དཔལ་སྤྲུལ་འཇིགས་མེད་ཆོས་ཀྱི་དབང་པོ།
་་་་་་་འདོན་ཐེངས་སྔ་མའི་འཕྲོ།
བར་དུ་ཉམས་སུ་ལེན་པའི་དུས།།
སྐྱབས་འགྲོ་འདི་ལ་འདྲ་ཞིག་ཡོད།།
ཚིག་ཙམ་གསོག་པའི་ཁ་གྲངས་གཅིག།
ཁྱེད་ཤེས་བློ་གཏད་མི་ཤེས་གཉིས།།
སྐྱབས་ཡུལ་ཁྱད་པར་མི་ཤེས་གསུམ།།
དཀོན་མཆོག་ཡོན་ཏན་མི་ཤེས་བཞི།།
རེ་འཁོང་བྱེད་པའི་སྐྱབས་འགྲོ་ལྔ།།
སྐྱབས་འགྲོ་འདྲ་སྟེ་སྙིང་པོ་མེད།།
སེམས་བསྐྱེད་འདི་ལ་འདྲ་ཞིག་ཡོད།།
རང་བཟང་འདོད་པའི་སེམས་བསྐྱེད་གཅིག།
རྣམ་སྨིན་འབྲས་བུ་འདོད་དང་གཉིས།།
ཕྱོགས་རིས་ཅན་གྱི་སྙིང་རྗེ་གསུམ།།
ཁ་ཙམ་བྱེད་པའི་སེམས་བསྐྱེད་བཞི།།
བསླབ་བྱ་མི་ཤེས་གོ་ཡུལ་ལྔ།།
སེམས་བསྐྱེད་ཟེར་ཡང་སྙིང་པོ་མེད།།
བསྐྱེད་རིམ་འདི་ལ་འདྲ་ཞིག་ཡོད།།
གསལ་སྣང་མ་ཟིན་ང་རྒྱལ་གཅིག།
ང་རྒྱལ་མེད་པའི་གསལ་སྣང་གཉིས།།
རང་རྒྱུད་འཛིན་པའི་རེ་དོགས་གསུམ།།
སེམས་བསྐྱེད་མེད་པའི་དྲག་ཤུལ་བཞི།།
དག་རྫོགས་སྨིན་གསུམ་མི་སྦྱོར་ལྔ།།
བསྐྱེད་རིམ་ཟེར་ཡང་འཁོར་བའི་རྒྱུ།།
རྫོགས་རིམ་འདི་ལ་འདྲ་ཞིག་ཡོད།།
འོད་གསལ་མི་ཤེས་རྩ་རླུང་གཅིག།
སྒྱུ་མར་མི་འབྱོངས་རྨི་ལམ་གཉིས།།
རྩ་མདུད་མི་ཁྲོོལ་ཐབས་ལམ་གསུམ།།
གྲོལ་ལུགས་མི་ཤེས་ཕྱག་རྫོགས་བཞི།།
སྣང་ངོར་ཞེན་པའི་ཐོད་རྒལ་ལྔ།།
རྫོགས་རིམ་ཟེར་ཏེ་སྙིང་པོ་མེད།།
ཐ་མ་བསྒྲུབས་འབྲས་འབྱིན་པའི་དུས།།
གཞན་དོན་བྱེད་ལ་འདྲ་ཞིག་ཡོད།།
ཉམས་སྣང་བསྒུགས་པའི་མངོན་ཤེས་གཅིག།
ལྷ་འདྲེས་བརླམས་པའི་གྲུབ་རྟགས་གཉིས།།
ཆོས་བརྒྱད་སྒྲུབ་པའི་ཆོས་བཤད་གསུམ།།
ཆོས་ལ་མི་འཁོད་འཁོར་སྡུད་བཞི།།
རང་ཉམས་མེད་པའི་ཁྲིད་བཤད་ལྔ།།
འགྲོ་དོན་འདྲ་སྟེ་སྙིང་པོ་མེད།།
འདྲ་མིན་ལྔ་བཅུ་རྩ་ལྔ་འདི།།
གཞན་སྐྱོན་ལྟ་བའི་མེ་ལོང་མིན།།
ངས་ཀྱང་རང་ལ་གསལ་འདེབས་ཡིན།།
ཁྱེད་ཀྱང་རྒྱུན་དུ་ཐུགས་ལ་ཆོངས།།
ལྟར་སྣང་ཆོས་བཞིན་བྱེད་པའི་དུས།།
འདྲ་མིན་གོལ་ས་བྱུང་མ་བྱུང་།།
ཞུ་དག་ཞིབ་ཏིག་ནན་ཏན་དགོས།།
ཚིག་ལ་སྙན་ཆ་མི་ཆེ་ཡང་།།
