སྙན་ངག་གི་ཉམས་གླེང་བ།

འགྱུར་མེད།

སྤྱིར་བཤད་པ།

འདས་པའི་ལོ་ངོ་སྟོང་ཕྲག་མང་པོའི་སྔོན་ནས་འཇིག་རྟེན་ཁམས་ཆེན་མོའི་ནང་ཚེ་སྲོག་སྐྱེ་འཕེལ་གྱི་བརྒྱུད་རིམ་རིང་མོ་འགོ་བཙུགས་པ་ནས་བཟུང་། དགའ་སྐྱོ་ཆགས་སྡང་གི་ཚོར་ཤུགས་དང་བསྡེབས་པའི་ལུས་ངག་གི་རྣམ་འགྱུར་ཡང་ལྷན་སྐྱེས་སུ་གྲུབ་ཡོད། ལྷག་དོན་དུ་མིའི་རིགས་ཀྱི་ལོ་རྒྱུས་ནང་དགའ་བ་རྩེར་སོན་གྱི་ཞབས་བྲོ་དང་དགོད་སྒྲ། སྐྱོ་བའི་དུས་སྐབས་ཀྱི་མིག་ཆུ་དང་མྱ་ངན་བཅས་ནི་གདོད་མ་ནས་འཚོ་བའི་འགྲུལ་ལམ་ནང་ལུས་དང་གྲིབ་མ་བཞིན་འགྲོགས་ཏེ་ཡོང་བ་ཞིག་ཡིན། དེ་བས་ཡི་གེ་མེད་པའི་རྡོ་བའི་དུས་རབས་ནས་བཟུང་། ནང་སེམས་ཀྱི་ཚོར་བའི་འཕངས་ཤུགས་ལས་གྲུབ་པའི་ཕྱིའི་ལུས་ངག་གི་སྒེག་པ་དང་དཔའ་བ་ལ་སོགས་པའི་རྣམ་འགྱུར་དག་ལ་ཉམས་ཞེས་པའི་ཐ་སྙད་མ་བཏགས་པ་ཙམ་ལས་གདོད་མ་ནས་ཡོད་པ་གཞིར་བཞག་གི་རང་བཞིན་ཡིན་པ་ལ་སོམ་ཉི་བྲལ།

ཉམས་ཞེས་པའི་བརྡ་ཆད་ནི་ཐོག་མར་གཞས་ཞབས་བྲོ་དང་གར་འཆམ་གྱི་སྒྱུ་རྩལ་ཚུར་སྣང་ལས་གྲུབ་པའི་ཐ་སྙད་ཅིག་ཡིན་པར་ཚོད་དཔག་བྱེད་ཆོག་སྟེ། ཡི་གེ་དང་འབྲེལ་བ་ཕྲ་བའི་བོད་ཀྱི་ཡུལ་སྐད་དཀྱུས་མའི་ནང་དུའང་། མི་འདི་བྲོ་འཁྲབ་ཉམས་མཚར་བ་ལ། གཞས་གཏོང་ཉམས་ཡག་ག་ལ། སྒྲ་སྙན་དཀྲོལ་ཉམས་ལ། ཞེས་ཕལ་སྐད་ནང་བཀོལ་སྤྱོད་བྱེད་པ་ལ་དཔགས་ན་ཡི་གེའི་རྩོམ་རིག་མ་བྱུང་བའི་སྔོན་དུས་ནས་ཉམས་ཀྱི་བརྡ་ཆད་འདི་གྲུབ་མེད་དམ་སྙམ།

ལུས་ངག་གི་རྣམ་འགྱུར་ལུང་མ་བསྟན་གྱིས་གཞན་རྒྱུད་ལ་བག་ཆགས་འཇོག་མི་སྲིད་པ་བཞིན། རྣམ་འགྱུར་གྱི་རྩེ་རུ་སོན་པའི་ཉམས་བརྒྱད་ནི་ཡིད་འགུག་གི་ནུས་ཤུགས་ལྡན་པའི་ཟློས་གར་དང་ཞབས་བྲོས་མཚོན་པའི་ལུས་ངག་གི་སྒྱུ་རྩལ་ཆེ་ཕྲ་གང་ལའང་མེད་ཐབས་མེད་པ་ཡིན་ཅིང་། རྩོམ་འབྲི་རིག་པའི་ནང་དུའང་སྣང་བརྙན་རང་བཞིན་གྱི་འགུལ་གཟུགས་བཞེངས་འབྲི་དང་། ཡུལ་ལྗོངས་ཀྱི་རང་བྱུང་མཛེས་བཀོད་མཚར་སྡུག མིའི་འཚོ་བའི་ཚབ་མཚོན་ནུས་པའི་སྒྱུ་རྩལ་བརྩམས་ཆོས་བཅས་ལེགས་གྲུབ་ཡོང་བར་ནང་སེམས་ཀྱི་ཚོར་འདུ་ཕྱི་རུ་ལུད་པའི་ཉམས་བརྒྱད་པོ་ནི་ལྷ་བཟོ་མཁས་པའི་པིར་གྱི་རི་མོ་ལྟར་ཞིབ་ལ་མ་འདྲེས་པ་ཞིག་དགོས་པས། དེ་ཉིད་རེ་རེ་ནས་ཞིབ་འབྲི་བྱེད་ཚུལ་དང་། མཉམ་བསྲེས་དང་ལྷན་བསྡེབས་ཀྱི་སྐད་ཆའི་སྒྱུ་རྩལ་ཇི་ལྟར་བཞེངས་པའི་ཚུལ་བསྟན་པའི་གཞུང་ལུགས་ཀྱང་ལྟོས་བཅས་ཀྱིས་མི་རིགས་སོ་སོའི་ནང་བྱུང་ཡོད་པར་འདོད་ཆོག བོད་དུ་ནི་མེ་ལོང་མ་བསྒྱུར་པ་ནས་བཟུང་སྟེ་ཉམས་དང་འབྲེལ་བའི་རྩོམ་འབྲི་རིག་པ་འདི་དར་རྒྱས་སུ་སོང་བར་འདོད་ནུས།

དེ་ལྟར་ཉམས་ནི་ཐོག་མར་ལུས་ཀྱི་སྟངས་སྟབས་གར་གྱི་ཆ་བྱད་དང་འབྲེལ་བ་ཡོད་པར་མེ་ལོང་མ་ནས་ཀྱང་བཤད་དེ། ¹སྒེག་དང་རོལ་པའི་སྟབས་ལ་སོགས། །ལྟ་བའི་དོན་ཡིན་ཅིག་ཤོས་ཀྱང་། །མཉན་པར་བྱ་བ་ཉིད་ཅེས་པ། །འདི་ཡང་ལུགས་གཉིས་དག་ཏུ་བརྗོད། །ཅེས་ཉམས་ལ་མིག་ཤེས་ཀྱིས་གཟུང་བྱ་དང་རྣ་ཤེས་ཀྱིས་མཉན་བྱ་གཉིས་སུ་གསུངས་པ་བཞིན་ནོ།།

མེ་ལོང་མ་ནས་སྙན་ངག་གི་ཉམས་ཇི་ལྟར་བསྟན་ཚུལ།

སྙན་ངག་པའི་ཚོར་འདུ་ཉིད་ས་བོན་ཡིན་ན་ཉམས་ཀྱིས་ཚོར་འདུ་དེ་ཉིད་རྣམ་འགྱུར་དུ་འབར་བའི་མེ་ཏོག་གི་གོ་ས་བཟུང་ཡོད་པས་མེ་ལོང་མ་ནས་ཀྱང་དམིགས་སུ་བཀར་ནས་སྙན་ངག་གི་ཉམས་སྐོར་ཐེངས་ལྔ་ཙམ་གླེངས་ཡོད།

སྤྱིར་མེ་ལོང་མ་ནས་བཤད་པའི་རྒྱན་གང་པོས་སྙན་ངག་གི་སྒྲ་ཉམས་དང་དོན་ཉམས་གཉིས་ཇི་ལྟར་ཕུན་སུམ་ཚོགས་པར་གཏོང་ཚུལ་གྱི་ཐབས་ལམ་བསྟན་པ་འབའ་ཞིག་ཡིན་ཏེ། ལེའུ་དང་པོའི་སྙན་པའི་རྒྱན་གྱི་མདོར་བསྟན་སྐབས། གཞུང་ལས།² སྙན་པ་ཉམས་ལྡན་ཚིག་དང་ནི། །དངོས་པོ་ལ་ཡང་ཉམས་གནས་པ། །སྦྲང་རྩི་སྤྱོད་པ་སྦྲང་རྩིས་བཞིན། །གང་གིས་བློ་ལྡན་དགའ་བྱེད་པའོ། །ཞེས་མདོར་བསྟན་ཏེ་སྒྲ་ཉམས་ཇི་ལྟར་འདོན་ཚུལ་རྒྱས་པར་བཤད་ནས་དོན་ཉམས་འདོན་ཚུལ་ལ། གཞུང་ལས།³ ངེས་པར་རྒྱན་རྣམས་ཀུན་ལ་ཡང་། །དོན་གྱི་ཉམས་དག་སྦྱིན་པར་བྱེད། །ཅེས་སྙན་ངག་ཆེ་ཆུང་ཀུན་ལ་སྒྲ་དོན་གྱི་རོ་ཉམས་ཕུན་སུམ་ཚོགས་པ་ལྡན་པར་བྱེད་པའི་ཐབས་ཡོད་ཚད་ཉམས་ཀྱི་ཁོངས་སུ་བསྡུ་བར་བཞེད་དོ།།

ལེའུ་དང་པོའི་སྙན་ངག་གི་བརྗོད་གཞི་བསྟན་པའི་མཇུག་ཏུ། ⁴ཉམས་དང་འགྱུར་བ་དག་གིས་གཏམས། །ཞེས་སྙན་ངག་ཆེ་ཆུང་གང་ལའང་ཉམས་འགྱུར་གྱིས་གཏམས་དགོས་ཚུལ་ནན་ཏན་གྱིས་གདམས་ཏེ་ཚིགས་བཅད་གཉིས་དང་ཕྱེད་ཀྱི་མཇུག་དེ་མ་ཐག་ཏུ། རིགས་དང་བརྩོན་འགྲུས་ཐོས་སོགས་ཀྱིས། །དགྲ་བོ་ཡང་ནི་བསྔགས་བྱས་ནས། །དེ་ལས་རྒྱལ་ཕྱིར་འདྲེན་པ་ནི། །ཁྱད་འཕགས་བརྗོད་པའང་བདག་དགའ་སྐྱེད། །ཅེས་པའི་སྐབས་འདི་ནས་སློབ་དཔོན་དབྱུག་པ་ཅན་རང་ཉིད་ཀྱི་ཐུན་མོང་མ་ཡིན་པའི་སྙན་ངག་གི་ཉམས་བཞེད་ཚུལ་སྐོར་གསལ་བཤད་གནང་ཡོད། སྐབས་འདི་དག་ནས་བསྟན་པའི་ཉམས་ཞེས་པ་ནི་སྙན་ངག་གི་སྒྲ་དོན་ལ་སྙན་ཆ་དང་མཛེས་རིས་ཇི་ལྟར་བརྐོ་བའི་ཐབས་སྤྱིར་བཏང་བ་ཙམ་ལ་འདོད་ན་འཐད་པར་མཐོང་ངོ་།།

