སྲོལ་ཡོད་རེད། དེ་ཡིན་དུས་ངོ་ཐོག་བཤད་ན་དཀོར་ཟ་མཁན་གྱི་གང་ཟག་དེ་ལམ་ཞུགས་ཀྱི་དགེ་འདུན་ཚད་མ་ཡིན་དགོས་རེད། དེ་ལྟར་མ་བྱུང་ནའང་དགོན་པར་བསྡད་ནས་བཟུང་ཆོས་དང་སློབ་སྦྱོང་ལེགས་པོར་བྱས་ན་དཀོར་དེ་གའི་ངང་དག་འགྲོ་ཡི་ཡོད་པར་གྲུབ་དབང་རིན་པོ་ཆེས་གསུང་སྲོལ་ཡོད། སྐྱབས་རྟེན་དང་བསྔོ་རྟེན་དག་ཏུ་ག་དུས་ཡིན་ནའང་སྐྱབས་གནས་འཕགས་པའི་དགེ་འདུན་རྐྱང་རྐྱང་གསུང་གི་ཡོད་པ་རེད། འཕགས་པའི་དགེ་འདུན་ཟེར་བའང་སྒྲ་ཡངས་པའི་དབང་དུ་བྱེད་དུས། ཉོན་མོངས་སྤོང་བ་ལ་ཞུགས་པའི་སློབ་པ་ལམ་གྱི་གང་ཟག་བཞི་སྡེ་ཡན་ཆད་ལ་འཇོག་གི་ཡོད། འཕགས་ས་མ་ཐོབ་པ་རྣམས་དེ་འཐོབ་པར་བྱ་བའི་ལམ་ལ་བརྩོན་པར་ཞུགས་པའི་གང་ཟག་ཅིག་ཡིན་པའི་ཕྱིར། གྲྭ་བཙུན་བཞི་སྡེ་ཡན་ལ་འཕགས་པའི་དགེ་འདུན་གྱི་སྒྲ་བཤད་པ་ཡོད་རེད། ཡང་ན་གྲྭ་བཙུན་བཞི་སྡེ་དག་གི་ནང་ན་གཅིག་གམ་གཉིས་ལ་སོགས་པ་གང་རུང་ཞིག་འཕགས་པའི་དགེ་འདུན་དངོས་ཡོད་པའི་རྒྱུ་མཚན་གྱིས་ཀྱང་དེ་ལྟར་བཤད་པ་ཡོད་ཀྱང་དེ་ནི་དེང་གི་དུས་ན་ཁག་པོ་རེད་དྲན། མ་གཞི་ནས་ཕྱིར་འདང་ཞིག་རྒྱོབ་དང་། དེ་ཞག་ཆོས་གཟུགས་དང་ཆོས་སེམས་གཉིས་པོ་གང་ཞིག་འཕེལ་རྒྱས་སུ་འགྲོ་བཞིན་པ་རེད།
གྲུབ་དབང་དཔལ་ཆེན་འདུས་པས་བཅའ་ཡིག་མི་ཆོག་བརྒྱད་ཅུའི་ནང་། ཆོས་ཀྱི་བྱ་བ་མེད་པར་ཉིན་གཅིག་ཀྱང་སྟོང་འདུག་མི་ཆོག ཅེས་གསུངས་ཡོད་རེད། བཅའ་ཡིག་མི་ཆོག་ལྷག་མ་རྣམས་དོན་ཚན་འདིར་མ་འདུས་པ་མི་འདུག་སྙམ། སྤྱིར་བཏང་ཆོས་ཟེར་བ་དེ་གོ་རྒྱུ་མང་པོ་ཡོད་ཀྱང་། དོན་ལྡོག་ངོ་མ་བློ་བཅོས་རྒྱུ་དེ་རེད། བློ་བཅོས་རྒྱུ་དེ་སློབ་སྦྱོང་སྦྱངས་ནས་གཅིག་པུར་མ་ཡིན་པར། སྦྱངས་པ་དེ་རང་ཉིད་ཀྱི་སེམས་རྒྱུད་དང་འདྲེས་ཐུབ་ཐབས་ལ་བརྩོན་དགོས་པར་གྲུབ་དབང་ཡིད་བཞིན་ནོར་བུ་གང་གིས་དུས་རྒྱུན་དུ་གསུང་གི་ཡོད། དེ་ལྟར་བྱེད་ཐུབ་ན་དེ་ལས་ལྷག་པའི་ཉམས་ལེན་ཞིག་ད་ལྟ་ཐོས་བསམ་གྱི་སྐབས་ན་མི་འདུག་སྙམ། དབང་པོ་ཡང་རབ་ཅན་འདྲ་ཡིན་ན་མ་གཏོགས་གཞན་ད་ལྟ་སློབ་སྦྱོང་བྱེད་པའི་གནས་སྐབས་ན་ཐོས་བསམ་སྒོམ་གསུམ་ཚང་དགོས་པ་ཅན་ཡིན་པ་དེས་ན། གཙོ་བོར་ཐོས་བསམ་གཉིས་པོ་ཡ་མ་བྲལ་བ་ཞིག་རྒྱུར་བྱས་པ་དེའི་སྟེང་དུ། འཆད་རྩོད་རྩོམ་གསུམ་གྱིས་སྒྲོ་འདོགས་རིམ་བཞིན་ཆོད་པའི་ངེས་ཤེས་ཀྱི་ལྟ་བའི་ཐོག་ནས་སྒོམ་པ་བཙལ་ནས་ཉམས་ལེན་བྱ་རྒྱུ་དེ། བཤད་གྲྭ་བ་རྣམས་ལ་ལས་འགན་བབས་ཡོད་པ་སྨྲོས་ཅི་དགོས། ཚོགས་གསོག་པ་ཡིན་ནའང་འདྲ། སློབ་སྦྱོང་བ་ཡིན་ནའང་འདྲ། གཙོ་བོར་བློ་འདི་བཅོས་དགོས་པ་རྒྱ་བོད་གཞུང་ལམ་ཀུན་ཀྱི་སྙིང་པོ་རུ་རྒྱལ་བའི་བཀའ་བསྟན་ཡོངས་སུ་རྫོགས་པར་གྲུབ་བསྡད་པ་རེད། བློ་དེ་བཅོས་པར་བྱ་བའི་ཆེད་དུ་ཐབས་ལམ་དེ་ཚོ་ལ་བརྟེན་དགོས་པ་ཉག་གཅིག་རེད། དེང་སང་ཚོགས་གསོག་པ་དང་སློབ་སྦྱོང་བ་ཕལ་ཆེར་ལུས་ངག་གི་དགེ་སྦྱོར་ཕྱག་འཚལ་ཁ་ཏོན་ནམ། ཡང་ན་འཆད་རྩོད་རྩོམ་སོགས་གཙོ་བོར་བརྩི་བ་ལས། ཡིད་ཀྱི་དགེ་སྦྱོར་བློ་ལྡོག་རྣམ་བཞི་སོགས་ལ་བློ་སྦྱོང་མི་བྱེད་པ་མང་པོ་རེད། དེས་ན་ཚོགས་གསོག་པ་དང་སློབ་སྦྱོང་བ་སུ་འདྲ་ཡིན་ནའང་ཆོས་བྱེད་དགོས་ཟེར་བ་འདི་གཙོ་བོར་ཡིད་ཀྱི་ཆོས་དེ་བྱེད་དགོས་པ་ལས། ལུས་ངག་གི་ཆོས་བྱ་རྒྱུ་དེ་ཡིད་ཀྱི་ཞར་ལ་བསྐྱེད་རྒྱུ་རེད། དགེ་སྡིག་ཅི་བྱས་ཐམས་ཅད་སེམས་འདི་ལ་རག་ལས་ཡོད་པར་ཇི་ལྟར་ན་དེ་ཡང་། སེམས་ནི་ཀུན་ལ་དབང་བསྒྱུར་རྒྱལ་པོ་འདྲ། །ལུས་ནི་དགེ་སྡིག་ཀུན་ཀྱི་གཡོག་པོ་ཡིན། །ཞེས་གསུངས་ཡོད། ཉི་མ་རེ་རེར་བློ་ལྡོག་རྣམ་བཞི་རེ་རེར་རམ་གཉིས་རེར་སོགས་གང་འདོད་དུ་བློ་སྦྱངས་པ་ཡིན་ན་དེ་ཡི་སྟོབས་ཀྱིས་ངེས་འབྱུང་དང་གཞན་ཕན་དག་སྣང་སོགས་ཅི་རིགས་རིམ་བཞིན་བསྐྱེད་ཐུབ། དེ་ལྟར་བྱས་ན་ཆོས་གོས་གྱོན་ནས་ཆོས་གྲལ་དུ་བསྡད་ནའང་སྡོད་གོ་ཆོད་པ་ཡིན་ནོ།།
རྒྱ་བལ་བོད་འབྲུག་གི་ནང་བསྟན་བཤད་སྒྲུབ་ཀྱི་ལྟེ་གནས་གང་དུའང་། ཆོས་དང་སློབ་སྦྱོང་གཉིས་ཀར་སྦྱོང་ས་ཞིག་ཡོད་པ་ལས། ཆོས་བྱེད་ས་ཐ་དད་པ་ཞིག་དང་སློབ་སྦྱོང་བྱེད་ས་ཐ་དད་པ་ཞིག་གཏན་ནས་ཡོད་པ་མ་རེད་དྲན། དེས་ན་ང་ཚོས་ཆོས་དང་སློབ་སྦྱོང་གཉིས་ཀར་དོ་སྣང་སྤྲོད་དགོས་ཀྱི་འདུག ཆོས་པ་ཡིན་ཟེར་ནས་ཕྱི་ཚུལ་ནས་བསྐྱེད་ཆོག་སྔགས་བཟླས། ཕྱག་མཆོད་ཁ་ཏོན། སྐོར་བ་སོགས་ཚོགས་གསོག་གི་ལས་གཅིག་པུར་མགོ་མི་འཐོམ་པ་ཞིག་དང་། སློབ་སྦྱོང་བ་ཡིན་ཟེར་ནས་འཆད་རྩོད་རྩོམ་གསུམ་རང་ལའང་མགོ་མི་འཐོམ་པ་ཞིག་དགོས་པར་འདོད། ང་ཚོའི་གཞུང་དག་ཏུ་མཐའ་གཉིས་སུ་མ་ལྷུང་བ་ཞེས་པ་ཞིག་ཡོད་པ་རེད། ཚིག་དེ་དེང་སང་ལ་བསམས་ན་ཕྱི་ནང་གི་སློབ་གསོ་བ་གྲགས་ཅན་ཕལ་ཆེ་བས་གལ་གཙིགས་སུ་བཟུང་ནས་སློབ་གསོ་གནང་གི་ཡོད་པ་དངོས་བདེན་རེད། མཐའ་གཉིས་སུ་མ་ལྷུང་བ་དེ་སྐད་ཆ་ཤོད་དུས་དང་ལས་ཀ་ལས་དུས་སོགས་མདོར་ན་བྱ་བ་ཆེ་ཕྲ་ཆུང་ཕྲ་ཐམས་ཅད་ལ་གལ་ཆེན་པོ་ཡིན་གསུང་གི་ཡོད། ལྷག་པར་དུ་རྒྱུན་ལྡན་ཅིར་སྣང་ཐམས་ཅད་རང་གི་སེམས་ལ་དཔང་པོར་གཞག་རྒྱུ་འདི་རྙིང་རྒན་ཕ་བླ་མ་དམ་པ་དག་གི་གདམས་པ་གནད་ཅན་ཞིག་ཡིན། བཤད་གྲྭ་བ་ཚོར་བསམས་ན་གཙོ་བོར་སློབ་སྦྱོང་བྱ་རྒྱུ་དང་ཞར་ཞོར་རྣམས་སུ་ཚོགས་