དོན་ལ་ཟབ་རྒུའི་རོ་བཅུད་གདའ།།
མཚུངས་མེད་བླ་མའི་ཞལ་རྒྱུན་ཡིན།།
སྙིང་ནས་དམ་ཆོས་མཛད་དགོངས་ན།།
ཁ་ཕོ་ཁ་བཤད་བྱེད་རྒྱུ་མེད།།
ཤོམ་ར་བཅའ་ག་བསྒྲིག་རྒྱུ་མེད།།
དུས་ཚོད་ངེས་བཟུང་བྱེད་རྒྱུ་མེད།།
ཕར་ལ་ཆོས་སྙོགས་འགྲོ་མི་དགོས།།
ལྷ་ཆོས་ལུས་དང་ཡན་ལག་འདྲ།།
ནམ་དགོས་རང་གི་དྲུང་ན་ཡོད།།
སྐད་ཅིག་རེར་ཡང་སྙིང་རུས་དགོས།།
ཐང་ཅིག་རེར་ཡང་གསལ་འདེབས་དགོས།།
ཡུད་ཙམ་རེར་ཡང་ཞུ་དག་དགོས།།
ཉིན་ཞག་རེར་ཡང་བསྔོ་བགྲང་དགོས།།
ནངས་མ་རེ་བཞིན་དམ་བཅའ་དགོས།།
ཐུན་རེ་བཞིན་དུ་བརྟགས་དཔྱད་དགོས།།
ཞར་དང་ཞོར་ལ་མི་འབྲལ་དགོས།།
དུས་དང་རྒྱུན་དུ་མི་བརྗེད་དགོས།།
ཉམས་ལེན་ཞིབ་ལ་མ་ཕེབས་ན།།
ཤོམ་ར་ཆེ་བའི་ཆོས་པ་དེ།།
ཆོས་གཟུགས་འོང་བའི་དོན་འབྲས་མེད།།
ལེ་ལོས་རི་ལ་ཁྱེར་དང་གཅིག།
རྣམ་གཡེངས་དགོན་པར་སྒྲུབ་དང་གཉིས།།
སྐྱིད་འདོད་དབེན་པར་འཚོལ་དང་གསུམ།།
དེ་ལས་སྡུག་པ་སྲིད་ན་མེད།།
དགོངས་སམ་གསེར་སྦྲང་ལྷ་ཡི་སྲས།།
སྐྱིད་ན་མི་དགའ་སྡུག་ན་དགའ།།
སྐྱིད་ན་ཉོན་མོངས་དུག་ལྔ་འབར།།
སྡུག་ན་སྔོན་བསགས་ལས་ངན་འཛད།།
སྡུག་བསྔལ་བླ་མའི་ཐུགས་རྗེ་ཡིན།།
བསྟོད་ན་མི་དགའ་སྨད་ན་དགའ།།
བསྟོད་ན་ང་རྒྱལ་ཁེངས་སེམས་ཆེ།།
སྨད་ན་རང་སྐྱོན་ཐེར་ལ་འབུད།།
མི་ཁ་ལྷ་ཡི་ཕ་འབབ་ཡིན།།
མཐོ་ན་མི་དགའ་དམའ་ན་དགའ།།
མཐོ་ན་ཕྲག་དོག་ང་རྒྱལ་སྐྱེ།།
དམའ་ན་བག་ཡངས་དགེ་སྦྱོར་འཕེལ།།
དམན་ས་གོང་མའི་གདན་ས་ཡིན།།
འབྱོར་ན་མི་དགའ་རྒུད་ན་དགའ།།
འབྱོར་ན་གསོག་སྲུང་སྡུག་བསྔལ་ཆེ།།
རྒུད་ན་དཀའ་སྤྱད་ལྷ་ཆོས་འགྲུབ།།
སྤྲང་ལུས་ཆོས་པའི་གཏད་སོ་ཡིན།།
བྱིན་ན་མི་དགའ་འཕྲོགས་ན་དགའ།།
བྱིན་ན་ལན་ཆགས་ཁུར་པོ་འཕེལ།།
འཕྲོགས་ན་ཚེ་རབས་བུ་ལོན་སོད།།
ཆོག་ཤེས་འཕགས་པའི་སྤྱི་ནོར་ཡིན།།
གཉེན་ལ་མི་དགའ་དགྲ་ལ་དགའ།།
གཉེན་གྱིས་ཐར་ལམ་བར་དུ་གཅོད།།
དགྲ་བོ་བཟོད་པའི་ཡུལ་དུ་བྱེད།།
རོ་སྙོམས་ཉམས་ལེན་གནད་འགག་ཡིན།།
ཆོས་བཞིན་མཛད་ན་དེ་འདྲ་དགོས།།