ལེའུ་གཉིས་པའི་དངོས་གཞིའི་སྐབས་སུ་ནི་བྱེ་བྲག་ཏུ་གྱུར་པའི་ཉམས་བརྒྱད་ཞིབ་པར་བཤད་ཡོད། ནང་སེམས་ཀྱི་འགྱུར་བ་བརྒྱད་ཕྱི་ལུས་ངག་གི་རྣམ་འགྱུར་དུ་འཕོས་པའི་ཉམས་བརྒྱད་པོ་རེ་རེ་ནས་མཚོན་པའི་དཔེར་བརྗོད། ཉམས་བརྒྱད་ཕལ་ཆེ་བའི་དོན་ལྡོག་བཤད་སྦྱར་དང་བཅས་ཏེ་རྒྱས་པར་བསྟན་ཡོད། མཐར་ལེའུ་གསུམ་པ་སྙན་ངག་གི་སྐྱོན་སེལ་སྐབས་སྒྱུ་རྩལ་དང་འགལ་བའི་དཔེར་བརྗོད་དུ། འགྱུར་བ་དང་ཉམས་གཉིས་བར་རང་སའི་ལྟོས་འཇོག་གི་རྒྱུ་འབྲས་འབྲེལ་བ་བྱེ་བྲག་ཏུ་གྲུབ་པ་གཞིར་བཟུང་ཐོག་སྙན་ཚིག་ནང་འབྲི་གླེང་བྱེད་འོས་པ་ལས། རྒྱུ་འབྲས་ནོར་ནས་གླེངས་པའམ་བྲིས་ན་སྒྱུ་རྩལ་དང་འགལ་བའི་སྐྱོན་བསྟན་ཡོད། རྩ་བར།⁵ སྒྱུ་རྩལ་དག་དང་འགལ་བའི་ལམ། །ཅུང་ཟད་བསྟན་པར་བྱ་སྟེ་དཔེར། །དཔའ་དང་སྡིག་པའི་ཡིད་བྱེད་ཀྱི། །གནས་ཅན་ཁྲོ་དང་ཡ་མཚན་ནོ། །ཞེས་བྱུང་བ་ལྟར་རོ།།

ལེའུ་དང་པོ་དང་གཉིས་པའི་སྐབས་སུ་ཉམས་ཡང་ནས་ཡང་དུ་བསྟན་པ་ལ་སྤྱི་དང་བྱེ་བྲག་གི་དབང་དུ་བྱས་པའི་ཕྱིར་མི་ཟློས་པའི་ཚུལ་ཡང་། གཞུང་ལས།⁶ སྙན་པ་གྲོང་པ་ཉིད་མིན་སྐྱེས། །བརྗོད་བྱ་ཡི་ནི་ཉམས་དག་བསྟན། །འདིར་ནི་ཉམས་བརྒྱད་དབང་བྱས་ཏེ། །ཚིག་རྣམས་ཉམས་དང་ལྡན་པར་བཤད། །ཅེས་གསུངས་སོ།།

ཉམས་དང་འགྱུར་བ་བྱེ་བྲག་ཏུ་བཤད་པ།

དེ་ཡང་སློབ་དཔོན་དབྱུག་པ་ཅན་གྱིས། ⁷ཉམས་ལྡན་ཡིད་འོང་ཉམས་དང་ལྡན། །ཅེས་བསྔགས་བརྗོད་དང་ལྷན་དུ་མདོར་བསྟན་ཏེ་ཉམས་བརྒྱད་རེ་རེ་ནས་བཤད་པ་ན་སྒེག་དཔའ་དྲག་ཤུལ་སྙིང་རྗེ་བཅས་བཞི་དཔེར་བརྗོད་བཤད་སྦྱར་དང་བཅས་ཏེ་ཚིགས་སུ་བཅད་པ་བརྒྱད་ཀྱིས་བསྟན་པ་དང་། སྡུག་པ་དང་བཞད་གད་རྨད་བྱུང་དང་འཇིགས་རུང་བཅས་ལ་དཔེར་བརྗོད་རེ་བསྟན་ཏེ་བསྡོམས་པས་ཚིགས་བཅད་བཅུ་གཉིས་ཀྱིས་ཉམས་བརྒྱད་ཇི་བཞིན་དུ་གསལ་བར་མཛད་ཡོད། མཐར་ཤོ་ལོ་ཀ་གཅིག་གིས་ལེའུ་དང་པོའི་སྙན་པའི་ཉམས་ལས་ཁྱད་པར་བསྟན་ཏེ་མཇུག་བསྡུས་པ་བཅས་ནི་མེ་ལོང་མ་ནས་ཉམས་བརྒྱད་བྱེ་བྲག་ཏུ་བཤད་པའི་ཚུལ་ལོ།།

རྩ་བ་དེའི་དགོངས་པ་མ་ནོར་བར་འཚོལ་བའི་འགྲེལ་བྱེད་མཁན་པོ་དག་གིས་ཉམས་བརྒྱད་པོ་འགྲེལ་བ་ན། བརྒྱད་པོའི་རྒྱུའི་གནས་སྐབས་ཀྱི་ཡིད་བྱེད་གནས་སམ་འགྱུར་བ་ཞེས་པ་གསལ་ཁ་མཛད་པ་དང་ལྷན་དུ་སྙན་ཚིག་རིག་པ་བའི་དཔུང་སྡེའི་ཁྲོད་ན་ཉམས་འགྱུར་ཞེས་པའི་བརྡ་ཆད་འདི་ཡང་མི་གསལ་བ་ནས་གསལ་དུ་ཕྱིན་ཅིང་གསལ་བ་ནས་འབུར་ཐོན་རང་བཞིན་དུ་གྱུར་པར་ཟད་དོ།།

དེ་ལ་ཉམས་དང་འགྱུར་བའི་དོན་ནི་མེ་ལོང་མའི་རྒྱ་འགྲེལ་མཛད་པ་པོ་⁸སློབ་དཔོན་རཏྣ་ཤྲཱིས། དགའ་དང་དགོད་བྲོ་མྱ་ངན་དང་། །ཁྲོ་དང་སྤྲོ་བ་དེ་བཞིན་འཇིགས། །སྐྱུགས་བྲོ་ངོ་མཚར་ཞེས་དེ་རྣམས། །གནས་བྱེད་འགྱུར་བར་རབ་ཏུ་གྲགས། །སྒེག་དང་དགོད་དང་སྙིང་རྗེ་དང་། །དྲག་པོ་དཔའ་བ་འཇིགས་བྱེད་དང་། །མི་སྡུག་རྨད་བྱུང་མིང་ཅན་ཞེས། །བརྒྱད་རྣམས་གར་གྱི་ཉམས་སུ་བཤད། །ཅེས་གསུངས་པའི་དོན་ཉིད་ཁམས་འགྲེལ་དུ།⁹ གཞུང་གི་རྒྱ་དཔེར། སྠཱ་ཡི་ཞེས་འབྱུང་བ་བོད་སྐད་གནས་ཅན་ཏེ་ཉམས་བརྒྱད་པོའི་སྤྱི་མིང་དང་། དེ་ཡང་དེ་ཉིད་ཀྱི་རྒྱུར་གྱུར་པ་ལུས་ངག་ཏུ་མ་ཐོན་ཅིང་། ཡིད་ཀྱི་གནས་སྐབས་ཀྱི་ཀུན་སློང་ཐོག་མའི་ས་བོན་ལྟ་བུར་གྱུར་པ་དེ་ལ་ཡིད་བྱེད་དམ་གནས་ཞེས་བྱ། དེ་ཆེས་ཆེར་འཕེལ་བས་ལུས་ངག་གི་ཉམས་འགྱུར་རོ། །དེ་ལྟ་བུའི་གནས་སམ་ཡིད་བྱེད་ཀྱི་ཁྱད་པར་རྒྱུར་གྱུར་པ་རེ་དང་། གནས་ཅན་ཉམས་ཀྱི་ཁྱད་པར་འབྲས་བུར་གྱུར་པ་རེ་རྒྱུ་འབྲས་སུ་འབྲེལ་བའི་འབྲེལ་བ་མ་འཆོལ་བར་འབྱུང་དགོས་པའི་ཕྱིར། འདིར་ཡང་སྤྲོ་བའི་ཡིད་བྱེད་ཀྱི་གནས་འཕེལ་བ་དཔའ་བའི་གནས་ཅན་ནམ་ཉམས་དང་། དགའ་བའི་ཡིད་བྱེད་ཀྱི་གནས་འཕེལ་བ་ལས་སྒེག་པའི་ཉམས་སམ་གནས་ཅན་དག་བྱུང་བ་དང་། དེ་བཞིན་དུ་ཁྲོ་བའི་ཡིད་བྱེད་ཀྱི་གནས་འཕེལ་བ་དྲག་པོའི་ཉམས་སམ་གནས་ཅན་དང་། ཡ་མཚན་པའི་གནས་སམ་ཡིད་བྱེད་འཕེལ་བ་རྨད་བྱུང་གི་གནས་ཅན་ནམ་ཉམས་ཞེས་སྨོས་དགོས། ཞེས་དང་།

དུང་དཀར་བློ་བཟང་ཕྲིན་ལས་ཀྱིས་ཚིག་རྒྱན་རིག་པའི་སྒོ་འབྱེད་ལས།¹⁰ སྐབས་འདིར་ཉམས་དང་འགྱུར་བ་ཞེས་པ་ནི། དགའ་བ་དང་ཁྲོ་བ་སོགས་ཡིད་ཀྱི་འགྱུར་བ་ནི། ལུས་ངག་ཏུ་མ་ཤར་བའི་ནང་གི་འགྱུར་བ་ཡིན་ལ། དེ་ཉིད་ཇེ་ཆེར་འཕེལ་ནས་འཛུམ་པའམ་ཁྲོ་གཉེར་བསྡུས་པ་ལྟ་བུ། ལུས་ངག་ཏུ་ཤར་བ་ནི་ཉམས་ཡིན་ཅིང་། དེ་ཡང་ཁོང་ནས་དགའ་བའི་འགྱུར་བ་ལ་ཕྱི་རོལ་ཏུ་སྒེག་པའི་ཉམས་དང་། རྒོད་བྲོ་བ་ལ་བཞད་གད་དམ་གད་མོ་དགོད་པའི་ཉམས་དང་། ཤི་འབྲལ་སོགས་ཀྱི་མྱ་ངན་ལ་བཞིན་མདངས་ཉམས་ཤིང་། སྙིང་རྗེ་བའི་ཉམས་དང་། ཁྲོ་བ་ལ་དྲག་ཤུལ་ལམ། ཁྲོ་གཉེར་བསྡུས་པའི་ཉམས་དང་། སྐྲག་པ་ལ་འཇིགས་ཤིང་བག་འཁུམས་པའི་ཉམས་དང་། སྐྱུག་བྲོ་བ་ལ་ཞེ་མེར་ཞིང་མི་སྡུག་པའི་ཉམས་དང་། ངོ་མཚར་བ་ལ་རྨད་བྱུང་ངམ་རྔམ་པའི་ཉམས་ཏེ་ཉམས་བརྒྱད་ཡོད་ལ། ཞེས་གསུངས་པ་ལྟར་དང་།