གསོག་གི་དགེ་སྦྱོར་རྣམས་ལའང་འབད་དགོས་ཀྱི་ཡོད་མོད་དེ། དེ་ཡང་ཕྱི་ཚུལ་ཙམ་དུ་གཙོ་ཆེ་ཆུང་ཙམ་ལས་ཡིན་རྒྱུ་མཐའ་གཉིས་སུ་མ་ལྷུང་བ་ཞིག་ཆགས་བསྡད་ཡོད། སློབ་སྦྱོང་གཅིག་པུར་དོ་སྣང་བྱེད་མཁན་ཚོས་དགེ་སྦྱོར་ལ་འབད་མཁན་ཚོར་ཁ་གཏང་རྒྱུ་དང་། དེ་བཞིན་དགེ་སྦྱོར་བ་ཚོས་སློབ་སྦྱོང་བ་རྣམས་ལ་ཁ་གཏོང་བ་སོགས་དེ་ལྟར་བྱེད་མི་ཉན་པར་མཐོང་། དེས་ན་ཆོས་དང་སློབ་སྦྱོང་གཉིས་ཀ་ལ་ཕྱོགས་སུ་མ་ལྷུང་བའི་ཐོག་ནས་དོ་སྣང་གཟབ་ནན་སྤྲོད་དགོས་ཀྱི་འདུག ཤེས་ཡོན་དར་ཁྱབ་མེད་པའི་དགོན་སྡེ་དང་ལུང་གསེབ་ཀྱི་གྲོང་ཆོག་པ་འདྲ་ཡིན་ན་སྐད་ཆ་དམིགས་བསལ་རེད། དེ་མིན་སྤྱིར་བཏང་གི་བཤད་སྒྲུབ་ཀྱི་ལྟེ་གནས་སུ་ཡོད་པའི་གྲྭ་བཙུན་སུ་ཡིན་རུང་ཆོས་དང་སློབ་སྦྱོང་གང་ལའང་དོ་སྣང་གཟབ་ནན་བྱེད་དགོས་སྙམ།
གྲུབ་དབང་ཡིད་བཞིན་ནོར་བུས་བཤད་སྒྲུབ་ཀྱི་བསྟན་པ་རྒྱ་ཆེར་བཙུགས་གནང་བ་འདིས་ང་ཚོ་རྒྱུ་ནོར་གྱིས་དབུལ་བ་ལྟ་བུ་ཞིག་རྒྱུ་ནོར་ཕྱུག་པོ་བཟོ་ཕྱིར་མིན། ང་ཚོ་ཤེས་ཡོན་བསམ་སྤྱོད་ཀྱིས་དབུལ་བ་དག་ཤེས་ཡོན་བསམ་སྤྱོད་ཉིད་ཕྱུག་པོ་བཟོ་ཕྱིར་ཡིན། དེ་བཞིན་ཡིད་བཞིན་ནོར་བུ་གང་གིས་བསྟན་པའི་ཆེད་དུ་སྐུ་ངལ་ཚད་མེད་བསྐྱོན་པ་འདི། ང་ཚོ་བག་མེད་དྲན་མེད་ངང་དགོན་པའི་སྤྱི་ཚོགས་ཀྱི་གནས་མ་ཡིན་པའི་ཕྱོགས་ལ་དུས་ཚོད་ཅི་འཁྱོལ་བྱ་ཕྱིར་མིན། དྲན་ཤེས་བག་ཡོད་དང་ལྡན་ཅིང་ལྷག་པའི་བསམ་པ་བཟང་པོས་རང་གཞན་ཀུན་ཀྱི་ཚེ་འདི་ཕྱི་གཉིས་ཀའི་ཕན་བདེའི་ལམ་པོ་ཆེ་ཉིད་བསྒྲུབ་པར་བྱ་བའི་ཆེད་ཡིན། དེས་ན་དེ་བསྒྲུབ་པར་བྱ་བའི་ཕྱིར་བསྟན་པའི་སྙིང་པོ་བཤད་སྒྲུབ་དམ་པ་འདི་གཉིས་པོ་ལ་བརྟེན་དགོས་པ་ཡིན་ཞིང་། བཤད་སྒྲུབ་འདི་གཉིས་པོའང་ཕན་ཚུན་ཡ་མ་བྲལ་བ་ཞིག་དགོས་པར་བརྟེན། རིག་གནས་ཀྱི་རྨང་གཞི་ཡི་གེ་འབྲི་ཀློག་ནས་བཟུང་། འདོན་ཕྱག་ལེན་འབུད་རྡུང་དཀྲོལ་གསུམ་དང་། གར་ཐིག་དབྱངས་གསུམ། རྒྱན་གཏོར་བཟོ་སོགས་མཐོང་བ་བརྒྱུད་པའི་ཕྱག་བཞེས་དང་། ཐོས་བསམ་སྒོམ་གསུམ། འཆད་རྩོད་རྩོམ་གསུམ་སོགས་རང་གཞན་གཉིས་ཀར་ཤེས་ཡོན་གྱི་བློ་རྒྱ་བསྐྱེད་ཕྱིར། རྒྱལ་བའི་ལམ་བཟང་བགྲོད་པའི་ཐབས་ལམ་གྱི་ཆ་རྣམ་པ་སྣ་ཚོགས་པ་མ་ཚང་བ་མེད་ཅིང་ཚང་ཞིང་ཡིད་དུ་འོང་བ་དག འདི་ལྟར་ལག་ལེན་བསྟར་དུ་ཡོད་པ་འདི་ཀུན་ལའང་ཕན་ཚུན་སྣང་ཆུང་སོགས་ཀྱིས་མཐའ་གཉིས་སུ་མ་ལྷུང་བར་དོ་སྣང་བྱེད་དགོས་པར་འདུག མདོ་དོན་ཡང་སྙིང་གཙོ་བོ་ཉིད་རང་ཅག་གྲྭ་བཙུན་སུ་ཞིག་ཡིན་རུང་དགོན་པའི་སྤྱི་ཚོགས་སུ་བསྡད་ནས་དལ་འབྱོར་དོན་ལྡན་གྱི་མི་ལུས་བཟང་པོ་འདི་ཆོས་གྲལ་དུ་གནས་པ་ཙམ་གྱིས་མི་འོས་ལ། ལུས་ཆོས་གྲལ་དུ་གནས་ནས་ཆོས་རྫིག་རི་རྫིག་ཚད་ཤོད་མཁས་པ་ཙམ་གྱིས་ཀྱང་མི་འོས་པ་དེས་ན། མི་ཆོས་བཟང་པོས་མི་ཚེའི་སྙིང་པོ་ཞིག་སྒྲུབ་དགོས་པ་དེའི་ཆེད་དུ་བཤད་སྒྲུབ་ཀྱི་ལྟེ་གནས་ཆེན་པོ་འདིར་མི་ཚེ་བསྐྱལ་ན་བསྐྱལ་གོ་ཆོད་པ་ཡིན།
འདི་ལྟར་ཕུ་མེད་མདོ་མེད་ཀྱི་དམུན་ལྡོམ་ངས་དག་སྡེབ་སྙན་གསུམ་དང་བྲལ་ཞིང་འགོ་མཇུག་ཀུན་ཏུ་རང་སྐྱོན་གཞན་གཡོག་བྱེད་པའི་ཚུལ་ཞིག་མཆིས་མོད་ཀྱང་། རང་ཉིད་གཙོར་གྱུར་རང་འདྲའི་བློ་དམན་དག་ལ་ཕན་པར་འགྱུར་ན་ཅི་མ་རུང་སྙམ་པའི་ལྷག་པའི་བསམ་པའི་དབུགས་ཆེན་འབྱིན་ཕྱིར་རིང་ནས་གདུང་བའི་རེ་བའི་རྒྱང་འབོད་ཅིག་གི་ཚུལ་དུ་འབྲི་ཁུལ་བྱས་པ་ཡིན་པས་ནོངས་པ་མཆིས་ན་དྲུངས་ནས་བཤག་པར་བགྱིའོ།།