བློ་ཐག་ཆོད་ན་དེ་འདྲ་དགོས།།
རི་ཁྲོད་འཛིན་ན་དེ་འདྲ་དགོས།།
རྒྱལ་ཁམས་འགྲིམས་ན་དེ་འདྲ་དགོས།།
གདམས་ཟབ་གནད་ཀྱི་མདོ་འགག་དྲུག།
ཕ་གཅིག་བླ་མའི་ཞལ་རྒྱུན་ཡིན།།
བུ་གཅིག་སེམས་ཀྱི་གཏད་སོ་ཡིན།།
སྙིང་གི་སྙིང་པོ་ཚིག་དྲུག་འདི།།
གྲོགས་གཅིག་ཁྱོད་རང་མ་ལགས་པ།།
གཞན་ལ་ཚིག་ཟུར་ཕུད་པ་མེད།།
ཨེ་མ་གསེར་སྦྲང་ལྷ་ཡི་སྲས།།
གནས་ལ་རྩེ་མཐོ་པདྨའི་རི།།
ལྷ་གཅིག་སྒྲོལ་མའི་ཞིང་ཁམས་ཡིན།།
ཐུགས་རྗེ་ཆེན་པོའི་ཕོ་བྲང་ཡིན།།
པདྨ་རྒྱལ་པོའི་སྒྲུབ་གནས་ཡིན།།
རི་ལ་ལྟོས་དང་འཕགས་པའི་སྐུ།།
སེམས་ཉིད་ངལ་གསོའི་བཀོད་པ་རྫོགས།།
བྲག་ལ་ལྟོས་དང་འཕགས་པའི་གསུང་།།
རང་བྱོན་ཡིག་དྲུག་བགྲང་ལས་འདས།།
ཤིང་ལ་ལྟོས་དང་སྔོ་ལྗང་ཚལ།།
གཡུ་ལོ་བཀོད་པའི་ཁྱད་ཆོས་རྫོགས།།
དུག་སྦྲུལ་གདུག་པས་མཐའ་ནས་བསྐོར།།
སྐལ་དམན་བློ་ཆུང་བགྲོད་པར་དཀའ།།
གྲུ་འཛིན་རི་བོའི་མཚན་ཉིད་རྫོགས།།
མདུན་ན་ཐུགས་སྤྲུལ་པདྨ་སྐྱེས།།
འགྲོ་བའི་དོན་ལ་སྤྲུལ་པ་འགྱེད།།
འདབས་ན་འཕགས་མའི་ཕོ་བྲང་མཛེས།།
ལྷ་མོའི་འགྲོ་དོན་དུས་ལ་བབས།།
ཐུགས་རྗེ་ཆེན་པོའི་ཐུགས་ཀ་ན།།
པདྨ་དགྱེས་པའི་སྒྲུབ་ཕུག་ཡོད།།
ལྷ་ལ་སྤྱན་རས་གཟིགས་དབང་བསྟེན།།
སྔགས་ལ་ཡི་གེ་དྲུག་མ་བཟླ།།
ཆོས་ལ་བྱམས་དང་སྙིང་རྗེ་བསྒོམ།།
ལམ་ལ་རྒྱལ་སྲས་བདེ་ལམ་སྙོགས།།
སྡུག་བསྔལ་འདོད་ཀྱང་བདེ་བ་འབྱུང་།།
འདི་བདེ་ཕྱི་སྐྱིད་ཨ་ལ་ལ།།
བདེ་ནས་བདེ་བའི་གནས་སུ་འགྲོ།།
གཏན་བདེ་མི་འགྱུར་ཨ་ལ་ལ།།
གསོལ་བ་བླ་མ་རྗེ་ལ་འདེབས།།
ཐུགས་རྗེ་མི་གཡེལ་ཨ་ལ་ལ།།
ཡི་དམ་སྤྱན་རས་གཟིགས་ལ་ཞུ།།
དངོས་གྲུབ་མི་འགྱང་ཨ་ལ་ལ།།
ཨ་ལ་ལ་སྟེ་ངོ་མཚར་ཆེ།།
ཆེ་བར་དགོངས་སམ་ལྷ་ཡི་སྲས།།
ངས་ཀྱང་སྙིང་གི་དམ་བཅའ་གཅིག།
ཁྱེད་ཀྱང་ཡིད་ཀྱི་ཞེ་འདོད་གཉིས།།
མཐུན་ན་གོང་མའི་རྗེས་སུ་སྙོགས།།
ཆོས་བརྒྱད་ལམ་ཁའི་རོ་བཞིན་དོར།།
འདི་སྣང་གནོད་པའི་དུག་ལྟར་སྤང་།།
ཉམས་ལེན་བརྩོན་འགྲུས་ཞིབ་ལ་བྱེད།།
གདམས་ངག་མཚང་གི་ཐོག་ཏུ་འབེབས།།
