འཆམ་ར་བ་དྲི་མེད་རྒྱལ་མཚན།
མཐོན་པོ་ནམ་མཁའ་སྔོན་པོའི་དཀྱིལ་མ་ན།།
རྒྱུ་སྐར་རྒྱལ་པོ་ཉི་མའི་ལང་ཚོ་བཞིན།།
ས་ཆེན་འདི་ན་བྱོན་པའི་བླ་མ་དེའི།།
སྲས་ཀྱི་ཐུ་བོ་ཐོ་རེངས་སྐར་ཆེན་གུས།།
ཐུགས་བསྐྱེད་པདྨ་དཀར་པོའི་ལོ་འདབ་སྟེང་།།
དྲན་འཕྲུལ་སྣ་དགུའི་ཚོན་མདངས་མེད་ན་ཡང་།།
བླ་མའི་ཐུགས་ཀྱིས་ཟིན་པའི་གེ་སར་ཞིག།
ལྷོད་ཀྱིས་འཛུམ་པར་བྱེད་མཁས་ཁྱེད་ལ་བསྟོད།།
མཐིང་མདོག་ཞི་བའི་དབྱིངས་ཀྱི་དཀྱིལ་འཁོར་ནས།།
ཐུགས་སྲས་ཉི་ཟླ་སྐར་གསུམ་འཆར་བ་འདིའི།།
ཕྲིན་ལས་འོད་ཟེར་དཀར་པོ་སྣོལ་མའི་ངང་།།
ཐུགས་སྣང་མཐུན་པ་འདི་ཀོ་ནོར་བུ་ཞིག།
ཐུགས་ཀྱི་བུ་ཆེན་རིགས་གསུམ་སེམས་དཔའི་འཕྲུལ།།
མཁན་ཆེན་རྣམ་གསུམ་རྒྱལ་བསྟན་པདྨོའི་གསོས།།
གུས་ཤིང་བཀུར་ནས་ཕྲིན་ལས་རྒྱས་པའི་གྲོགས།།
ནམ་ཡང་འཛུམ་གྱིས་བཞེངས་པ་ཁྱེད་ལ་བསྔགས།།
ཙནྡན་ལྗོན་ཤིང་འཁྲིགས་པའི་ནགས་ཀླུང་ན།།
རྒྱུ་སྐར་སེར་པོའི་འོད་ཀྱིས་འཚེར་བ་བཞིན།།
རྣམ་གླིང་འདུས་པའི་སྡེ་ཚོགས་རྒྱས་པ་ལ།།
བསྙེན་བཀུར་ཆེ་བའི་ཆེ་བ་གུས་པས་འདུད།།
རིན་ཆེན་སྣ་ལྔ་སྤུངས་པའི་རྣམ་གྲོལ་གླིང་།།
ལྷ་ཤིང་ཤུག་པའི་གཞོང་པས་བསྐྱོར་བ་བཞིན།།
འབད་རྩོལ་སྟོང་གིས་བྲེལ་བའི་ཐུགས་ཀྱི་སྲས།།
འདུས་ཚོགས་དགེ་འདུན་རྒྱས་པའི་ཐུགས་ཀྱི་གསོས།།
གདུལ་བྱའི་བསོད་ནམས་རྒྱས་པའི་རྟེན་འབྲེལ་ཅན།།
འ་འུར་སྟོང་གི་སྤྱིར་བསྒྲགས་གླེང་སྟེགས་དང་།།
སྔུན་ནས་བསུ་མ་རྒྱབ་ནས་སྐྱེལ་མཁན་མེད།།
རང་བཞིན་ལྷོད་ཅིང་ཞི་བ་ཁྱེད་ལ་བསྟོད།།
འཛུམ་དྲུག་ཟླ་བ་དཀར་པོའི་བཞིན་རས་ཅན།།
ཡིད་འཕྲོག་ཟླ་བ་དཀར་པོའི་བཞིན་རས་ཅན།།
གཟི་མིག་ཁ་སྤྲོད་བྱས་པའི་སྤྱན་རས་ཅན།།
ཕོ་སྒོ་ལྷ་ཡིས་བཟོས་པ་ཁྱེད་ལ་བསྟོད།།
ད་ནས་ནམ་མཁའི་དཀྱིལ་འཁོར་མ་ཞིག་བར།།
ཁྱེད་རྣམས་མཐུན་པའི་ཐུགས་ཀྱི་གོམ་སྟབས་ངང་།།
རྣམ་གླིང་ཆོས་སྡེ་འདེགས་པའི་དཔུང་ཤུགས་རྒྱས།།
སྐུ་བསོད་དབང་ཐང་དར་བའི་བཀྲ་ཤིས་ཤོག།
རྒྱལ་ས་དིལླཱི་ནས་ ༢༠༡༧ / ༥/ ༧ མཚན་མོར་བྲིས་སོ།།
