རིག་འཛིན་རྒྱལ་མཚན། ལོ་རིམ་དགུ་པ།
ཨ་ཧོ། ཐོག་མཐའ་དབུས་མེད་འདུས་མ་བྱས་པའི་དབྱིངས།།
ཡེ་ཤེས་རང་རྩལ་རྫོགས་པའི་དཀྱིལ་འཁོར་དུ།།
མཁྱེན་བརྩེ་ནུས་པའི་གཏེར་གྱིས་རབ་ཁེངས་པའི།།
མཚུངས་མེད་སྐུ་གསུང་ཐུགས་ལྡན་སངས་རྒྱས་མཆོག།
བདག་སོགས་མཁའ་ཁྱབ་ལུས་ཅན་མ་ལུས་པ།།
རྣམ་གཡེང་འདམ་རྫབ་ཆེ་ལས་འདོན་སླད་དུ།།
རྨད་བྱུང་བྱང་ཆུབ་ལམ་པོ་ཆེ་སྟོན་པ།།
ས་སྟེང་འདི་ན་ཀུན་ལས་མངོན་པར་འཕགས།།
སྨྲ་བསམ་བརྗོད་པའི་མཚོ་ཆེན་ལས་འདས་ཤིང་།།
ཆགས་བྲལ་ལམ་དང་འགོག་པར་རྣམ་རོལ་བ།།
རྒྱལ་ཀུན་ཡེ་ཤེས་གཅིག་འདུས་ཡུམ་ཆེན་མོ།།
དུག་གསུམ་སེལ་བའི་གཉེན་པོ་དམ་ཆོས་མཆོག།
བདེན་པའི་དོན་ཆེན་སྒྲིབ་བྱེད་རྣམ་རྟོག་གི།
རབ་རིབ་སྣ་ཚོགས་ལེགས་པར་འཇོམས་མཛད་པའི།།
ཟབ་གསལ་ཆོས་ཀྱི་ཉི་མ་གང་དེ་ཉིད།།
སྲིད་འདིར་ཤེས་བྱ་ཀུན་ལས་རླབས་པོ་ཆེ།།
གང་གི་ཐུགས་ཡངས་མཚོ་ཆེན་སྔོན་པོ་ལ།།
ཇི་ལྟ་བ་དང་ཇི་སྙེད་མཁྱེན་པའི་བཅུད།།
རབ་ཏུ་འཁྱིལ་བས་གཞན་གྱི་དོན་ལ་མཁས།།
སློབ་པའི་རིག་གྲོལ་འཕགས་པའི་དགེ་འདུན་མཆོག།
ངེས་དོན་སེམས་དཔའ་བྱམས་ཆེན་རི་བོ་ནས།།
འགྲོ་རྣམས་བསོད་ནམས་ཅན་གྱི་སྐྱེད་ཚལ་དུ།།
རྨད་བྱུང་བརྩེ་བའི་འོད་སྟོང་ལེགས་ཤར་བས།།
ཕན་བདེ་པདྨོའི་འཛུམ་མདངས་རྒྱས་མཛད་ཆེ།།
མདོར་ན་སྤངས་རྟོགས་མཐར་ཕྱིན་རྫོགས་སངས་རྒྱས།།
ཐོག་མཐའ་བར་ཀུན་དགེ་གྱུར་དམ་པའི་ཆོས།།
དགེ་གྲོགས་རྒྱལ་སྲས་དམ་པ་དགེ་འདུན་ཏེ།།
དཀོན་མཆོག་རིན་ཆེན་རྣམ་གསུམ་སྙིང་ནས་བསྟོད།།
བདག་འདྲས་མཆོག་གསུམ་དམ་པ་བརྗོད་དཀའ་ཡང་།།
ཅུང་ཟད་སྤྲོས་པ་དད་པའི་སྒྲ་དབྱངས་འདིར།།
རྟེན་འབྲེལ་དབང་གིས་རྣམ་དཀར་ཅུང་མཆིས་ན།།
གྲུབ་དབང་བླ་མའི་ཐུགས་དགོངས་རྫོགས་ཕྱིར་བསྔོ།།
