བཤད་སྒྲུབ་ཉིན་བྱེད། འཛིན་རིམ་བདུན་པ།
བརྒྱ་ལོ་ཉེར་གཅིག་པའི་དུས་རབས་ནི་ཤེས་དཔལ་གྱིས་ཕྱུག་པའི་དུས་རབས་ཤིག་ཡིན་པ་ཀུན་ཀྱིས་མགྲིན་གཅིག་ཏུ་སྨྲ་ཞིང་ཡོད་ལ་དེ་ནི་དོན་ལ་ཡང་དེ་ལྟར་གནས་པ་ལྟ་བུ་ཞིག་ཀྱང་ཡིན། དེའི་རྐྱེན་པས་འཛམ་གླིང་སྤྱི་ཡོངས་ཙམ་མ་ཟད་སློབ་གྲྭ་ཁག་དང་། བཤད་གྲྭ། གྲྭ་ཚང་། དེ་བཞིན་འཇིག་རྟེན་གནག་རྫི་ཡན་ཆད་དཔལ་འབྱོར་གྱི་འབྱོར་བ་རྒྱས་ཏེ་གང་བྱེད་དང་འདི་བྱེད་མེད་པ་ལྟ་བུ་ཞིག་ཏུ་གྱུར་འདུག་པ་ནི་ངས་འུར་བརྗོད་བྱས་པ་ཙམ་མིན་པར་མངོན་སུམ་སྤྱན་ཟུང་གི་ཡུལ་དུ་གྱུར་ཡོད། དཔེ་ཆ་བཞག་ན་དེང་གི་གནག་རྫི་དང་ལུག་རྫི་དག་གིས་ཀྱང་སྦག་སྦག་གམ་འཕྲུལ་རྟར་བཞོན་ནས་ལུག་རྫིར་འགྲོ་བ་སོགས་འཇིག་རྟེན་མི་ཆོས་ལས་འདས་པའི་མཚམས་ན་སླེབས་ཡོད།
དེ་དང་ཕྱོགས་མཚུངས་འུ་ཅག་གྲྭ་བཙུན་དག་ལའང་དཔལ་འབྱོར་གྱི་འཕེལ་ཁ་དར་བ་ནི་བཤད་མི་དགོས་པ་ལྟ་བུ་ཞིག་ཡིན། དེའི་ཕྱིར་རང་ཉིད་བན་རྒན་ཞིག་ཡིན་པའི་རྐྱེན་གྱིས་གྲྭ་པའི་སྤྱི་ཚོགས་ལ་རན་ཞིང་རང་ཉིད་ཀྱི་ཉམས་མྱོང་དང་འབྲེལ་བའི་སྐད་ཆ་འགའ་བཤད་ན་འོས་ཤིང་འཚམ་པ་ཞིག་ཏུ་མཐོང་སོང་བས་དེས་ན་མི་བུ་འགའ་ཞིག་ལ་སྐུལ་ལྕག་གི་ཚུལ་དུ། ཁ་པར་བེད་སྤྱོད་གཏོང་ཕྱོགས་སྐོར་ལ་བསམ་འཆར་རམ་རེ་སྐུལ་ཕྲན་བུ་ཞིག་ཞུ་བཞིན་ཡོད་པས་ཀུན་ཀྱིས་དོ་སྣང་གནང་རོགས་ཞུ།
དེང་གི་དུས་ནི་དཔལ་འབྱོར་གྱི་ཁྲོམ་ར་ཞིག་དང་བརྡ་འཕྲིན་གྱི་དུས་རབས་ཤིག་ཡིན་ཕྱིན། ཡོད་ཚད་ཀྱི་ལག་ན་ཁ་པར་རེ་ཐོགས་རྒྱུ་མེད་པ་ཧ་ལམ་མཐོང་རྒྱུ་མེད། དེའི་ཕྱིར་ཁ་པར་བེད་སྤྱོད་མི་གཏོང་མཁན་ནི་ཧ་ལམ་ཉིན་མོའི་སྐར་མ་ལྟ་བུ་ཡིན་པ་མ་ཟད་ཁ་པར་བེད་སྤྱོད་མི་གཏོང་མཁན་གྱི་རིགས་ནི་རྗེས་ལུས་ཀྱི་རྣམ་པ་ལྟ་བུ་ཞིག་ཀྱང་ཆགས་ཡོད། དེས