ཡང་ཁམས་འགྲེལ་ལས།¹¹རྒྱུར་གྱུར་པ་གནས་ཀྱི་བསམ་པ་བརྒྱད་དུ་གྲངས་ངེས་པར་བཤད་པས། དེ་རྣམས་རྒྱས་པས་འབྲས་བུར་གྱུར་པའི་ཉམས་རྣམས་ཀྱང་བརྒྱད་ཉིད་དུ་གྲངས་ངེས་པར་བཞེད་པ་སྟེ། དེའི་ཚེ་ཞི་བ་དང་མཉེས་གཤིན་པ་ནི་ཆོས་ཀྱི་སྒེག་པ་ཡིན་པའི་ཕྱིར་སྒེག་ཉམས་ཀྱི་ཕྱོགས་སུ་བསྡུའོ། །ཞེས་ཉམས་དང་འགྱུར་བའི་གནས་སྐབས་དང་ཉམས་ལ་བརྒྱད་དུ་གྲངས་ངེས་པའི་རྒྱུ་མཚན་དང་བཅས་པ་བསྟན་ཏོ།།

སྙན་ཚིག་ནང་ཉམས་འབྲི་བཞེངས་བྱེད་ཚུལ།

སྤྱིར་སྙན་ངག་གི་རྒྱན་ཡོད་དོ་ཅོག་བྲི་བྱའི་བརྗོད་བྱ་གང་ཉིད་སྐད་ཆ་དཀྱུས་མའི་གནས་ཚད་ལས་འགོངས་པར་བྱས་ཏེ། ཚིག་དང་དོན་ལ་མཛེས་མཆོར་སྤུད་སྟངས་ཙམ་ཡིན། འགྲོ་མགོན་ཆོས་རྒྱལ་འཕགས་པའི་དུས་སྐབས་ནས་བཟུང་བོད་ཀྱི་སྲོལ་རྒྱུན་སྙན་ཚིག་གི་མཛེས་པ་མཚོན་ཐབས་གཙོ་བོ་ནི་མེ་ལོང་མའི་དོན་རྒྱན་རྣམས་གཙོ་བོར་བཀོལ་ཡོད། མེ་ལོང་མ་གཞིར་བཞག་ནས་སྙན་ངག་ཡིན་མིན་གྱི་ས་མཚམས་ཀྱང་གྲོང་ཚིག་དང་འདྲེས་མ་འདྲེས་ལ་འཇོག་ཅིང་། དེ་ཡང་ཞིབ་ཏུ་བརྟགས་ན་སྙན་ཚིག་གི་ལུས་སྒྲུབ་བྱེད་ཀྱི་སྐད་ཆ་རེ་རེ་ནས་ཕལ་སྐད་དམ་གྲོང་པའི་ཚིག་ཡིན་མིན་གཙོ་བོ་མིན་པར། བརྗོད་དོན་གང་ཉིད་ཅུང་འཁྱོག་ཉམས་ཀྱིས་མ་ཡིན་པར་མ་གསང་ཐད་ཀར་བརྗོད་པ་ཉིད་གྲོང་ཚིག་དང་འདྲེས་པའི་སྐྱོན་དུ་བསྟན་ཡོད། དེ་ལྟར་ཡིན་པ་ཡང་གཞུང་གི་དཔེར་བརྗོད་དུ། ¹²འདོད་ལྡན་དག་ལ་གཞོན་ནུ་མ། །ཁྱོད་ནི་ཇི་ལྟར་འདོད་མི་བྱེད། །ཅེས་འདི་གྲོང་པའི་དོན་དག་ཉིད། །ཉམས་དང་བྲལ་བ་ཁོ་ནར་བྱེད། །ཅེས་དང་དེ་སྤོང་བར་བྱེད་པའི་ཉམས་ཇི་ལྟར་སྦྱིན་པ་མཚོན་པའི་དཔེར་བརྗོད་དུ། གཞུང་ལས། གཡོན་མིག་འདོད་པ་གཏུམ་པོ་ནི། །ངེས་པར་བདག་ལ་བརྩེ་བ་མེད། །ཁྱོད་ལ་ཁྲོ་མེད་དགའ་ཞེས་པ། །གྲོང་པའི་དོན་མིན་རོ་ཉམས་ལྡན། །ཞེས་པ་ལྟར་རོ།།

དེ་བས་བོད་ཀྱི་སྲོལ་རྒྱུན་སྙན་ཚིག་ཕལ་ཆེ་བའང་བརྗོད་དོན་གང་དེ་ཐད་ཀར་མིན་པར་དཔེ་དོན་མཉམ་བསྲེས་དང་ལྷན་བསྡེབས་ཀྱིས་འབྲི་བཞེངས་བྱས་ཡོད་པས་བོད་ཡིག་གི་ཆུ་ཚད་དཀྱུས་མ་ཙམ་ཡོད་མཁན་ལ་ཅུང་གོ་ཁག་པོ་ཡིན། མེ་ལོང་མ་ནས་བསྟན་པ་བཞིན་འཁྱོག་བརྗོད་ཀྱི་མཛེས་ཉམས་གཏོད་པར་འགྲན་ཟླ་བྲལ་བ་ནི་རྗེ་བོད་མཁས་པ་དང་རིག་འཛིན་འཇིགས་མེད་གླིང་པའི་གསུང་རྩོམ་ལྟ་བུ་ཡིན་ནོ།།

སྙན་ཚིག་གི་ཉམས་གཏོད་ཚུལ་ལ་སློབ་དཔོན་དཎྜིས།¹³ ཐོག་མར་འདྲེན་པ་ཡོན་ཏན་གྱིས། །ཉེ་བར་བཀོད་ནས་དེ་ཡིས་ནི། །དགྲ་ལ་གནོད་པ་བྱེད་ཅེས་པའི། །ལམ་འདི་རང་བཞིན་མཛེས་པ་ཡིན། །ཞེས་སྙན་ངག་མཁན་བྷཱ་མ་ཧའི་འདོད་པ་བཀོད་ནས། རིགས་དང་བརྩོན་འགྲུས་ཐོས་སོགས་ཀྱིས། །དགྲ་བོ་ལ་ཡང་བསྔགས་བྱས་ནས། །དེ་ལས་རྒྱལ་བར་འདྲེན་པ་ནི། །ཁྱད་འཕགས་བརྗོད་པའང་བདག་དགའ་སྐྱེས། །ཞེས་སྙན་ངག་གི་མཛེས་ཉམས་འདོད་པ་ལ་བྷཱ་མ་ཧའི་འདོད་ཚུལ་དེ་གཅིག་པུས་མི་ཚད་པར་ཅུང་འཁྱོག་པོས་བརྗོད་པ་འདི་ལྟ་བུ་ལའང་དབྱུག་པ་ཅན་རང་ཉིད་ཆེས་ཤིན་ཏུ་དགའ་བའི་འདོད་པ་བསྟན་པ་ཡིན་ནོ། །མཛེས་པ་མངོན་གྱུར་བྱེད་སྟངས་འདི་ནི་ཡུལ་ག་གེ་མོར་བསྟོད་ཚུལ་ཙམ་གྱི་ཁྱབ་རྒྱ་ལས་བརྒལ་ནས་དཔེ་དོན་གང་དུའང་བཀོལ་ནུས་པའི་ཐབས་ལམ་རྨད་དུ་བྱུང་བ་ཞིག་སྟེ། དཔེ་ཅན་སྟེང་གི་ཆེ་བ་དང་ཡོན་ཏན་བརྗོད་པ་མི་གཙོ་བར། མཚོན་བྱེད་དཔེའི་སྟེང་དུ་མཛེས་པ་ཇི་ཙམ་སྤྲས་པ་དང་འུད་བརྗོད་ཇི་ཙམ་བྱས་པ་དེ་ཙམ་གྱིས་མཚོན་བྱ་དཔེ་ཅན་གྱི་མཛེས་པ་བླ་ནས་བླ་རུ་འཕགས་འགྲོ་བ་སྟེ། འབྲི་སྟངས་འདི་ནི་རིག་འཛིན་འཇིགས་མེད་གླིང་པའི་གསུང་རྩོམ་ནང་འབུར་ཐོན་དུ་བཞེངས་ཡོད། མཆོད་ཕྲེང་དྲི་ཟའི་རྒྱུད་མངས་ལས།¹⁴ སྲིད་ན་རྣམ་པར་མཛེས་པའི་ཟླ་བས་ཀྱང་། །ལྟ་ན་སྡུག་པའི་གཟུགས་ཀྱི་ཆར་མི་ཉེ། །ནོར་བུའི་དོ་ཤལ་འཛིན་པའི་ཡིད་འོང་མ། །ཞེས་དང་། ཡང་དེ་ཉིད་ལས།¹⁵ ལང་ཚོའི་ཆ་ཤས་རྫོགས་པའི་པདྨ་དང་། རྣམ་འགྱུར་ཅིར་ཡང་འཆར་བའི་ཨ་དརྴ། །ཕན་ཚུན་འགྲན་པ་ལྟ་བུའི་གཟུགས་མཛེས་མ། །ཞེས་པ་ལྟ་བུ་དང་། དམ་ཅན་རུ་མཚོན་མངའ་གསོལ་ལས།¹⁶ ཕ་རོལ་རི་རབ་ཡིན་ཡང་རྫུ་འཕྲུལ་གྱིས། །བརླགས་བྱེད་རྟ་མཆོག་ཆེན་པོར་མངའ་གསོལ་ལོ། །ཞེས་དང་ཙིའུ་དམར་མངའ་གསོལ་ལས།¹⁷ ཕྲག་དོག་རླུང་དམར་འཚུབ་པའི་བན་སྔགས་ཀྱིས། །མཐུ་བྱད་མེ་དཔུང་སྦར་བའི་རྣོ་དབལ་མཚོན། །དྲང་སྲོང་དམོད་པའི་གནམ་ལྕགས་ཐོག་མདའ་ཡིས། །རང་གཤེད་རང་ལ་བབ་པར་མངའ་གསོལ་ལོ། །ཞེས་པ་ལྟ་བུའོ།།

ཡང་། སྙན་ངག་མཁན་ལ་ཅི་ཡང་རྒྱན། །ཞེས་པ་ལྟར་ལྷན་སྐྱེས་ཀྱི་བག་ཆགས། སྐྱེ་སྟོབས་ཀྱི་ཤེས་རབ། སྦྱངས་སྟོབས་ཀྱི་ཡོན་ཏན་ཚད་ངེས་ཅན་མངའ་བ་ལ་ནི་བརྗོད་བྱ་གང་ཡིན་ཀྱང་སྙན་ཚིག་ཏུ་བཞེངས་ཆོག་ཆོག་ཡིན་པ་འདྲ་སྟེ། འཇུ་མི་ཕམ་པས་སྙན་འགྲེལ་དབྱངས་ཅན་དགྱེས་པའི་རོལ་མཚོ་ལས།¹⁸སྤྱིར་བསྔགས་བྱ་ལ་ཡོན་ཏན་རྒྱ་ཆེན་པོ་ཡོད་པ་བསྔགས་ན་ངོ་མཚར་སྐྱེ་ཞིང་། དེ་ཡང་རྗོད་ཚུལ་ཉམས་དང་ལྡན་པས་ཆེས་མཛེས་པར་འགྱུར་རོ། །ཡོན་ཏན་ཆུང་ངུ་བསྔགས་རིན་མི་ཆོག་པ་ལྟ་བུ་ལ་ཡང་རྗོད་ཚུལ་མཁས་ན་ཡོན་ཏན་ཆེན་པོར་མཚོན་ནས་མཛེས་པའང་ཡོད་དེ། དཔེར་ན། བློ་ལྡན་ལེགས་བཤད་འཚོལ་བས་མི་ངོམས་པ། །མཚར་མོད་ལན་བརྒྱར་བཤད་ཀྱང་མི་གོ་བ། །འདི་ཉིད་ད་དུང་ལེགས་བཤད་ཐོས་པ་ལ། །དགའ་ཞིང་འདུན་པ་མི་འདོར་ངོ་མཚར་ཆེ། །ཞེས་གསུངས་པས་མཚོན་ཏེ་སྙན་ངག་གི་ཉམས་བཞེངས་པའི་ཐབས་ཚུལ་ཡང་གྲངས་ཀྱིས་མི་ལང་བ་ཡོད་པར་ཚོད་དཔག་བྱེད་ནུས་སོ།།