ཁ་ཕོ་ཁ་བཤད་རླུང་ལ་བསྐུར།།
སེམས་བསྐྱེད་བྱང་སེམས་གཞུང་ལམ་བསྲང་།།
དེ་ལྟར་འཐད་ན་གྲོས་རྐང་ཚུགས།།
གྲོས་མཐུན་འགྲིག་པའི་སྤུན་གྲོགས་གཉིས།།
ཐར་པའི་ལམ་ལ་འགྲོགས་ནས་འགྲོ།།
འཁོར་བའི་མཐའ་ལ་སྨོན་པས་བསྐྱང་།།
ཚེ་རབས་ཀུན་ཏུ་འབྲེལ་བས་བསྡུ།།
བྱང་ཆུབ་སྤྱོད་པ་མཉམ་དུ་སྤྱོད།།
འཐད་དམ་དགོངས་སམ་ལྷ་ཡི་སྲས།།
དོན་དུ་འདུའོ་ཨ་ལ་ལ།།
གནད་དུ་འདྲིལ་ལོ་ཨེ་མ་ཧོ།།
ཞེས་ཟེར་བས་འདབ་ཡངས་ཀྱི་ཡིད་ལའང་ལྷག་པར་འཐད་དེ་བློ་གྲོས་མཐཪ་ཕྱིན་པ་ཡིན་སྐད་དོ།།
སྟོན་མཚན་མཁའ་ལ་རྒྱས་པའི་འོད་དཀར་བཞིན།།
མཚན་དཔེའི་ལང་ཚོ་ངོམ་པ་འཇམ་པའི་ལྷ།།
རྒྱལ་བ་ཀུན་ལ་ཡེ་ཤེས་སེམས་དཔའ་སྟེ།།
འགྲོ་བ་ཀུན་ལ་སེམས་ཀྱི་ཆོས་ཉིད་ཡིན།།
མཐའ་ཡས་འགྲོ་ཁམས་སྡུག་བསྔལ་རང་བཞིན་ལ།།
བྱམས་པའི་ཕྱག་ཡངས་རྐྱོང་བ་མིག་མི་འཛུམ།།
རྒྱལ་བ་ཀུན་ལ་ཐུགས་རྗེ་ཆེན་པོ་སྟེ།།
འགྲོ་བའི་ཁམས་ལ་ཐར་པའི་ས་བོན་ཡིན།།
གསང་ཆེན་གསང་བ་ཟབ་མོའི་མཛོད་འཛིན་པ།།
རྒྱལ་ཀུན་གསང་བའི་བདག་པོ་རྡོ་རྗེ་ཅན།།
རྒྱལ་བ་ཀུན་ལ་ཡེ་ཤེས་ཕྲིན་ལས་ཏེ།།
འགྲོ་བའི་ཁམས་ལ་རིག་སྟོང་རྗེན་པར་བཞུགས།།
གསོལ་བ་འདེབས་སོ་རྒྱལ་སྲས་རིགས་གསུམ་མགོན།།
བྱིན་གྱིས་རློབས་ཤིག་དབྱེར་མེད་བླ་མ་རྗེ།།
བྱང་ཆུབ་བར་དུ་རིགས་བདག་མི་འབྲལ་ན།།
དུས་ཀུན་ཐུགས་རྗེས་ཟུངས་ཤིག་ཐུགས་རྗེ་ཅན།།
ལྷ་ཆོས་དང་མཐུན་པའི་གཏམ་པདྨའི་ཚལ་གྱི་ཟློས་གར་ཞེས་བྱ་བ། བུ་བཀྲ་ཤིས་དགེ་ལེགས་ཀྱིས་ཚིག་རྩ་བཞག་ནས་རྩོམ་པར་བསྐུལ་བ་ལྟར་བག་ཡངས་ཤྲཱི་ལྷོད་པོས་སུག་བྲིས་སུ་བྱས་པའོ།། །།
དགེའོ།།
རྣམ་དག་ལྷ་ཆོས་སྤྱོད་པའི་ཚུལ།།
སེམས་དཔའ་ཆེན་པོའི་ཞལ་ལུང་མཆོག།
ཐར་འདོད་ཡོངས་ཀྱི་དགའ་སྟོན་འདིར།།
གཏམ་ཚོགས་ཕལ་གྱིས་འགྲན་ཟླ་མིན།།
དེ་ཕྱིར་གནམ་སའི་དབང་ཕྱུག་གིས།།
གཉེར་མཛོད་ཚེ་རིང་དོན་གྲུབ་ནས།།
ཆོས་སྦྱིན་པར་དུ་བསྒྲུབས་པའི་དགེས།།
འགྲོ་ཀུན་རྣམ་གྲོལ་རྒྱུར་གྱུར་ཅིག།
སརྦ་དཱ་ཀ་ལྱཱ་ཎཾ་བྷ་བ་ཏུ།། །།
