ལོ་རིམ་བཞི་པའི་སློབ་གཉེར་བ། བཀྲ་ཤིས་དཔལ་འབྱོར།
སྒེག་པའི་ཉམས།
ཀ་ཁ་སྦྱོང་བའི་ན་མཉམ་བྱིས་པ་རིག་གསར་སློབ་ལ་ཧུར་གྱིས་བསྐྱོད།།
ཁ་རོག་ལུས་པའི་རྫི་བོ་ང་ནི་སྡུག་གིས་མནར་ནས་ཧད་དེ་ལུས།།
ག་ས་ག་ལ་རྩེ་གྲྭ་བཟོས་ནས་སློབ་ལ་འགྲོ་བའི་ཚུལ་དག་བྱས།།
ང་ཡང་ཉིན་གཅིག་ཆོས་ལ་རྒྱུག་ཅེས་སྙན་པའི་གསུང་གིས་བ་སྤུ་གཡོས།།
དྲག་ཤུལ་གྱི་ཉམས།
ཅ་དག་བྱས་པའི་གཤིས་རྒྱུད་མཁྲེགས་པོ་སྒྲིགས་ལམ་ངར་མའི་མེ་ལྕེར་བསྲེགས།།
ཆ་མེད་ཡུལ་དང་རྒྱུས་མེད་གྲོགས་ཀྱི་འཁྱག་རོམ་དག་ལ་ངར་བླུད་སྟབས།།
ཇ་ཆང་སྐྱིད་འདོད་འབའ་ཞིག་རེ་བའི་ཐོག་མ་མེད་པའི་དགྲ་བོ་ཁྱོད།།
ཉ་འཛིན་ལྕགས་ཀྱུའི་བློ་གསར་རྩེ་ནས་ཁྱོད་སྲོག་ད་ནི་ཐར་སྲིད་དམ།།
དཔའ་བའི་ཉམས།
ཏ་ཐཱ་ག་ཏའི་བསྟན་པ་རིན་ཆེན་ཆ་ཤས་ཙམ་ཡང་མ་རྟོགས་ལ།།
ཐ་སྙད་རིག་པའི་རྒྱ་མཚོ་ཆེ་ལས་ཟིལ་པ་ཙམ་ཞིག་མ་ལོན་ཡང་།།
ད་དུང་ང་ནི་མང་ཚོགས་དབུས་སུ་མགོ་འཕང་ཡར་ལ་འདེགས་ནུས་པ།།
ན་རཀ་དམྱལ་བའི་གཏིང་མདོར་ལྷུང་བའི་རྒྱུ་དག་རྩོམ་པ་ཡིན་ནམ་ཅི།།
སྙིང་རྗེའི་ཉམས།
པ་ཏྲ་པདྨའི་ཁྲི་འཕང་སྟེང་དུ་ནམ་ཞིག་འགྱིང་བ་སྲིད་འགྱུར་ཡང་།།
ཕ་རོལ་ཉོན་མོངས་དབང་དུ་སོང་སྟབས་ཚུལ་འཆོས་སྒྱུ་མའི་བྲོ་གར་དེས།།
བ་གླང་གནས་དང་མེ་འོབས་ཡུལ་དུ་ལས་ཀྱི་ཞགས་པས་འཐེན་དུ་འཇུག།
མ་རུང་གཡོ་བའི་བསམ་པ་ཇི་ཡོད་དེ་དུས་བེད་མེད་ཀྱེ་མ་ཧུད།།
མི་སྡུག་པའི་ཉམས།
ཙ་རི་བསྐོར་ཡང་དཀོར་ཟས་སྒྲུག་ལ་སྨྱོ་རྒྱུག་སློང་བ་སྤྲང་ཁྱིའི་ཚུལ།།
ཚ་ཟུག་ན་གཟེར་ཕྲན་ཙམ་མི་བཟོད་སྨྲེ་སྔགས་སྤྱང་ཀིའི་ངུ་འབོད་སྒྲོག།
ཛ་ར་ཛོ་རེའི་ལྭ་བ་གྱོན་ནས་ཛ་ལང་སྐྱུར་སྤྱོད་གང་སར་སྟོན།།
ཝ་ལྟར་ཞུམ་ཞུམ་རང་དོན་སྒྲུབ་ལ་གཡོ་སྒྱུའི་དྲི་ངན་རྒྱང་ནས་ལྡང་།།
བཞད་གད་ཀྱི་ཉམས།
ཞ་སྨྱུག་ཐོགས་པའི་ཡིག་མཁན་ཆེན་པོ་ལོ་མང་སྦྱངས་པ་ཡོད་རབས་ཆེ།།
ཟ་བཟོ་མེད་པའི་འཁྱུག་ཡིག་འབུ་རྗེས་བོང་བུ་དལ་གྱི་ཉམས་འགྲོས་ཅན།།
འ་ཅག་རང་ཡང་མཇལ་འདོད་མེད་ན་གཞན་དག་མིག་ཞགས་འཕེན་འདོད་ཅི།།
ཡ་མེད་མ་གཏོང་འབད་པ་གཟབ་མོས་ཞ་ཀྱོག་གཟུགས་ལ་ཆག་ཆིངས་བྱོས།།
རྨད་བྱུང་གི་ཉམས།
ར་ས་འཕྲུལ་སྣང་གཟི་བརྗིད་འཕྲོག་པའི་གསེར་ཁང་འཛིན་མའི་རྒྱན་གྱུར་པ།།
ལ་ཕྱི་གངས་ཀྱི་དབེན་གནས་དོ་བའི་མཚམས་ཁང་ཆོས་ཀྱི་འབྱུང་གནས་དང་།།
ཤ་ཁྲག་དྲོན་མོ་ཁྲོ་ཆུར་བསྲེས་པའི་ལམ་ངན་འགོག་པའི་དཔལ་ཡོན་ཅན།།
ས་ཕྱོགས་དག་ཞིང་འདི་འདྲ་སྲིད་ན་ཤིན་ཏུ་ནས་ཀྱང་དཀོན་པ་མཚར།།
འཇིགས་རུང་གི་ཉམས།
ཧ་ཧ་སྐྱེ་མེད་སྟོང་ཉིད་སྒྲ་ཡིས་སྐྱེ་བའི་ཟུག་རྔུ་རྡུལ་དུ་རློག།
ཨ་ཁ་བདེན་མེད་ཉི་ཚེའི་རང་ཚུགས་སྤྲོས་བྲལ་སྡེར་མོས་དུམ་བུར་གཏུབ།།
ཨ་ཧ་བདེན་མེད་ཆོས་ཉིད་རིགས་པའི་མེ་ལྕེ་དེ་ཡིས་རྩད་ནས་སྲེག།
ཀ་དག་ཞལ་གྱིས་སྣང་སྲིད་ཐམས་ཅད་ཁམ་གཅིག་གིས་ནི་ཞལ་དུ་འདེབས།།