བརྩམས་ཆོས་དང་ཀློག་པ་པོའི་བར་གྱི་ལྟོས་གྲུབ་ཀྱི་ཉམས་འགྱུར།

སྒྱུ་རྩལ་གྱི་ཚད་གཞི་ངེས་ཅན་ལོངས་པའི་བརྩམས་ཆོས་ཤིག་ཡིན་ན་ཀློག་པ་པོའི་རྟོག་ཚོགས་མ་ལུས་པ་རྩོམ་ཡིག་གིས་ནང་འདྲེན་ནུས་ཏེ། ཤུགས་རིང་ཡང་ཡང་འདོན་པ། གཅིག་པུར་དགའ་ནས་འཕག་འཚག་རྒྱག་པ། མིག་ཆུ་ལ་ཚོད་འཛིན་བྱེད་མི་ནུས་ཤིང་ཉིན་མཚན་ཐོག་ཐག་ཏུ་དཔེ་དེབ་ནང་མགོ་འཐོམས་པ། ད་དུང་རྩོམ་ཡིག་གིས་བག་ཆགས་བཞག་འབྲས་སུ་ཀློག་པ་པོའི་མི་ཚེ་དང་མཛེས་པ་ལྟ་ཚུལ། རྒྱུན་ལྡན་གྱི་གོམས་གཤིས་བཅས་ལའང་འགྱུར་བ་རབ་དང་རིམ་པར་ཐེབས་འགྲོ་བ་བཅས་ནི། བརྩམས་ཆོས་ཀྱི་འགུགས་ཤུགས་སམ་སྒྱུ་རྩལ་གྱི་བདེན་པ་རུ་འདོད་ཆོག ནུས་ཤུགས་དེ་ལྟར་ལྡན་པ་ལ་རྒྱུ་རྐྱེན་ངེས་ཅན་ཡོད་དེ། རྩོམ་མཁན་གྱི་འཚོ་བའི་ཉམས་མྱོང་ལས་གྲུབ་པའི་ནང་བསམ་བློའི་གྲ་སྒྲིག་ཇི་ཙམ་འཐུས་སྒོ་ཚང་བ་དེ་ཚོད་ཀྱིས་བརྩམས་ཆོས་ཀྱི་མ་ལག་བརྟན་དུ་འགྲོ་བ་དང་། རྩོམ་མཁན་གྱི་མྱོང་བ་ཇི་ཙམ་གཏིང་ཟབ་དང་དངོས་ཡོད་ཡིན་པ་དེ་ཙམ་གྱིས་བརྩམས་ཆོས་ནང་གི་ཡིག་འབྲུ་རེ་རེར་ཚོར་བའི་རླན་བཞས་ཁྱབ་འགྲོ་བ་ཡིན། སྐབས་འདི་ནི་རྩོམ་མཁན་གྱི་ནང་བསམ་བློའི་དགའ་སྐྱོ་ཆགས་སྡང་གི་འགྱུར་བ་དང་འགྱུར་བ་དེ་ཉིད་ཡིག་འབྲུའི་གསེང་ནས་བུད་མེད་སྒེག་མའི་རྣམ་འགྱུར་ལྟར་འཛུམ་པ་ལ་ཉམས་སུ་འདོད་ཆོག

དེ་བས་རྩོམ་མཁན་གྱི་ནང་བསམ་བློའི་འགྱུར་བ་ཇི་ཙམ་དངོས་ཡོད་དང་ཚོར་འདུ་ཤུགས་དྲག་པོ་ཡིན་པ་དེ་ཙམ་གྱིས་བརྩམས་ཆོས་ནང་གི་ཉམས་ཀྱི་སྒྱུ་རྩལ་མཐོ་ཚད་བླ་ནས་བླ་རུ་འཕགས་འགྲོ་ཞིང་། བརྩམས་ཆོས་ནང་ནས་དགའ་སྐྱོ་ཆགས་སྡང་གི་རྣམ་འགྱུར་ཇི་ཙམ་གསལ་པོ་དང་མཚོན་ཐབས་མཛེས་པ་དེ་ཚོད་ཀྱིས་ཀློག་པ་པོའི་ནང་སེམས་ལ་གཡོ་འགུལ་ལམ་འགྱུར་བ་བསྐྱེད་ནུས་པ་ཡིན། དེའི་རྐྱེན་གྱིས་ཀློག་མཁན་གྱི་ཕྱི་རོལ་ལུས་ངག་ལ་འཆར་བའི་དགའ་སྐྱོ་ཆགས་སྡང་གི་གཟུགས་རིས་སྣ་ཚོགས་པ་ནི། ནང་སེམས་ཀྱི་ཚོར་བའི་པིར་གྱིས་བྲིས་པ་ཡིན་ལ། དེ་ལྟར་བརྩམས་ཆོས་ཤིག་གི་སྒྱུ་རྩལ་བདེན་པའི་ནང་བྱིངས་པའི་ཀློག་མཁན་དེའི་ཉམས་དང་འགྱུར་བ་ནི་རྩོམ་པ་པོ་གང་གི་གཞི་རྩའི་བསམ་བློ་དང་རྒྱུ་འབྲས་ཀྱི་འབྲེལ་བ་དམ་ཟབ་ཡོད་པ་ཡིན་ནོ།།

དེ་བས་མེ་ལོང་མའི་ཉམས་ལྡན་གྱི་རྒྱན་གྱི་གཏིང་ཉུལ་ནུས་ན་རྩོམ་རིག་སྤྱིའི་བསམ་བློའི་བློས་བླངས་དང་འབྲེལ་བའི་གསང་ཚིག་དང་། དགའ་སྐྱོ་ཆགས་སྡང་གི་ཚོར་བའི་མྱུ་གུ་ལས་འབུས་པའི་སྒྱུ་རྩལ་གྱི་མཛེས་པ་བཀྲ་བའི་སྙན་ཚིག་གི་མེ་ཏོག་ཇི་ལྟ་བུ་བསླ་བ་ལའང་ཐོགས་པ་མེད་པར་འགྱུར་ངེས་སོ།།

^[16]

^[17]

^[18]

སྙན་འགྲེལ་དཎྜིའི་དགོངས་རྒྱན། རྣམ་གླིང་པར་མ། ཤོག་གྲངས། 66
སྙན་འགྲེལ་དཎྜིའི་དགོངས་རྒྱན། རྣམ་གླིང་པར་མ། ཤོག་གྲངས། 75
སྙན་འགྲེལ་དཎྜིའི་དགོངས་རྒྱན། རྣམ་གླིང་པར་མ། ཤོག་གྲངས། 56
སྙན་འགྲེལ་དཎྜིའི་དགོངས་རྒྱན། རྣམ་གླིང་པར་མ། ཤོག་གྲངས། 53
སྙན་འགྲེལ་དཎྜིའི་དགོངས་རྒྱན། རྣམ་གླིང་པར་མ། ཤོག་གྲངས། 408
སྙན་འགྲེལ་དཎྜིའི་དགོངས་རྒྱན། རྣམ་གླིང་པར་མ། ཤོག་གྲངས། 259
སྙན་འགྲེལ་དཎྜིའི་དགོངས་རྒྱན། རྣམ་གླིང་པར་མ། ཤོག་གྲངས། 250
ཁམས་འགྲེལ་དབྱངས་ཅན་ངག་གི་རོལ་མཚོ། བོད་ལྗོངས་མི་དམངས་དཔེ་སྐྲུན་ཁང་། ཤོག་གྲངས། 425
ཁམས་འགྲེལ་དབྱངས་ཅན་ངག་གི་རོལ་མཚོ། བོད་ལྗོངས་མི་དམངས་དཔེ་སྐྲུན་ཁང་། ཤོག་གྲངས། 683
སྙན་ངག་ལ་འཇུག་ཚུལ་ཚིག་རྒྱན་རིག་པའི་སྒོ་འབྱེད། མཚོ་སྔོན་མི་རིགས་དཔེ་སྐྲུན་ཁང་། ཤོག་གྲངས། 59
ཁམས་འགྲེལ་དབྱངས་ཅན་ངག་གི་རོལ་མཚོ། བོད་ལྗོངས་མི་དམངས་དཔེ་སྐྲུན་ཁང་། ཤོག་གྲངས། 440
སྙན་འགྲེལ་དཎྜིའི་དགོངས་རྒྱན། རྣམ་གླིང་པར་མ། ཤོག་གྲངས། 84
སྙན་འགྲེལ་དཎྜིའི་དགོངས་རྒྱན། རྣམ་གླིང་པར་མ། ཤོག་གྲངས། 55
ཀློང་ཆེན་སྙིང་ཐིག་གི་འདོན་ཆ། རྣམ་གླིང་པར་མ། ཤོག་གྲངས། 357
ཀློང་ཆེན་སྙིང་ཐིག་གི་འདོན་ཆ། རྣམ་གླིང་པར་མ། ཤོག་གྲངས། 360
ཀློང་ཆེན་སྙིང་ཐིག་གི་འདོན་ཆ། རྣམ་གླིང་པར་མ། ཤོག་གྲངས། 401
ཀློང་ཆེན་སྙིང་ཐིག་གི་འདོན་ཆ། རྣམ་གླིང་པར་མ། ཤོག་གྲངས། 481
སྙན་འགྲེལ་དབྱངས་ཅན་དགྱེས་པའི་རོལ་མཚོ། རྣམ་གླིང་པར་མ། ཤོག་གྲངས། 75

སྙན་ངག་གི་ཉམས་གླེང་བ།

སྤྱིར་བཤད་པ།

མེ་ལོང་མ་ནས་སྙན་ངག་གི་ཉམས་ཇི་ལྟར་བསྟན་ཚུལ།

ཉམས་དང་འགྱུར་བ་བྱེ་བྲག་ཏུ་བཤད་པ།

སྙན་ཚིག་ནང་ཉམས་འབྲི་བཞེངས་བྱེད་ཚུལ།

བརྩམས་ཆོས་དང་ཀློག་པ་པོའི་བར་གྱི་ལྟོས་གྲུབ་ཀྱི་ཉམས་འགྱུར།

དཔྱད་མཆན་སྤེལ། ལན་དོར།

འབྲེལ་བྱང་།

འབྲེལ་ཡོད་དྲ་ཚིགས།

དྲ་ཚིགས་ལྟ་མཁན།