སྤྲུལ་སྐུ་བསྟན་པ་རྒྱལ་མཚན། ལོ་རིམ་བཞི་པ།
བགྲང་བྱ་ཉིས་སྟོང་ཡར་སྔོན་ཞིག་ལ་རྟེན་འབྲེལ་ལྟ་བའི་དབུ་ཁྱུད་བྲིས།།
མཚན་གྱི་སྙན་པ་སྲིད་ན་ལྡིར་བ་སྟོན་པ་ཤཱཀྱ་ཐུབ་པ་དེས།།
གང་གི་ཞལ་གསུང་ཡང་དག་ཡིན་ཞེས་ལམ་སང་འཇུག་པ་མ་ཡིན་པར།།
རིགས་པའི་ལམ་ནས་ཞུན་ཐར་ཆོད་ཅེས་བདེན་ཚིག་ང་རོ་གཟེངས་མཐོར་བསྒྲགས།།
ཕྱོགས་གླང་ཆོས་གྲགས་དགེ་སློང་ཡིན་ཏེ་གོ་མཚོན་ལག་ཆ་ཐོགས་པ་མིན།།
ནང་བསྟན་རིང་ལུགས་དྲི་མ་མེད་པར་མུ་སྟེགས་འདྲེ་ལག་སྲིང་དུས་སུ།།
ཆོས་གོས་གསེང་ནས་རིགས་པའི་མེ་རླབས་ཚ་ཚ་འུར་འུར་བཀྱེས་པ་ལས།།
གཞན་སྡེ་སྨྲ་བའི་ལྕེ་ལེ་ནར་མོ་ཨ་ལན་མེད་པའི་གནས་སུ་སྦྱར།།
འཕྲོག་བྱེད་དགའ་བོ་ཕམ་པར་བྱེད་མཁན་མཁས་པ་སུ་ཡང་མ་བྱུང་སྟེ།།
ས་སྐྱ་པཎ་ཆེན་བརྒལ་བརྟག་རིགས་པའི་འཁོར་ལོ་བསྐོར་བའི་མོད་ཉིད་ལ།།
ཕས་རྒོལ་ངན་པའི་སྤོབས་པ་བསྙིལ་ཞིང་ཚར་བཅད་རྗེས་སུ་བཟུང་བ་ལས།།
རྒྱལ་བའི་རྟགས་སུ་རལ་བའི་ལན་བུ་གངས་རིའི་ལྗོངས་སུ་བསྣམས་སོང་སྐད།།
སྔ་འགྱུར་བསྟན་པའི་ཤིང་རྟ་ཆེན་པོ་ཀུན་མཁྱེན་ཀློང་ཆེན་རབ་འབྱམས་པ།།
དབུས་ཀྱི་གསང་ཕུའི་ཆོས་གྲྭ་ཆེན་པོར་རིགས་པ་སློབ་པའི་རྣམ་ཐར་ཐོས།།
ཕྱི་རབས་གདུལ་བྱའི་སྐལ་བར་བཞག་པའི་དཔྱད་གསུམ་དག་པའི་གསུང་རྩོམ་དག།
ལུང་དང་རིགས་པའི་གཟི་འོད་འཕྲོས་ཡོད་མངོན་སུམ་མིག་གི་མཐོང་ཆོས་ཡིན།།
མཁས་པའི་དབང་པོ་ཙོང་ཁ་པ་སྟེ་རྒྱན་དྲུག་མཆོག་གཉིས་རིང་ལུགས་འཛིན།།
སྐུ་ཚེ་གང་པོར་རིགས་པའི་གཞུང་ལ་གསན་བསམ་སྒོམ་གསུམ་ཡ་མ་བྲལ།།
མང་དུ་ཐོས་པ་རྒྱ་མཚོའི་མདུན་སར་འཇིགས་མེད་སྤོབས་པས་གྲྭ་སྐོར་ཕེབས།།
ཚུལ་གསུམ་རིགས་པའི་གོམ་སྟབས་གཅིག་གིས་རྨད་བྱུང་ཕྲིན་ལས་འོད་དུ་བཟླུམས།།
