ལོ་རིམ་གསུམ་པའི་སློབ་གཉེར་བ། ཀརྨ་དར་རྒྱས།
དགུང་ལ་ཐུག་པའི་གཡའ་གངས་བརྗིད་པའི་རིའི།།
རྩེ་ནས་བཞུར་བའི་དྭངས་གཙང་ཁ་བའི་ཆུ།།
དུ་དྲིས་མ་འགོས་འབྱུང་ཁམས་བདེ་བའི་རླུང་།།
མ་བཅོས་རང་བྱུང་ལྷུན་གྲུབ་ཕ་ཡུལ་མཛེས།།
དཔྱིད་ཀའི་ཨ་སྔོན་དྭངས་མའི་མེ་ལོང་བཞིན།།
ཤིན་ཏུ་གསལ་ཞིང་དྲི་མས་ཡོངས་མ་སྦགས།།
ཁ་བའི་བཞུར་རྒྱུན་དྭངས་མའི་བདུད་རྩི་ཉིད།།
ཞིམ་ཞིང་མངར་བས་འཐུང་ཞིང་འཐུང་ཞིང་བརྩེ།།
བསིལ་རླུང་འཇམ་པའི་དཔྱིད་ཀྱི་དཔལ་མོ་དེས།།
འབུས་ཤིང་རྒྱས་པ་ས་གཞིའི་སྔོ་ལྗང་འདི།།
གཡུ་ཞུན་སྔོན་མོ་ཐང་མར་བདལ་བའམ།།
འདི་འདྲ་གཞན་ཞིག་གླིང་འདིར་ཡོད་དམ་ཅི།།
རྩྭ་ཐང་ལྗང་ཁུའི་སྟེང་གི་ལུག་ཁྱུ་ནི།།
ནམ་མཁའི་སྐར་ཚོགས་ས་ལ་འཕོས་པའམ།།
ལུག་རྫི་བུ་མོའི་འཛུམ་པའི་བཞིན་རས་ནི།།
པད་དཀར་འདབ་ལོ་བཞད་མ་ཐག་པ་འདྲ།།
ཅི་འདི་སྐྱེ་སའི་ཕ་ཡུལ་དོག་མོ་རུ།།
གསེར་གྱི་རྡུལ་ཕྲན་སྤུངས་པའི་རི་ཡིན་ནམ།།
འོན་ཏེ་རི་མོ་མཁན་གྱི་སྒྱུ་རྩལ་ལས།།
འཕོས་པའི་མཛེས་བཀོད་གང་ཡིན་འཕྱང་མོ་ཉུག།།
མིག་གིས་མཐོང་བ་ཙམ་གྱིས་སེམས་ལ་མཛའ།།
མཚམས་སྤྲིན་ཟུར་ནས་ཉི་ཟེར་ཕོག་པའི་རི།།
པིར་བཟུང་མཁན་པོས་དཔེ་རུ་བླང་བྱ་བ།།
མ་བཅོས་རང་བྱུང་ཕ་ཡུལ་མཛེས་པའི་ཕུད།།
