ཐུབ་བསྟན་དབང་གྲགས། ལོ་རིམ་དྲུག་པ།
མུན་སེལ་རྟ་བདུན་དབང་པོ་མཁའ་རུ་ཤར་བ་མ་རེད།།
ཚན་རྩལ་ཐབས་མཁས་གློག་འོད་གསར་དུ་འཕྲོ་བ་མིན་ཡང་།།
ཐམས་ཅད་ཡ་ཁོག་སྦུག་གི་གསང་བའི་སྒམ་ཆུང་ནང་ན།།
ཕྲ་རགས་ཆོས་ཀུན་གསལ་བའི་འོད་ཀྱི་གོང་བུ་གང་ལགས།།
ཅི་ཞིག་འཆད་དགོས་བྱུང་ཡང་ཁ་ནས་རྡོལ་རྐྱང་བྱེད་དེ།།
བཅུ་ཕྲག་རིག་པའི་གནས་ལ་སྦྱངས་པའི་མཁས་དབང་མ་ཡིན།།
སྤྱི་བོ་གནམ་བསྟན་མིན་ཡང་སྨྲ་ཤེས་མཚན་ཉིད་ཚང་ཞིང་།།
ཡངས་པའི་སྤང་ཐང་སྟེང་དུ་རྐང་རྗེས་འཇོག་མཁན་སུ་རེད།།
སུག་བཞི་ས་རུ་བཙུགས་ཀྱང་རྩྭ་ཟན་མིན་པའི་ཟོག་ཅིག།
རྒྱབ་ལ་ཁལ་སྒ་མེད་ཀྱང་ཙག་ཙིག་མང་ཙམ་བཀལ་ཡོད།།
ངལ་རྒྱུ་ཆད་རྒྱུ་མེད་ཀྱང་ཆག་རྒྱུ་གྲུག་རྒྱུ་ཡོད་པ།།
རྭ་ཅོ་མེད་པའི་གཡག་འདི་ཁྱེད་ཀྱིས་བལྟས་ན་ཅི་རེད།།
སྡིགས་ར་ཆེན་པོས་བརྗོད་ཀྱང་ལྕེ་དང་ཡ་མཆུ་མི་གཤོག།
སེམས་ཀྱི་གནད་ལ་ཕོག་ན་དུམ་བུར་ཧྲིག་གེར་གཏུབ་པ།།
བྱེད་པོས་བྱས་པ་མིན་ཡང་སྤུ་གྲི་ངར་མའི་སོ་ཞིག།
དགའ་གཉེན་སྙིང་ཁམས་རྨ་བའི་མཚོན་ཆ་རྣོན་པོ་གང་ཡིན།།
རྒྱ་ནག་ཡུལ་ནས་ཡོང་བའི་དེང་གི་ཁྱེ་འུ་སྤུན་གཉིས།།
མཁས་བླུན་ཀུན་ཀྱི་མིག་སྔར་རོལ་རྩེད་འཁྲབ་ལ་མཁས་པ།།
གནས་ཚུལ་ཡག་སྡུག་མང་པོའི་གསང་བ་གཏིང་ནས་སྔོག་མཁན།།
རིང་ཐུང་ཡུལ་ལུང་རྣམས་ཀྱི་ཕོ་ཉ་མོ་དེ་སུ་རེད།།
ནུབ་བྱང་ཕྱོགས་སྐྱོང་རྒྱལ་པོས་རླུང་ཡབ་གཡུག་པ་མ་ཡིན།།
ཚ་བས་གདུང་བའི་མི་ལ་བསིལ་བ་ཅུང་ཟད་སྟེར་བའི།།
འབྲོག་མོའི་སྐོར་རུ་འདྲ་བའི་མཁར་ལྡིང་བྱ་གཤོག་ཅན་ཞིག།
ཉིན་མཚན་གཉིས་ཀར་འཕུར་ཡང་རང་འཇགས་ལྷག་དེ་ཅི་རེད།།
གོང་གི་གབ་ཚིག་རྣམས་རེ་རེ་ནས་ངོས་འཛིན་གནང་ཐུབ་མཁན་གྱི་མཚན་ ༢༠༡༩ ལོའི་པདྨའི་རང་མདངས་འདོན་ཐེངས་སྔ་མའི་ནང་དགོད་རྒྱུ་དང་། མི་གྲངས་གསུམ་ལ་དུས་དེབ་པདྨའི་རང་མདངས་འདོན་ཐེངས་སྔ་མ་རེ་བྱ་དགའ་རུ་དབུལ་རྒྱུ་ལགས་ན། གབ་ལན་རྣམས་ ༢༠༡༩ བོད་ཟླ་ ༠༤ ཚེས་ ༡༥ ལས་མ་འགྱངས་པར་སྔ་འགྱུར་རིག་མཛོད་རྩོམ་སྒྲིག་ལྷན་ཁང་དུ་བསྐུར་གནང་ཡོད་པར་ཞུ།