་རྐྱེན་པས་ཁ་པར་ལ་ཡང་སྐྱོན་ཡོན་གཉིས་ཀྱི་ཆ་ཡོད་པས་མཐའ་གཅིག་ཏུ་ཁ་པར་གྱི་སྐྱོན་རྐྱང་རྐྱང་སྒྲོག་གིན་བསྡད་ན་ཕྱོགས་སུ་ལྷུང་བའི་སྐད་ཆ་ཞིག་ལས་དོན་གནད་ག་ལ་ཡོད། དེའི་ཕྱིར་སྐྱོན་ལ་སྐྱོན་གྱིས་མཛུབ་སྟོན་དང་ཡོན་ཏན་ལ་ཡོན་ཏན་གྱིས་རྒྱན་ཆ་གླེང་ཐུབ་ན་སྐྱེ་བོ་དམ་པའི་མཛད་རྗེས་ཤིག་ཏུ་མཐོང་གི་ཡོད།
ཡིན་ན་ཡང་ཚོགས་པ་ཁག་དང་སློབ་གྲྭ་ཁག་ལ་དམིགས་བསལ་གྱི་སྒྲིག་གཞི་ཡོད་པས་དེ་དག་ལ་རྩི་མཐོང་ལོས་བྱེད། དཔེར་ན་རང་རེའི་སློབ་གླིང་ལྟ་བུ་ཞིག་ལ་ཆ་མཚོན་ན་ཁ་པར་རིགས་ནི་བཅོས་དཀའ་བའི་ནད་དུག་བཞིན་དུ་སྔོན་འགོག་བྱས་ཏེ་ཡོད་ཚད་ཀྱི་ལག་ཏུ་ཁ་པར་རེ་ཐོགས་པའི་སྤྱི་ཚོགས་ཀྱི་སྣང་བརྙན་རྫོབ་པོ་མེད་པ་མ་ཟད། ལྷ་ཁང་དང་མཆོད་རྟེན་གྱི་གཡས་གཡོན་དུ་ཞབས་སྐོར་ལ་ཕེབས་བཞིན་པའི་དགེ་འདུན་པ་དག་གི་ཕྱག་ཏུ་དཔེ་དེབ་དང་ཕྲེང་བ་ཐོགས་པ་ལས་ཁ་པར་ཐོགས་ཏེ་ཁྱིམ་པ་སུན་འབྱིན་དུ་འགྲོ་སྙམ་པའི་སྤྱོད་ལམ་ཁྱད་མཚར་པོ་དེ་མིག་གིས་མཐོང་གསལ་མེད་པ་ལྟ་བུར་གྱུར་འདུག་པ་ནི་གླིང་ཁ་འདིའི་གཟི་བརྗིད་ཅིག་དང་རྒྱན་ཆ་ཞིག་ཅི་ལ་མིན། དེ་ཡང་ལས་བྱེད་ཁ་ཤས་ཤིག་དང་དབང་ཆེན་འགའ་ཞིག་གིས་དབང་ཆ་སྒེར་གཅོད་བྱས་པ་མིན་པར་ཁ་པར་གྱི་སྐྱོན་ཆ་མཐོང་སྟེ་རྣག་ཐོག་ཏུ་གཙག་ཟེར་བ་བཞིན་ལག་ལེན་བསྟར་སོང་བས་གུས་པ་རང་ཉིད་ལྟ་བུ་ཞིག་ཡིན་ན་དེ་དག་ལ་དགའ་བསུའི་ཐལ་སྒྲ་ཡོད།
དེ་དང་ཕྱོགས་མཚུངས་ངས་བཤད་འདོད་པའི་སྐད་ཆ་ཡང་ཁ་པར་བེད་སྤྱོད་ཇི་ལྟར་གཏོང་དགོས་མིན་ལ་བསམ་འཆར་རམ་སྐད་ཆ་དུམ་བུ་ཞིག་བཤད་རྒྱུ་ཡིན། གང་ཡིན་ཟེར་ན་དེང་གི་དུས་འདིར་ཡོད་ཚད་ཀྱིས་ཁ་པར་བེད་སྤྱོད་གཏོང་གི་ཡོད་པ་ནི་གོང་དུ་ཞུས་པ་བཞིན་ཡིན། རེད་དེ་གང་ཟག་རེ་ཟུང་གིས་ཁ་པར་བེད་སྤྱོད་གཏོང་མི་ཤེས་པའམ་ཡང་ན་མཉམ་པར་མ་བཞག་པའི་རྐྱེན་གྱིས་ཚད་ལས་བརྒལ་བའི་ལས་ཀ་དེ་འདྲ་བྱེད་བཞིན་འདུག་པས་དེ་དག་ལ་ཁ་བརྡའི་ཚུལ་དུ་ཤོད་བཞིན་ཡོད། འོ་ན་ཁ་པར་ཇི་ལྟར་བེད་སྤྱོད་གཏོང་དགོས་སམ་ཞེ་ན་དེ་ཡང་ངས་འོལ་ཚོད་ཀྱི་སྐད་ཆ་སྦོམ་པོ་ཙམ་དང་གཞན་ནས་གོ་ཐོས་ཙམ་མིན་པར་རང་ཉིད་ཀྱི་ཉམས་མྱོང་དང་འབྲེལ་ནས་སྐད་ཆ་ཚིག་གཉིས་བཤད་ན་ཕན་ནུས་ཆེ་བར་མཐོང་། དེ་མིན་རང་ཉིད་གཙོ་བོ་དང་གཞན་འཁོར་ལྟ་བུར་རློམ་ནས་སྐད་ཆ་ཆེན་པོ་དེ་འདྲ་ཤོད་ཀྱི་མེད།
དེས་ན་དེང་གི་ཁ་པར་དུ་སྐད་ཡིག་ཕུན་སུམ་ཚོགས་པོ་ཡོད་པས་རང་ཉིད་སྐད་ཡིག་གང་ལ་མོས་པ་ཡོད་ཀྱང་སྐད་ཡིག་དེའི་ཐོག་ནས་ཕ་རོལ་པོར་འབྲེལ་བ་བྱེད་ཆོག་པ་ཞིག་བཟོས་ཡོད། དཔེར་ན་གྲྭ་རྒན་ཞིག་དང་ཕོ་མོ་གང་རུང་ཞིག་ཕན་ཚུན་ཁ་བརྡ་བྱེད་དགོས་ཚེ་ཡིག་ཐོག་དང་ངག་ཐོག་གཉིས་གང་རུང་ནས་འབྲེལ་བ་བྱ་ཆོག་པ་ཞིག་ཡིན་པས་ངེས་པར་དུ་ངག་ཐོག་ནས་བཤད་དགོས་པའི་ཁྲིམས་ལུགས་སུས་ཀྱང་བཟོས་མེད་ལ་དེའི་ལམ་ལུགས་ངེས་པར་སྐྱོང་དགོས་དོན་ཡང་མེད། དེའི་ཕྱིར་ཕན་ཚུན་ཁ་བརྡ་བྱེད་པའི་དུས་སུ་ཡིག་ཐོག་ནས་ཁ་བརྡ་བྱེད་ཐུབ་ཚེ་དགོས་པ་ཧ་ཅང་གིས་ཆེན་པོ་མཐོང་གི་ཡོད།
གང་ཡིན་ཞེ་ན་ཕན་ཚུན་ལ་རྩི་མཐོང་དང་གུས་བཀུར་མཚོན་ཐུབ་པ་ཙམ་མིན་པར་རང་ཉིད་ཀྱང་གཞན་གྱི་ལྟ་སྣང་མཛེས་པོ་ཞིག་ཏུ་མངོན་གྱི་ཡོད། མ་ཟད་རང་རེ་གྲྭ་བཙུན་ཞིག་ཡིན་ཕྱིན་ཆད་ཁ་པར་ལམ་ནས་སྐད་ཆེན་པོ་བརྒྱབ་སྟེ་ཉིན་མཚན་འུར་དགོས་དོན་གཏན་ནས་མེད། རྒྱུ་མཚན་ནི་ཁྱིམ་པ་བཞིན་དུ་ཕོ་མོའི་ཟློས་གར་ནི་ང་ཚོས་འཁྲབ་མི་ཆོག་ལ། ཆབ་སྲིད་པ་བཞིན་དུ་གོ་ལའི་ཇུས་གཏོགས་ནི་ང་ཚོས་བྱེད་མི་དགོས། དེ་བཞིན་ཚོང་ཟོག་གི་བྱ་བ་ཡང་ང་ཚོའི་ལས་ཀ་མིན་པས་དེས་ན་ཉིན་མཚན་ཁ་པར་ལ་འཐམས་ནས་འུར་དགོས་