མདོར་ན་རིགས་པའི་སེང་ཆེན་ཀུན་ཀྱི་དགོངས་འགྲེལ་བསྟན་བཅོས་མ་ལུས་པར།།
དངོས་སྟོབས་རིགས་པའི་འཕྲུལ་གྱི་སྒོ་ནས་དགག་བཞག་སྤོང་གསུམ་མཛད་པ་དེ།།
རིགས་ལམ་དེ་ཉིད་མེད་དུ་མི་རུང་གལ་འགངས་ཅན་དུ་གཟིགས་པ་ལས།།
སྟོན་པའི་གསུང་ལ་ཤར་བསྐྱོད་གནང་བའི་འབྲས་རྟགས་ཡང་དག་ཉིད་དུ་འཁུམས།།
བོད་ལ་མ་གཏོགས་འཕགས་པའི་ཡུལ་དུ་དར་མྱོང་མེད་པའི་ལམ་སྲོལ་དེ།།
ཕྱྭ་བ་ཆོས་ཀྱི་སེང་གེ་ཞབས་ཀྱིས་གསར་དུ་གཏོད་པར་གྲགས་པ་ཡི།།
རྩོད་པའི་ཉམས་འགྱུར་སྟངས་སྟབས་དང་འགྲོགས་གུས་རྟག་བརྩོན་པ་བསྐྱེད་ནས་སུ།།
གཞུང་ལུགས་རབ་འབྱམས་གཏིང་མཐའ་བསྔོག་ལ་འཇུག་པར་མཛོད་ཅིག་གྲོགས་གཅེས་ཚོ།།
རྐང་པ་ལག་པ་བསྐུམས་ནས་མ་སྡོད་རིགས་ལམ་རྩོད་པའི་འགྲོ་སྟངས་མིན།།
སྐད་ངག་ཆུང་ཆུང་ལྡབ་ལྡིབ་མ་སྨྲ་རིགས་ལམ་རྩོད་པའི་འགྲོ་སྟངས་མིན།།
བསམ་བློའི་འཁོར་སྐྱོད་བཏང་སྙོམས་མ་འཇོག་རིགས་ལམ་རྩོད་པའི་འགྲོ་སྟངས་མིན།།
ཐོགས་རྡུགས་མེད་པའི་རྣམ་དཔྱོད་མདའ་མོ་ཤ་ར་མ་ར་འབེན་ལ་ཕོངས།།
ལུས་ཀྱི་ཚུགས་ཀ་འཁྲུག་ཆ་དོད་པོས་སྔ་རྒོལ་ཕྱི་རྒོལ་ཡིད་མུག་སངས།།
ངག་གི་བརྗོད་པ་སྒྲ་དག་སྒྲོས་གཙང་རིགས་པའི་འབྲུག་སྒྲ་ལྷང་ལྷང་ལྡིར།།
སེམས་ཀྱི་འཕྲོ་འདུ་གཞུང་ལ་རྩེན་པས་གོ་བའི་ཆུ་ཚད་ཟབ་ཏུ་འགྲོ།།
སྒོ་གསུམ་སྤང་བླང་འཁྱུག་པ་མེད་པས་ད་གཟོད་མཁས་པའི་རྒྱལ་སར་སོན།།
རྨོངས་དད་ར་རིའི་དྲི་མ་འཁྲུད་བྱེད་རིགས་ལམ་གངས་ཆུ་བསིལ་མ་ཡིན།།
ཚད་མ་ཚད་མིན་སྤུ་རིས་འབྱེད་བྱེད་རིགས་ལམ་གསེར་གྱི་ཐུར་མ་ཡིན།།
མ་རྟོགས་ལོག་རྟོག་བྲག་རི་གཏོར་བྱེད་རིགས་ལམ་གནམ་ལྕགས་ཐོག་མདའ་ཡིན།།
སྤྱི་བོ་གནམ་བསྟན་མགོ་ནག་བུ་ཚོ་མ་འདུག་རིགས་ལམ་རྩོད་ལ་རེམས།།
