ངག་དབང་བློ་གྲོས། འཛིན་རིམ་བཞི་པ།
ཨ་མ་དྲན་པའི་གདུང་བ་ལྕི་མོ་ཡིས་བསྣོན་ཚེ།།
ཧ་ཅང་མགྱོགས་མྱུར་ལམ་ནས་སྟ་གོན་རང་བསྒྲུབས་ཏེ།།
ཨ་མ་རྒན་མོའི་གམ་དུ་ད་ལྟ་རང་ཕྱིན་ནས།།
ཧ་ཧ་དགོད་པའི་དགའ་སྐྱིད་སྣང་བ་ལ་རོལ་འདོད།།
ས་ཕྱོགས་ངེས་མེད་མི་ཡུལ་ལྷོ་མཐའ་རུ་འཁྱམས་དུས།།
ཤ་ཉེ་སྤུན་མཆེད་བརྩེ་དུང་ཝ་ལེར་རང་དྲན་ཀྱང་།།
ལ་ལུང་དགུ་ཡི་བར་ཐག་རིང་པོ་ཞིག་ཆོད་ནས།།
ར་བ་གཅིག་ཏུ་འཛོམས་པའི་སྐལ་བཟང་དེ་དབེན་སོང་།།
ཡ་རྐྱང་འཚོ་བ་གནས་ཟོས་བདེ་པོ་རང་ཡིན་མོད།།
འ་ཅག་མཉམ་འཛོམས་མེད་པའི་སྐྱོ་སྣང་ཞིག་སྐྱེ་དུས།།
ཟ་མ་གོས་སོགས་ཕངས་མེད་རིན་མེད་དུ་གནང་བའི།།
ཞྭ་ལྟར་བཀུར་འོས་བྱམས་ལྡན་ཨ་མ་ཁྱེད་དྲན་གྱི།།
ཝ་ལེར་ཡིད་ལ་འཆར་བའི་བཀའ་དྲིན་ལ་བསམས་ན།།
ཛ་ལང་བདག་གིས་དྲིན་ལན་འཇལ་བར་རང་དཀའ་མོད།།
ཚ་ཚ་འུར་འུར་ངང་ནས་དམ་ཆོས་ལ་བརྩོན་ཏེ།།
ཙ་རི་གནས་ཀྱི་ཨ་མའི་དྲིན་ལན་དེ་འཇལ་ངེས།།
མ་ཡུམ་ཁྱེད་ལྟར་བུ་ངའི་བདེ་སྡུག་ལ་སེམས་མཁན།།
བ་སོ་རིན་ཆེན་ལྟར་དུ་དཀོན་པོ་རུ་གྱུར་མོད།།
ཕ་གཅིག་བླ་མའི་ཐུགས་བརྩེའི་བྱམས་སྐྱོང་གི་འོག་ནས།།
པ་ཕའི་ཐུགས་དགོངས་སྒྲུབ་བཞིན་བདེ་སྐྱིད་ངང་གནས་ཡོད།།
ན་རྒས་ཨ་མའི་བྱམས་བརྩེའི་དྲོ་སྐྱིད་དེ་དྲན་ཚེ།།
ད་ལྟ་མི་ཡུལ་འདི་ནས་སྡུག་བསྔལ་འདི་ཇེ་ཆེ།།
ཐ་ཚིག་བརྟན་པོས་མ་ལོའི་བསླབ་བྱ་དེ་དྲན་ཞོར།།
ཏ་ཐཱ་ག་ཏའི་བཀའ་གསུང་སྤྱི་གཙུག་ཏུ་བཀུར་ཡོད།།
ཉ་མོའི་གཤོག་རྩལ་དབེན་པའི་བདག་ཉིད་ལ་བསམ་ཚེ།།
ཇ་ཡུན་ཙམ་ཡང་འཕུར་བའི་གོ་སྐབས་དེ་མེད་པས།།
ཆ་ལུགས་ཚུལ་མཐུན་རབ་བྱུང་གྲལ་ནང་དུ་འདུག་སྟེ།།
ཅ་ཟིང་ཆེ་བའི་གནས་ལས་ཐག་རིང་དུ་བྱོལ་འདོད།།
ང་ཡི་ཨ་མ་ཁྱེད་ལ་ཡིག་ཆུང་ཞིག་སྤྲིངས་ཡོད།།
ག་ལེར་ཁྱེད་ཀྱིས་གཟིགས་དང་མ་བུ་ཡི་དབར་གྱི།།
ཁ་གཏིང་མེད་པའི་དྭངས་གཙང་མཛའ་བརྩེ་ཡི་རང་མདངས།།
ཀ་རྩོམ་ཀྱག་ཀྱོག་འདི་ཡིས་གསལ་བཤད་ཅིག་བྱས་ཡོད།།