དོན་ཞིག་ཁྱོན་ནས་མེད། ཡིན་ཡང་སྐབས་ལ་ལར་གྲོགས་པོ་འགའ་ལ་འཚམས་འདྲི་ཞུ་བ་དང་ཅུང་ཟད་ཉོབ་སྣང་བྱུང་ཚེ་ཁ་མཚར་རྩེ་བ་སོགས་བྱེད་དགོས་དང་དགོས། དེ་ཡང་ཉེ་འཁོར་ན་མི་མང་པོ་ཡོད་པ་སོགས་བྱུང་ཚེ་ཡིག་ཐོག་ནས་འཚམས་འདྲི་ཞུ་ཐུབ་ན་ཅི་འདྲའི་ཡག་པོ་ཡོད།
དེ་མིན་ངག་ཐོག་ནས་སྐད་ཆ་བཤད་མི་ཆོག་པ་མ་རེད་དེ་ཤག་རོགས་ཡོད་པ་དང་གྲོགས་པོ་ལྷན་འཛོམས་སྐབས་སུ་ངག་ཐོག་རྐྱང་པ་ནས་སྐད་ཆ་ཤོད་ཀྱི་བསྡད་ན་ཕ་རོལ་པོར་སུན་པོ་བཟོ་བ་མ་ཟད་ཉེ་འཁོར་གྱི་མི་ཡང་སྟབས་མི་བདེ་བའི་རང་བཞིན་དུ་འགྱུར་གྱི་ཡོད། དེ་ནི་རང་ཉིད་ཀྱི་ཉམས་མྱོང་གི་སྐད་ཆ་བཤད་པ་ཙམ་ཡིན། གང་ཡིན་ཟེར་ན་ང་རང་ཉིད་གུ་དོག་པོ་ཡོད་པའི་རྐྱེན་གྱིས་ཡིན་ཤས་ཆེ། རང་ཉིད་ཀྱི་ཉེ་འཁོར་དུ་ཁ་པར་རྒྱག་མཁན་གྱི་མི་བུ་དག་གིས་སྐད་ཅོར་རྒྱག་པ་ཐོས་དུས་སེམས་ལ་མི་བདེ་བ་ཞིག་དང་དཔེ་ཀློག་གི་སྤྲོ་བ་ཡེ་ནས་བརླགས་འགྲོ་བའི་གཤིས་ཀ་ཞིག་ངང་གིས་སླེབས་ཡོང་གི་ཡོད།
ལྷག་པར་དུ་གྲྭ་ཤག་གི་སྡོད་རོགས་ཡོད་པ་ལྟ་བུ་ཞིག་ཡིན་ན་ངེས་པར་དུ་འདིའི་རིགས་ལ་དོགས་ཟོན་གནང་དགོས་པ་ཡིན། གང་ཡིན་ཞེ་ན་རང་ཉིད་ཀྱི་ཤག་རོགས་བཤད་གྲྭ་བ་ཞིག་ཡིན་ཚེ་ཧ་ལམ་དཔེ་ཆ་བ་ཞིག་ཡིན་པའི་ངེས་པ་ཡོད་པས་དཔེ་ཆ་བ་ཞིག་ཡིན་ཚེ་ཁུ་སིམ་ལྷིང་འཇགས་ཀྱི་འཚོ་བ་ཞིག་ལ་ངེས་པར་དུ་རོལ་དགོས་པ་ཡིན། དེ་ལྟར་མ་བྱུང་བར་ཤག་རོགས་ཚོས་ཛ་དྲག་ཡིན་མིན་ལ་མ་ལྟོས་པར་ཁ་པར་ལམ་ནས་སྐད་ཆ་རྐྱང་རྐྱང་བཤད་བསྡད་ན་ཤག་རོགས་དཔེ་ཆ་བ་དེར་སུན་པོ་བཟོས་པས་མ་ཚད་ཁོའི་དཔེ་ཀློག་ལ་ཡང་བར་ཆད་བཟོ་བཞིན་ཡོད། མ་ཟད་མཚན་མོ་གཉིད་པའི་དུས་ཤིག་ཡིན་ཚེ་ངེས་པར་དུ་དེའི་རིགས་ལ་ཡིད་གཟབ་བྱ་དགོས་པ་ཡིན། ང་རང་ཉིད་ལ་མཚོན་ན་མཚན་མོ་གཉིད་པའི་དུས་སུ་སྐད་བརྒྱབ་སྟེ་གཉིད་དཀྲོག་མཁན་ཞིག་བྱུང་ན་ཁོང་ཁྲོའི་མེ་ལྕེ་འབར་ཏེ་མཚན་གང་གཉིད་མི་ཁུག་པའི་དཀའ་ངལ་ཡོད་མཁན་ཞིག་ཡིན། མཚན་ལ་གཉིད་མི་ཁུག་པའི་དཀའ་ངལ་ནི་དཀའ་སྡུག་གཞན་དང་མི་འདྲ་བ་ཞིག་ཡོད་པས་དེའི་རིགས་ལ་ངེས་པར་དུ་ཤག་རོགས་ཚོས་དོགས་ཟོན་གནང་དགོས་པ་ཞིག་ཡིན།
ཤག་རོགས་ལ་ལས་རང་ཉིད་མི་ཉལ་བའི་ཁར་གཞན་ལ་གཉིད་དུ་མི་འཇུག་པར་མཚན་གང་སྐད་རྒྱག་དགོས་པའི་ལུགས་ངན་ནམ་སྤྱོད་ལམ་ཀྱག་ཀྱོག་དེ་འདྲ་སྟོན་བཞིན་ཡོད། སུ་ཞིག་ལ་ཁ་བརྡ་བྱེད་ཀྱི་ཡོད་མེད་ཤེས་ཀྱི་མེད་དེ་ཤེས་དགོས་དོན་ཡང་མེད། ཡིན་ཡང་མཚན་གང་སྐད་བརྒྱབ་ནས་སྡོད་དགོས་པའི་ལུགས་སྲོལ་ངན་པ་དེ་འདྲ་མི་བུ་འགའ་ཞིག་ལ་ཡོད་པས་དེ་འདྲའི་རིགས་ལ་བསམ་བློ་གཏོང་ཐུབ་ན་དགོས་པ་ཧ་ཅང་ཆེན་པོ་མཐོང་གི་ཡོད། གལ་སྲིད་ཁ་པར་ལམ་ནས་གཞན་ལ་ངེས་པར་དུ་འབྲེལ་བ་བྱེད་དགོས་བྱུང་ན་རང་ཉིད་ཁུ་སིམ་མེར་ཡིག་ཐོག་ནས་འབྲེལ་བ་བྱེད་པའམ་ཡང་ན་རང་ཉིད་ཀྱིས་ས་ཆ་གཞན་ཞིག་བཙལ་ནས་ཁེར་རྐྱང་ངང་འབྲེལ་བ་གནོངས་དང་རང་གཞན་སུ་ལ་ཡང་གནོད་ཚབས་མེད་དོ། །དེ་མིན་ཤག་རོགས་ལ་བསམ་བློ་མ་བཏང་བར་རང་ཉིད་རང་སྣང་གང་ཤར་ལས་ཀ་བྱས་ཚེ་ཕ་རོལ་པོ་དཔེ་ཆ་བ་ཞིག་ཡིན་ཚེ་ཁོའི་དཔེ་ཀློག་དང་གཉིད་ཙམ་ལ་བར་ཆད་བཟོས་པ་མིན་པར་ཁོའི་མི་ཚེར་བར་ཆད་བཟོ་བཞིན་ཡོད་པས་རྣམ་པ་ཚོས་དེའི་རིགས་ལ་ཅི་ནས་ཀྱང་དགོངས་པ་ཆེར་བཞེས་གནང་རོགས་ཞེས་གསོལ་བ་འདེབས་པ་ཡིན་ལགས།
གསལ་བཤད་བྱེད་དགོས་པ་ཞིག་ལ་ངས་འདི་ནས་རང་ཉིད་ཀྱི་ཤག་རོགས་དང་རང་ཉིད་ཀྱི་གྲོགས་པོ་དག་ལ་ཟུར་ཟའི་སྐད་ཆ་ཤོད་ཀྱི་མེད། ཁ་པར་གྱི་སྐྱོན་ཆ་འགའ་ཞིག་མཐོང་སྟེ་མི་བུ་འགའ་ལ་རེ་སྐུལ་ཞུས་པ་ལས་གང་ཟག་གཅིག་དམིགས་འབེན་དུ་བཟུང་སྟེ་ཉོག་གཏམ་བཤད་པ་མིན་པས་དེ་དོན་ཐུགས་ལ་དགོངས།
